ബ്ലൂ എക്കോണമി: കടൽസമ്പത്ത്‌ മനുഷ്യപുരോഗതിക്ക്‌

ബ്ലൂ എക്കോണമി: കടൽസമ്പത്ത്‌ മനുഷ്യപുരോഗതിക്ക്‌
June 27 04:45 2017

ലോക ജനതയുടെ ഭക്ഷണക്ഷാമം പൂർണമായും പരിഹരിക്കാൻ സമുദ്രങ്ങൾക്കാകും. ചരിത്രാതീത കാലം മുതൽ തന്നെ കടൽ മനുഷ്യന്റെ ഭക്ഷണശാല കൂടിയാണ്‌. മത്സ്യം തന്നെയാണ്‌ ഏറ്റവും വലിയ വിഭവം. ലോക ജനസംഖ്യയിൽ 70 ശതമാനത്തിലധികം പേർ കടൽ മത്സ്യം കഴിക്കുന്നവരാണ്‌. മത്സ്യം കൂടാതെ ഞണ്ട്‌ തുടങ്ങിയ ജീവികളെയും മനുഷ്യൻ ഉപയോഗിക്കാറുണ്ട്‌. ഭക്ഷണം മാത്രമല്ല ഒരു ഫാർമസി കൂടിയാണ്‌ കടൽ. സമുദ്രത്തിലെ ആൽഗകളിലും ബാക്ടീരിയകളിലും ഫംഗസുകളിൽ നിന്നുമൊക്കെയാണ്‌ ആന്റി ബയോട്ടിക്കുകൾ ഉണ്ടാക്കുന്നത്‌. പലവിധ ടോണിക്കുകളും കടൽവിഭവം ഉപയോഗിച്ച്‌ നിർമിക്കുന്നുണ്ട്‌. പല ആയുർവേദ മരുന്നുകളുടെയും പ്രധാന ചേരുവ കടൽ സസ്യങ്ങളാണ്‌. ഞരമ്പ്‌ രോഗത്തിനും ഹൃദ്രോഹത്തിനും കൊളസ്ട്രോളിനുമുള്ള മരുന്നുകൾ കടൽ വിഭവങ്ങളിൽ നിന്നും ഇന്ന്‌ ഉണ്ടാക്കുന്നുണ്ട്‌.

വലിയശാല രാജു

മഹാസമുദ്രങ്ങളെയെല്ലാം ചേർത്ത്‌ ഒരു രാജ്യമായി കണക്കാക്കുകയാണെങ്കിൽ ലോകത്ത്‌ ബ്രിട്ടൺ കഴിഞ്ഞാൽ ഏറ്റവും കൂടുതൽ ജിഡിആർ ഉള്ള രാജ്യം ഈ സമുദ്രങ്ങളായിരിക്കും. സമുദ്രസമ്പത്തിന്റെ ആകെ മൂല്യം അമേരിക്കയുടെയും ചൈനയുടേതിനേക്കാൾ കൂടുതലാണ്‌. ചരക്കിന്റെയും സേവനത്തിന്റെയും വാർഷിക മൂല്യം വിലയിരുത്തിയാൽ 24 ലക്ഷം കോടി ഡോളർ സാമ്പത്തിക ശേഷിയാണ്‌ ലോകത്തിലെ സമുദ്രങ്ങൾക്കെല്ലാം ചേർത്ത്‌ കണക്കാക്കിയിട്ടുള്ളത്‌. ഇത്‌ മനുഷ്യന്റെ പ്രാപ്യമായ സമ്പത്തിന്റെ കണക്ക്‌ മാത്രമാണ്‌. നമുക്ക്‌ അപ്രാപ്യമായ സമ്പത്തിന്റെ കണക്ക്‌ നോക്കിയാൽ അത്‌ വിലമതിക്കാനോ കണക്ക്‌ കൂട്ടാനോ പറ്റുന്നതല്ല. ഉദാഹരണത്തിന്‌ ഒരു കിലോമീറ്റർ നീളവും ഒരു കിലോമീറ്റർ ഘനവുമുള്ള സമുദ്രത്തിൽ ഒരു കിലോഗ്രാം വരെ സ്വർണം അടങ്ങിയിട്ടുണ്ട്‌. ഇത്‌ ശാസ്ത്രം കണ്ടെത്തിയതാണ്‌. അങ്ങനെ നോക്കുമ്പോൾ ആകെയുള്ള സമുദ്രജലത്തിൽ 136 കോടി കിലോഗ്രാമിലധികം സ്വർണം അലിഞ്ഞ്‌ കിടക്കുന്നു. പക്ഷേ ഇവ ചെലവ്‌ കുറഞ്ഞ രീതിയിൽ വേർതിരിച്ചെടുക്കാൻ നമ്മുടെ സാങ്കേതിക വിദ്യ വളർന്നിട്ടില്ല. സ്വർണംപോലെ തന്നെ മറ്റ്‌ നിരവധി ലോഹങ്ങളും സമുദ്രജലത്തിൽ അലിഞ്ഞ്‌ കിടപ്പുണ്ട്‌. ഉപഗ്രഹങ്ങളുടെ യുഗത്തിലും കടലിന്റെ അഗാധതയെ ഇനിയും മനുഷ്യൻ പൂർണമായി കൈയെത്തിപ്പിടിച്ചിട്ടില്ല.
