Wednesday
23 Jan 2019

പ്രളയം തകര്‍ത്ത ഭൂമിയില്‍ ഇനി കൊയ്ത്തുപാട്ടുണരും

By: Web Desk | Thursday 10 January 2019 9:41 PM IST

ആലപ്പുഴ: പ്രളയം തകര്‍ത്തെറിഞ്ഞ ഭൂമിയില്‍ ഇനി കൊയ്ത്തുപാട്ടുണരും. മഹാദുരന്തത്തെ അതിജീവിച്ച കേരളത്തിന്റെ നെല്ലറയായ കുട്ടനാട്ടിലെ പുഞ്ചകൊയ്ത്തിന് നാളെ  തുടക്കമാകും. 30,000 ഹെക്ടറിലാണ് ഇത്തവണ കര്‍ഷകര്‍ കൃഷി ഇറക്കിയത്. 30 വര്‍ഷമായി തരിശായ് കിടന്ന കരുവാറ്റ പഞ്ചായത്തിലെ ചാലുങ്കല്‍ പാടത്തിലാണ് നാളെ രാവിലെ ജില്ലയിലെ ആദ്യത്തെ വിളവെടുപ്പ്. കഴിഞ്ഞ പുഞ്ചകൃഷിയേക്കാള്‍ കൂടുതല്‍ പാടശേഖരങ്ങളില്‍ ഇത്തവണ കൃഷിയിറക്കാന്‍ കഴിഞ്ഞുവെന്നതും മറ്റൊരു പ്രത്യേകതയാണ്. ഒരു ഹെക്ടറില്‍ അഞ്ച് ടണ്‍ നെല്ലുവരെ പ്രതീക്ഷിക്കുന്നതിനാല്‍ മുന്‍ വര്‍ഷത്തേക്കാള്‍ ഇത്തവണ വിളവും കൂടും. കുട്ടനാട് അപ്പര്‍ കുട്ടനാട് മേഖലകളില്‍ 12,000 ഹെക്ടറിലധികമാണ് ഇത്തവണ കൃഷി ഇറക്കിയത്.

പ്രളയത്തില്‍ തകര്‍ന്ന കാര്‍ഷിക മേഖല പൊടുന്നനെയാണ് ഉയിര്‍ത്തെഴുന്നേറ്റത്. ഇതിന് സര്‍വ്വ സഹായവുമായി സംസ്ഥാന സര്‍ക്കാരുമുണ്ടായിരുന്നു.

കൃഷി വകുപ്പ് സൗജന്യമായി വിത്തും വളവും കുമ്മായവും കര്‍ഷകര്‍ക്ക് നല്‍കി. 68,000 മെട്രിക് ടണ്‍ നെല്‍വിത്ത് കൃഷിവകുപ്പ് സൗജന്യമായി നല്‍കി. ഇതില്‍ 90 ശമതാനവും ഉമ വിത്തായിരുന്നു. ബാക്കി ജ്യോതി വിത്തും. നൂറുദിവസം മുതല്‍ 120 ദിവസം വരെ വിള തരുന്നതാണ് ഈ വിത്തുകള്‍. കൂടാതെ പ്രളയത്തില്‍ തകര്‍ന്ന കൃഷിയിടങ്ങള്‍ക്ക് ഹെക്ടറിന് 13,500 രൂപ വിതം നഷ്ടപരിഹാരവും നല്‍കി. മടവീഴ്ചയുണ്ടായ പാടശേഖരങ്ങള്‍ക്ക് അവ പുനര്‍നിര്‍മിക്കാനുള്ള തുക പൂര്‍ണ്ണമായും ലഭിച്ചു. കൂടാതെ 20 ശതമാനം തുക അഡ്വാന്‍സായും സര്‍ക്കാര്‍ നല്‍കിയിരുന്നു. കുട്ടനാട്ടില്‍ മാത്രം 168 പാടശേഖരങ്ങള്‍ക്കാണ് മടവീഴ്ചയുണ്ടായത്.
നെല്ല് സംഭരണത്തിനായി 23,000 ഓളം കര്‍ഷകരും സപ്ലൈകോയുമായി കരാറായിട്ടുണ്ട്. 42 ഓളം സ്വകാര്യ മില്ലുകള്‍ നെല്ല് സംഭരിക്കും. പുഞ്ചകൃഷിക്ക് ഒട്ടേറെ വെല്ലുവിളികളാണ് തുടക്കം മുതല്‍ നേരിട്ടത്. കൃഷിവകുപ്പ് മന്ത്രി വി എസ് സുനില്‍കുമാര്‍ അഞ്ച് തവണ കുട്ടനാട് സന്ദര്‍ശിച്ച് സ്ഥിതിഗതികള്‍ വിലയിരുത്തി.

