Wednesday
23 May 2018

യുവജനങ്ങളെയും കര്‍ഷകരെയും നിരാശപ്പെടുത്തുന്ന ബജറ്റ്; ജി എസ് ടി സംസ്ഥാനങ്ങളെ പാപ്പരാക്കും

By: Web Desk | Thursday 1 February 2018 10:58 PM IST

പി എ വാസുദേവന്‍

കേന്ദ്ര ധനകാര്യമന്ത്രി അരുണ്‍ ജയ്റ്റ്‌ലി ഇന്ന് അവതരിപ്പിച്ച ബജറ്റ് യുവജനങ്ങളെയും കര്‍ഷകരെയും നിരാശപ്പെടുത്തുന്നതും ജി എസ് ടി നടപ്പിലാക്കിയതിലെ പരിചയക്കുറവ് സംസ്ഥാനങ്ങളെ പാപ്പരാക്കിയതായി വ്യക്തമാക്കുന്നതുമാണ്.
ഇന്ത്യയിലെ തൊഴില്‍ മേഖലയില്‍ പ്രവര്‍ത്തിക്കുന്നവരില്‍ 60 ശതമാനവും 30 വയസില്‍ താഴെയുള്ളവരാണ്. അവര്‍ക്ക് തൊഴില്‍ നല്‍കാനുള്ള പ്രത്യേക സൂചനകളൊന്നും ബജറ്റില്‍ കാണിക്കുന്നതിന് ധനകാര്യ മന്ത്രിക്ക് കഴിഞ്ഞിട്ടില്ല.
ഇതിന് പ്രധാന കാരണം നോട്ട് നിരോധനവും അതേ തുടര്‍ന്നുണ്ടായ ഉത്പാദന കുറവുമാണ്. കറന്‍സിയുടെ വിതരണം കുറഞ്ഞപ്പോള്‍ തൊഴില്‍ കുറഞ്ഞു. അതുവഴി വരുമാനത്തിലും ഇടിവുണ്ടായി. നോട്ടിന്റെ സര്‍ക്കുലേഷന്‍ പിന്നെയും കുറഞ്ഞതുവഴി വില്‍പനയും വരുമാനവും ക്രയവിക്രയ ശേഷി കുറഞ്ഞു. ഇത്തരത്തിലുണ്ടായ ചാക്രിക സ്ഥിതി സാമ്പത്തികാവസ്ഥയെ തകര്‍ത്തതുമൂലം തൊഴില്‍ മേഖലയെ രക്ഷിക്കാന്‍ സാധിച്ചില്ല എന്ന് ഈ ബജറ്റ് വ്യക്തമാക്കുന്നു.
താഴേത്തട്ടില്‍ വികസനം എത്തിക്കുമെന്ന മോദിയുടെ വാക്കുകളും വിശ്വസനീയമല്ല. വികസനം 7.1ശതമാനം വളര്‍ച്ച കൈവരിച്ചു എന്നു പറയുന്നതല്ലാതെ അത് ജനങ്ങളിലേക്ക് എങ്ങനെ എത്തി എന്ന് വ്യക്തമാക്കുന്നില്ല. അനുഭവം മറിച്ചാണ്. അടുത്ത വര്‍ഷം വളര്‍ച്ച 7.5ലേക്ക് എത്തുമെന്ന് പറയുന്നതല്ലാതെ ഇതിനായി പ്രത്യേക സാമ്പത്തിക പദ്ധതികള്‍ ഒന്നും ബജറ്റില്‍ നിര്‍ദ്ദേശിച്ചിട്ടില്ല.