ബ്ലൂ എക്കോണമിയെക്കുറിച്ചുള്ള അന്വേഷണം ആരംഭിക്കുന്നത്‌ ഇവിടെ നിന്നാണ്‌. ഐക്യരാഷ്ട്രസഭ സർവകലാശാലയുടെ സീറോ എമിഷൻ ഗവേഷക സ്ഥാപനത്തിലെ ഗുന്തർ പോളി ആണ്‌ 2004 ൽ ബ്ലൂ എക്കോണമി എന്ന ആശയം ആദ്യമായി മുന്നോട്ടു വച്ചത്‌. സമുദ്ര സമ്പദ്‌വ്യവസ്ഥയെ രാജ്യത്തിന്റെ മൊത്തം സമ്പത്ത്‌ വ്യവസ്ഥയുമായും ലോക സമ്പദ്‌ വ്യവസ്ഥയുമായും അത്‌ കൂട്ടിയോജിപ്പിക്കുന്നു. സമുദ്ര സ്രോതസിനെ സംരക്ഷിച്ചുകൊണ്ട്‌ തന്നെ ലാഭകരമായും സുസ്ഥിരമായും ഉപയോഗിക്കാനുതകുന്ന ശാസ്ത്രീയ മാർഗങ്ങളുടെ ആവശ്യകതയിലേക്ക്‌ ഇത്‌ വിരൽചൂണ്ടുന്നു. സമുദ്ര ആവാസവ്യവസ്ഥയുടെ നിലനിൽപ്പും സംഭരണവും അതുമായി ബന്ധപ്പെട്ട പ്രധാന പ്രശ്നങ്ങളും ബ്ലു എക്കോണമിയുടെ ഭാഗങ്ങളാണ്‌. സമുദ്രതീരങ്ങളിൽ രാജ്യങ്ങൾ സുരക്ഷാഭീഷണികൾ നേരിടുന്നതുകൊണ്ട്‌ സമുദ്രസുരക്ഷയും സംരക്ഷണവും ഉറപ്പുവരുത്തേണ്ടതും ബ്ലു എക്കോണമിയുടെ വിശാലാർഥത്തിലുള്ള വിജയത്തിന്‌ അത്യന്താപേക്ഷിതമാണ്‌.
ലോക ജനതയുടെ ഭക്ഷണക്ഷാമം പൂർണമായും പരിഹരിക്കാൻ സമുദ്രങ്ങൾക്കാകും. ചരിത്രാതീത കാലം മുതൽ തന്നെ കടൽ മനുഷ്യന്റെ ഭക്ഷണശാലകൾ കൂടിയാണ്‌. മത്സ്യം തന്നെയാണ്‌ ഏറ്റവും വലിയ വിഭവം. ലോക ജനസംഖ്യയിൽ 70 ശതമാനത്തിലധികം പേർ കടൽ മത്സ്യം കഴിക്കുന്നവരാണ്‌. മത്സ്യം കൂടാതെ ഞണ്ട്‌ തുടങ്ങിയ ജീവികളെയും മനുഷ്യൻ ഉപയോഗിക്കാറുണ്ട്‌.