തോട്ടപ്പള്ളി സ്പില്‍വേ വഴിയും തണ്ണീര്‍മുക്കം ബണ്ടുവഴിയും ഓരുവെള്ളം കയറുന്നത് തടയാനായി കൃഷിമന്ത്രിയുടെ ചേംബറില്‍ മന്ത്രി വി എസ് സുനില്‍കുമാര്‍ ഇറിഗേഷന്‍വകുപ്പ് മന്ത്രി കെ കൃഷ്ണന്‍കുട്ടിയും യോഗം ചേര്‍ന്ന് നടപടികള്‍ സ്വീകരിച്ചു. ഓരുവെള്ളം കയറിയത് കൃഷിക്ക് ആദ്യഘട്ടത്തില്‍ തിരിച്ചടിയായെങ്കിലും പിന്നീട് മണല്‍ചിറ ഉണ്ടാക്കിയതോടെ ഇത് പരിഹരിക്കപ്പെട്ടു. കൂടാതെ കൊയ്ത്തുനടക്കുന്ന പ്രദേശങ്ങളിലെ ഉപ്പിന്റെ അംശം അറിയാനായി വെള്ളം തുടര്‍ച്ചയായി ലബോറട്ടറികളില്‍ പരിശോധിക്കുകയും ചെയ്തു. വിളവെടുപ്പിന് പാകമായ നെല്‍പ്പാടങ്ങളില്‍ കൊയ്ത്തുയന്ത്രങ്ങളെത്തിക്കാന്‍ 18ന് ആലപ്പുഴയില്‍ വിപുലമായ യോഗം ചേരാന്‍ കൃഷി മന്ത്രി വി എസ് സുനില്‍കുമാര്‍ നിര്‍ദ്ദേശം നല്‍കിയിട്ടുണ്ട്. കൃഷി ഡയറക്ടറെ കൂടാതെ പത്തനംതിട്ട, കോട്ടയം ജില്ലകളിലെ കൃഷി ഓഫീസര്‍ ഉള്‍പ്പെടെയുള്ളവര്‍ യോഗത്തില്‍ പങ്കെടുക്കും. പ്രളയത്തിന് ശേഷം ഒക്‌ടോബറിലാണ് മിക്ക പാടത്തും കൃഷിയിറക്കിയത്. ചില സ്ഥലങ്ങളില്‍ നവംബര്‍, ഡിസംബര്‍ മാസങ്ങളിലുമായിരുന്നു. ജനുവരിയില്‍ 5000 ഏക്കറിലെങ്കിലും കൊയ്ത്തും സംഭരണവും പൂര്‍ത്തിയാക്കുവാന്‍ കഴിയുമെന്നാണ് അധികൃതരുടെ വിശ്വാസം. മെയ് മാസത്തോടെ കുട്ടനാട്, അപ്പര്‍കുട്ടനാട് മേഖലകളില്‍ പൂര്‍ണ്ണമായും വിളവെടുപ്പ് പൂര്‍ത്തീകരിക്കാനാകും.

65,000 ടണ്‍ അധികമായി നെല്ല്
ഉല്‍പ്പാദിപ്പിക്കും: വി എസ് സുനില്‍കുമാര്‍
ആലപ്പുഴ: ഇത്തവണത്തെ പുഞ്ചകൃഷിക്ക് 65,000 ടണ്‍ അധികമായി നെല്ല് ഉല്‍പ്പാദിപ്പിക്കാന്‍ കഴിയുമെന്ന് കൃഷിമന്ത്രി വി എസ് സുനില്‍കുമാര്‍ ജനയുഗത്തോട് പറഞ്ഞു. ആലപ്പുഴ ജില്ലയില്‍ 35,000 ടണ്ണും കോട്ടയം ജില്ലയില്‍ 20,000 ടണ്ണും പത്തനംതിട്ടയില്‍ 10000 ടണ്‍ നെല്ലും അധികമായി ലഭിക്കും. മുന്‍ വര്‍ഷങ്ങളില്‍ നിന്ന് വ്യത്യസ്തമായി മികച്ച വിളവാണ് ഇത്തവണ ലഭിച്ചത്. പ്രളയത്തില്‍ സകലതും നഷ്ടപ്പെട്ട കര്‍ഷകന് കൃഷി ചെയ്യുവാന്‍ സര്‍ക്കാര്‍ പൂര്‍ണ്ണമായും പിന്തുണ നല്‍കിയിരുന്നു. വിത്തും വളവും കുമ്മായവുമെല്ലാം സൗജന്യമായി നല്‍കുന്നതോടൊപ്പം മടവീണ പാടശേഖരങ്ങളെ പുനര്‍നിര്‍മിക്കാനും സര്‍ക്കാര്‍ സഹായം നല്‍കി. മുഴുവന്‍ കൃഷിക്കാരുടേയും കേന്ദ്ര സംസ്ഥാന ഇന്‍ഷ്വറന്‍സ് തുകയും നല്‍കി കഴിഞ്ഞു. ഇപ്പോള്‍ കൃഷി ചെയ്യുന്ന ഭൂരിഭാഗം പാടശേഖരങ്ങളിലും ഇന്‍ഷ്വറന്‍സ് പരിരക്ഷ ഉറപ്പാക്കിയെന്നും അദ്ദേഹം പറഞ്ഞു.