കാര്‍ഷിക മേഖലക്ക് പണം നീക്കിവെച്ചത് നല്ല കാര്യമാണെങ്കിലും കൃഷി അനുബന്ധ മേഖലകളെ അതില്‍ ഉള്‍പ്പെടുത്തിയിട്ടുണ്ടോ എന്ന് വ്യക്തമാക്കിയിട്ടില്ല. ഏതു മേഖലക്ക് എത്ര തുക വീതം നല്‍കും എന്ന് വ്യക്തമാക്കാത്തതിനാല്‍ ഇതും തെരഞ്ഞെടുപ്പ് മുന്നില്‍ കണ്ടുള്ള പ്രഖ്യാപന പ്രഹസനം മാത്രമായി മാറിയേക്കാം.
കാര്‍ഷിക മൂല്യവര്‍ധനവിനെക്കുറിച്ചും അതിന്റെ അനുബന്ധ ഉത്പാദന-വിതരണ മേഖലകളെക്കുറിച്ചും ബജറ്റില്‍ സൂചനകളില്ല. അതുകൂടി കണക്കിലെടുത്താല്‍ മാത്രമെ കൃഷി മെച്ചപ്പെടുമോ എന്ന് പറയാനാകൂ. താഴേത്തട്ടിലേക്ക് വികസനം എത്തിക്കുന്നതിന്റെ വിശദാംശങ്ങളൊന്നും ബജറ്റില്‍ വ്യക്തമാക്കിയിട്ടില്ല.
ഗ്രാമീണ കാര്‍ഷിക മേഖലയില്‍ ഉത്പാദനം വര്‍ധിപ്പിക്കുകയും പുതിയ വിപണന തന്ത്രങ്ങള്‍ കൊണ്ടുവരികയും ചെയ്താല്‍ മാത്രമെ കൃഷി അനുബന്ധ മേഖലകളെ രക്ഷിക്കാന്‍ സാധിക്കൂ. അല്ലെങ്കില്‍ ഇപ്പോഴത്തെ പോലെ കര്‍ഷകന് ആവശ്യത്തിന് വില കിട്ടാതെയും ഉപഭോക്താവ് വലിയ വില നല്‍കേണ്ടിയും വരും. ഇടനിലക്കാരെ നിയന്ത്രിക്കുന്നതിനുള്ള പദ്ധതികളുടെ വിശദീകരണം ബജറ്റില്‍ ഉള്‍പ്പെടുത്താത്തത് വലിയ കുറവു തന്നെയാണ്.
മിനിമം താങ്ങുവില (എംഎസ് പി) നടപ്പിലാക്കുമെന്നത് നല്ല കാര്യമാണെങ്കിലും ഉത്പാദനം കണക്കാക്കിയുള്ള വിലക്ക് കൃത്യത കണ്ടെത്തുന്നതിന് നടപടികള്‍ ആവിഷ്‌ക്കരിക്കേണ്ടതുണ്ട്. 2022 ആകുമ്പോള്‍ കര്‍ഷകന്റെ വരുമാനം ഇരട്ടിയാകും എന്നു പറയുന്നണ്ടെങ്കിലും ഒരോ വര്‍ഷത്തെയും വളര്‍ച്ച കണക്കാക്കുകയോ അതിന് ബജറ്റ് നിര്‍വ്വഹണം കാര്യക്ഷമമാക്കുകയോ ചെയ്യേണ്ടി വരും. ഇതിലും വ്യക്തത ആവശ്യമാണ്. എന്നാല്‍ ഈ ബജറ്റ് അത്തരം സാങ്കേതിതകളിലേക്ക് നീണ്ടു നില്‍ക്കുന്നില്ല. കൃഷിയില്‍ 4.5 ശതമാനം വളര്‍ച്ചയുണ്ടായാല്‍ മാത്രമെ കാര്‍ഷികമേഖലക്ക് പിടിച്ചുനിലനില്‍ക്കാന്‍ കഴിയൂ.
ചുരുക്കത്തില്‍ അരുണ്‍ ജറ്റ്‌ലിയുടെ ബജറ്റ് നല്‍കുന്നത് ചില സൂചകങ്ങള്‍ മാത്രമാണ്. അതൊരിക്കലും യാഥാര്‍ഥ്യമാകുമെന്ന് പ്രതീക്ഷിക്കാനാവില്ല. നിര്‍വ്വഹണം പൂര്‍ത്തിയായാല്‍ മാത്രമെ വാഗ്ദാനത്തിന് പ്രസക്തിയുള്ളു എന്ന് വ്യക്തം.