ഭക്ഷണം മാത്രമല്ല ഒരു ഫാർമസി കൂടിയാണ്‌ കടൽ. സമുദ്രത്തിലെ ആൽഗകളിലും ബാക്ടീരിയകളിലും ഫംഗസുകളിൽ നിന്നുമൊക്കെയാണ്‌ ആന്റി ബയോട്ടിക്കുകൾ ഉണ്ടാക്കുന്നത്‌. പലവിധ ടോണിക്കുകളും കടൽവിഭവം ഉപയോഗിച്ച്‌ നിർമിക്കുന്നുണ്ട്‌. പല ആയുർവേദ മരുന്നുകളുടെയും പ്രധാന ചേരുവ കടൽ സസ്യങ്ങളാണ്‌. ഞരമ്പ്‌ രോഗത്തിനും ഹൃദ്രോഹത്തിനും കൊളസ്ട്രോളിനുമുള്ള മരുന്നുകൾ കടൽ വിഭവങ്ങളിൽ നിന്നും ഇന്ന്‌ ഉണ്ടാക്കുന്നുണ്ട്‌. കൊഞ്ചിന്റെയും ഞണ്ടിന്റെയും ഉപയോഗശൂന്യമായികളയുന്ന പുറന്തോട്‌ ഉപയോഗിച്ച്‌ കേരള മത്സ്യഫെഡ്‌ നിർമിച്ച്‌ പുറത്തിറക്കുന്ന കൈറ്റോൺ കാപ്സ്യൂൾ കൊളസ്ട്രോളിനെ പ്രതിരോധിക്കാനുള്ള മരുന്നാണ്‌. പാർശ്വഫലങ്ങളില്ലാതെ ഒരുപാട്‌ രോഗികൾക്ക്‌ ഇത്‌ പ്രയോജനം ചെയ്യുന്നുണ്ട്‌. സന്ധിവേദനയ്ക്കും ഹൃദയസംബന്ധമായ അസുഖങ്ങൾക്കും അമിതവണ്ണം തടയുന്നതിനും ഈ മരുന്ന്‌ ഫലപ്രദമാണെന്ന്‌ കണ്ടുവരുന്നു.
കാലാവസ്ഥാ നിയന്ത്രണം, ഭക്ഷ്യവിഭവങ്ങൾ, മത്സ്യബന്ധനം, തൊഴിൽ, പെട്രോളിയം ഉൽപ്പന്നങ്ങളഉടെ ഖാനനം, പ്രകൃതിവാതകങ്ങളുടെ ലഭ്യത ഇതെല്ലാം കടൽ നമുക്കായി കരുതിവച്ചവയാണ്‌. എന്നാൽ ഈ അക്ഷയ ഖാനിയെ നാം നിരന്തരം നശിപ്പിച്ചുകൊണ്ടിരിക്കുകയാണ്‌. കടൽത്തീരങ്ങളിൽ വരുന്ന മാറ്റം മാത്രം എട്ട്‌ ലക്ഷത്തോളം പേരെയാണ്‌ ഇന്ത്യയിൽ ബാധിക്കുക. അതിൽ ഏറ്റവും കൂടുതൽ കേരളത്തിലായിരിക്കും. മത്സ്യത്തൊഴിലാളികൾക്ക്‌ തൊഴിൽ നഷ്ടപ്പെടുകയും അനുബന്ധ തൊഴിലുകളുൾപ്പെടെ ലക്ഷക്കണക്കിന്‌ പേർക്ക്‌ ഇതിന്റെ ദുര്യോഗം അനുഭവിക്കേണ്ടിവരുകയും ചെയ്യും.
മലിനീകരണമാണ്‌ കടൽ നശീകരണത്തിന്‌ പ്രധാന കാരണം. നഗരങ്ങളിൽ നിന്നും വ്യവസായശാലകളിൽ നിന്നും പുറന്തള്ളുന്ന മാലിന്യങ്ങളും വിഷവസ്തുക്കളും നദികളിലൂടെയും കായലുകളിലൂടെയും സമുദ്രത്തിലെത്തുന്നു. പ്ലാസ്റ്റിക്കിന്റെ അമിത ദുരുപയോഗം അത്‌ അവസാനം എത്തുന്നത്‌ കടലിലായിരിക്കും. ലോകസാമ്പത്തിക ഫോറം പ്രസിദ്ധീകരിച്ച കണക്ക്‌ പ്രകാരം 2050 ആകുമ്പോൾ കടലിൽ മീനിനെക്കാൾ കൂടുതൽ പ്ലാസ്റ്റിക്കായിരിക്കുമെന്നാണ്‌ പറഞ്ഞിരിക്കുന്നത്‌.
ഒരു വർഷം 80 ലക്ഷം ടൺ പ്ലാസ്റ്റിക്‌ കടലിലെത്തുന്നുണ്ടെന്ന്‌ പഠനങ്ങൾ ചൂണ്ടിക്കാട്ടുന്നു. ഇവിടെയാണ്‌ ബ്ലു എക്കോണമിയുടെ പ്രസക്തി വർധിക്കുന്നത്‌. കടലിനെ സംരക്ഷിച്ചുകൊണ്ട്‌ കടലിന്റെ സ്രോതസിനെ ഉപയോഗിക്കുക എന്ന ഈ സാമ്പത്തിക ശാസ്ത്രത്തിന്റെ കാഴ്ചപ്പാട്‌ പരിസ്ഥിതി സംരക്ഷണത്തിന്റെ കൂടി ഭാഗമാണ്‌.
മറ്റ്‌ സംസ്ഥാനങ്ങളുമായി താരതമ്യം ചെയ്യുമ്പോൾ കേരളത്തിലെ കടൽ സമ്പത്തിന്റെ വ്യാപ്തി ആപേക്ഷികമായി കൂടുതലാണ്‌. ഇന്ത്യയുടെ ആകെ കടൽത്തീരമായ 8129 കിലോമീറ്ററിൽ പത്ത്‌ ശതമാനത്തിൽ കൂടുതൽ (590 കിലോമീറ്റർ) കേരളത്തിലാണ്‌. എന്നാൽ ഇന്ത്യയുടെ ആകെ ഭൂപ്രകൃതിയുടെ 1.18 ശതമാനം മാത്രമാണ്‌ കേരളം. ആപേക്ഷികമായി ഇന്ത്യയിൽ ഏറ്റവും കൂടുതൽ കടൽത്തീരമുള്ളത്‌ കേരളത്തിലാണ്‌.
നമ്മുടെ ആകെയുള്ള 14 ജില്ലകളിൽ ഒൻപതും കടൽത്തീരത്താണ്‌ സ്ഥിതി ചെയ്യുന്നത്‌. ഏകദേശം 222 മത്സ്യഗ്രാമങ്ങളിൽ കൂടി രജിസ്റ്റർ ചെയ്ത 8,43,587 മത്സ്യത്തൊഴിലാളികൾ ഇവിടെയുണ്ട്‌. ഇപ്പോൾ ഇന്ത്യയുടെ ആകെ മത്സ്യക്കയറ്റുമതിയിൽ 15 ശതമാനം കേരളത്തിന്റേതാണ്‌. പ്രതിവർഷം ആറു ലക്ഷം ടണ്ണോളം മത്സ്യം ഇവിടെ നിന്നും പിടിക്കുന്നുണ്ട്‌. ആധുനികവൽക്കരണത്തിന്റെ അഭാവത്താൽ പിടിക്കുന്ന മത്സ്യം മുഴുവൻ ഉപയോഗിക്കാൻ പറ്റാത്ത അവസ്ഥയുണ്ട്‌. അതോടൊപ്പം മത്സ്യോൽപാദനം വർധിപ്പിക്കാൻ കഴിയാത്ത അവസ്ഥയുമുണ്ട്‌. കടൽ വ്യതിയാനങ്ങളും നഷ്ടപ്പെടുന്ന തീരങ്ങളും ഈ സമ്പത്ത്‌ വ്യവസ്ഥയെ നമ്മിൽ നിന്നും അകറ്റുകയും ചെയ്യുന്നു.