സര്‍ക്കാര്‍ കുറച്ചും ഭരണം കൂടുതലും (മിനിമം ഗവണ്‍മെന്റ് ആന്‍ഡ് മാക്‌സിമം ഗവേണന്‍സ്) എന്ന പ്രധാനമന്ത്രിയുടെ വാഗ്ദാനത്തിനും അപ്പോഴേ പ്രസക്തിയുള്ളു. ജി എസ് ടി വന്നതിന് ശേഷം സാമ്പത്തിക ഫെഡറലിസം നഷ്ടപ്പെട്ടു. ഇത് നികത്താന്‍ സംസ്ഥാനങ്ങള്‍ക്ക് സര്‍വീസ് മേഖലകളില്‍ അധിക നികുതി ചുമത്തേണ്ടി വരും. അതുവഴി ജനങ്ങളുടെ പഴി കേള്‍ക്കേണ്ടി വരിക സംസ്ഥാനങ്ങള്‍ക്ക് മാത്രമായി മാറും. ഡോ. തോമസ് ഐസക്കിന് മുന്‍കാലങ്ങളിലെപ്പോലെ ഭാവനാ സ്വാതന്ത്ര്യം ഇത്തവണ ബജറ്റില്‍ കുറവാണ്.
ജി എസ് ടി വന്നതിന് ശേഷം സംസ്ഥാനങ്ങളുടെ സാമ്പത്തിക സ്വാതന്ത്ര്യം പരിമിതപ്പെടുത്തിയത് അതതു സംസ്ഥാനങ്ങളുടെ വളര്‍ച്ചക്കും ക്ഷേമ പദ്ധതികള്‍ക്കുള്ള തുക കണ്ടെത്തുന്നതിനും വിനയായി മാറി.
പുതിയ അഗ്രോ പാര്‍ക്കുകളും മത്സ്യമേഖലയിലെ നിക്ഷേപവും മാത്രമാണ് അല്‍പം പ്രതീക്ഷ. ഗ്രാമീണ കര്‍ഷക ചന്തകള്‍ തുറക്കും എന്ന് പറയുന്നതല്ലാതെ കര്‍ഷകര്‍ക്കും തൊഴില്‍ മേഖലക്കും അത് എങ്ങനെ ഉണര്‍വ്വുണ്ടാക്കുമെന്നോ ഓരോ മേഖലക്കും നീക്കിവെച്ച തുക എത്രയെന്നോ വ്യക്തമാക്കാത്തതും കേന്ദ്ര ബജറ്റിന്റെ പരിമിതിയാണ്.
തെരഞ്ഞെടുപ്പിന് മുന്നോടിയായുള്ള ഒരു അഭ്യാസം മാത്രമാണ് അരുണ്‍ ജറ്റ്‌ലി നടത്തിയിരിക്കുന്നത്. മുന്‍കാലങ്ങളിലെ പ്പോലെ അക്കങ്ങളുടെ ബജറ്റായി മാറി വെളിച്ചെണ്ണക്ക് 30 ശതമാനം ജി എസ് ടി ചുമത്തിയത് ഉപയോഗം കുറയ്ക്കുന്നതിനുള്ള തന്ത്രമായി വേണം കാണാന്‍. മിക്കവാറും എല്ലാ നിത്യേപയോഗ സാധനങ്ങളുടെയും വില വര്‍ധിക്കുന്നു. അതായത് ഒരു ശരാശരി പൗരന്റെ യഥാര്‍ഥ വരുമാനം കുറയും. ഇത് എല്ലാ മേഖലയിലെയും ജീവിതത്തെ വിപരീതമായി ബാധിക്കുകയും ചെയ്യും.