മത്സ്യബന്ധനവും മത്സ്യം വളർത്തലും മാത്രം കേരളത്തിന്റെ മൊത്തം ആഭ്യന്തര വളർച്ചനിരക്കിന്റെ 8.9 ശതമാനം വരും. സമുദ്രാതിർത്തി കടന്നുള്ള മത്സ്യബന്ധനം, വിദേശ കപ്പലുകൾക്കുള്ള കേന്ദ്ര സർക്കാരിന്റെ അനുവാദം ഇവയൊക്കെ ഗൗരവമായി ചർച്ച ചെയ്യപ്പെടേണ്ടതാണ്‌. മൺസൂൺ മത്സ്യബന്ധന നിരോധനം കേരളത്തിൽ ഏറ്റവും പ്രതികൂലമായാണ്‌ ബാധിക്കുക. ഇത്‌ ഏത്രത്തോളം ഗുണപ്രദമാണെന്ന്‌ ഏറ്റവും ആധുനിക ശാസ്ത്രസാങ്കേതിക വിദ്യ ഉപയോഗിച്ച്‌ ഇനിയും നാം പഠനം നടത്തിയിട്ടില്ല.
നിലവിലെ അടിസ്ഥാനസൗകര്യങ്ങൾ ഉപയോഗിച്ച്‌ കൃത്യമായ വിവരശേഖരത്തിലൂടെയും കണ്ടുപിടിത്തങ്ങളിലൂടെയും സുസ്ഥിരമായ സമുദ്രസമ്പദ്‌വ്യവസ്ഥ വികസിപ്പിക്കുകയാണ്‌ ബ്ലു എക്കണോമി ലക്ഷ്യമിടുന്നത്‌. അതോടൊപ്പം കടൽ ആവാസവ്യവസ്ഥയെ ശക്തിപ്പെടുത്തുകയും ചെയ്യുന്നു. കാലാവസ്ഥ വ്യതിയാനങ്ങളെക്കുറിച്ചുള്ള ആഗോള പഠനത്തിൽ കേരളത്തിൽ നിന്നുള്ള രണ്ട്‌ കടൽത്തീരങ്ങളും തിരഞ്ഞെടുക്കപ്പെട്ടിട്ടുണ്ട്‌ എന്നത്‌ ഗൗരവതരമായ കാര്യമാണ്‌. തിരുവനന്തപുരത്തെ പൂന്തുറയും എറണാകുളത്തെ എളങ്കുന്നപ്പുഴയുമാണിത്‌. പരിസ്ഥിതി മേഖലയിൽ പ്രവർത്തിക്കുന്ന അന്താരാഷ്ട്ര ഏജൻസിയായ മോണ്ട്‌ ഫോറത്തിന്റെ നേതൃത്വത്തിലാണ്‌ പഠനം. കാലാവസ്ഥവ്യതിയാനത്തിന്റെ ദോഷഫലങ്ങൾ ഏറ്റവും കൂടുതൽ അനുഭവിക്കുന്ന ഇന്ത്യയിലെ സ്ഥലങ്ങളാണ്‌ പൂന്തുറയും എളങ്കുന്നപ്പുഴയുമെന്നാണ്‌ നിഗമനം. ഈയൊരുസാഹചര്യത്തിൽ ബ്ലു എക്കോണമി എന്ന ആശയത്തിന്റെ വർത്തമാനകാല പ്രസക്തി വർധിക്കുകയാണ്‌.
ഇന്ത്യാ മഹാസമുദ്രത്തിന്‌ ചുറ്റുമുള്ള 21 രാജ്യങ്ങളുടെ കൂട്ടായ്മയായ അയോറയുടെ നേതൃത്വത്തിൽ മെയ്‌ 8, 9, 10 തീയതികളിൽ ഇൻഡോനേഷ്യയുടെ തലസ്ഥാനമായ ജക്കാർത്തയിൽ വച്ച്‌ കൂടിയ അന്താരാഷ്ട്ര സമ്മേളനത്തിൽ ഇന്ത്യയുടെ വിദേശകാര്യമന്ത്രിയും കേരളത്തെ പ്രതിനിധീകരിച്ച്‌ ഇവിടത്തെ ഫിഷറീസ്‌ മന്ത്രിയും പങ്കെടുക്കുകയുണ്ടായി. ശക്തമായ ഒരു സമുദ്രസമ്പത്ത്‌വ്യവസ്ഥ വികസിപ്പിക്കാനും അത്‌ അംഗരാജ്യങ്ങളുടെ സാമ്പത്തികമേഖലയുമായി കൂട്ടിയിണക്കിക്കൊണ്ട്‌ പോഷിപ്പിക്കാനും അതിന്‌ വേണ്ടത്‌ ചർച്ചചെയ്യാനുമാണ്‌ സമ്മേളനം വിളിച്ചുകൂട്ടിയത്‌. സമ്മേളനത്തിന്റെ അനന്തസാധ്യത നാം പ്രയോജനപ്പെടുത്തിയാൽ നമ്മുടെ മുഖച്ഛായതന്നെ മാറും.
എന്നാൽ ഭാരതസർക്കാർ ഇതിൽ ക്രിയാത്മകമായി എത്രത്തോളം ഇടപെടുമെന്നത്‌ സംശയകരമാണ്‌. സ്വാതന്ത്ര്യം ലഭിച്ച്‌ ഇത്രയും കാലമായിട്ടും സ്വതന്ത്രമായ ഒരു മത്സ്യവകുപ്പോ മന്ത്രാലയമോ തന്നെ സർക്കാരിനില്ല. കൃഷിമന്ത്രാലയത്തിന്‌ കീഴിൽ കന്നുകാലി, കോഴിവളർത്തൽ, ക്ഷീരവികസനം എന്നിവ കൈകാര്യം ചെയ്യുന്ന ഒരു ഉപമന്ത്രിയാണ്‌ മത്സ്യവകുപ്പും കൈകാര്യം ചെയ്യുന്നത്‌. ഇത്രയും വലിയ കടലോരമുണ്ടായിട്ടും ഒരു സ്വതന്ത്ര ഫിഷറീസ്‌ മന്ത്രി ഇല്ലാത്തത്‌ ഈ മേഖലയോടുള്ള അവഗണനയെയാണ്‌ സൂചിപ്പിക്കുന്നത്‌. മത്സ്യമേഖലയിലെ കാര്യങ്ങൾ നിശ്ചയിക്കുന്നത്‌ പലപ്പോഴും വാണിജ്യമന്ത്രാലയമാണ്‌.
കഴിഞ്ഞ മെയ്‌ 1-ന്‌ ഇന്ത്യാ സർക്കാർ ഒരു ഗസറ്റ്‌ വിജ്ഞാപനത്തിലൂടെ ആരുമായും കാര്യമായ ചർച്ചകൂടാതെ ഒരു ദേശീയ സമുദ്ര മത്സ്യബന്ധന നയം പ്രഖ്യാപിക്കുകയുണ്ടായി. 2014-ൽ കൊണ്ടുവന്ന ഡോ. മീനാകുമാരി റിപ്പോർട്ടെന്ന ജനവിരുദ്ധാശയം തന്നെയാണ്‌ ഇപ്പോൾ വീണ്ടും പുനരവതരിപ്പിച്ചിരിക്കുന്നത്‌. മത്സ്യമേഖലയിലെ വമ്പിച്ച പ്രതിഷേധം കാരണം മുമ്പ്‌ മരവിപ്പിച്ചതായിരുന്നു മീനാകുമാരി റിപ്പോർട്ട്‌. ബഹുരാഷ്ട്ര കുത്തകകൾക്ക്‌ ഇന്ത്യൻ സമുദ്രമേഖലയിൽ കടന്നുകയറുന്നതിന്‌ എല്ലാ സൗകര്യങ്ങളും ചെയ്തുകൊടുക്കുന്നതാണ്‌ പഴയ വീഞ്ഞ്‌ പുതിയ കുപ്പിയിലാക്കിയ ഈ മത്സ്യനയം.

  Categories:
view more articles

About Article Author