Friday
18 Aug 2017

നിയമങ്ങളും സ്ഥാപനങ്ങളും നടപടികളും നിരവധി: അഴിമതി നിര്‍ബാധം തുടരുന്നു

By: Web Desk | Saturday 12 August 2017 12:21 PM IST

sreeeniകെ കെ ശ്രീനിവാസന്‍

സ്വതന്ത്ര ഇന്ത്യ: മഹാകോടികളുടെ അഴിമതി റിപ്പബ്ലിക്  (ഭാഗം രണ്ട്) 

ദുര്‍ബല ജനാധിപത്യ വ്യവസ്ഥയുടെ ഗണത്തിലാണ് പാകിസ്ഥാന്‍. എന്നിട്ടും അവിടെ അഴിമതിയ്‌ക്കെതിരെ ചടുലമായ നീതിന്യായ ഇടപെടലുകള്‍. ഇവിടെയാണ് ഇന്ത്യന്‍ ജനാധിപത്യവ്യവസ്ഥയില്‍ അഴിമതി പാതകമല്ലാതാകുന്നതും ദുര്‍ബല പാക് ജനാധിപത്യ വ്യവസ്ഥ അഴിമതി വിരുദ്ധപാതയില്‍ അതിന്റെ അചഞ്ചല സ്ഥാനം അടയാളപ്പെടുത്തുന്നതും. ഇന്ത്യന്‍ ജനാധിപത്യവ്യവസ്ഥയുടെ നടത്തിപ്പുകാര്‍ ലജ്ജിക്കണം

രാജ്യത്ത് 3,500ഓളം അഴിമതി കേസുകള്‍ വിവിധ കോടതികളില്‍ കെട്ടിക്കിടക്കുന്നുണ്ടെന്ന് മുഖ്യ വിജിലന്‍സ് കമ്മിഷ്ണറുടെ 2016 ഫെബ്രുവരിയിലെ റിപ്പോര്‍ട്ട്. ഇതില്‍ 3,000ത്തോളം കുറ്റപത്രം സമര്‍പ്പിച്ച വിചാരണക്കേസുകളാണ്. 30 വര്‍ഷം പിന്നിട്ടിട്ടും വിചാരണ പൂര്‍ത്തീകരിക്കാത്ത അഴിമതി കേസുകളുണ്ട്. എന്തിനധികം അഴിമതിക്കേസുകളുടെ പ്രാഥമിക നടപടികള്‍ പൂര്‍ത്തീകരിക്കപ്പെടുന്നതിനുപോലും ഏഴു മുതല്‍ എട്ടു വര്‍ഷം വരെ കാലതാമസമുണ്ടെന്നും റിപ്പോര്‍ട്ട് പറയുന്നു.

അഴിമതിക്കേസുകള്‍ തീര്‍പ്പുകല്‍പ്പിക്കുന്നതിനുള്ള കാലതാമസത്തിനിടയില്‍ കേസിലുള്‍പ്പെട്ടവര്‍ മരണപ്പെടുന്നു. കേരളത്തിലെ ലാവ്‌ലിന്‍ കേസില്‍ രണ്ട് പ്രതികള്‍ മരിച്ചു. വര്‍ഷങ്ങളോളം നീണ്ടുനിന്ന അനധികൃത സ്വത്ത് സമ്പാദനക്കേസില്‍ വിചാരണ പൂര്‍ത്തീകരിക്കപ്പെടും മുമ്പേ തമിഴ്‌നാട് മുഖ്യമന്ത്രിയായിരുന്ന ജയലളിത മരണമടഞ്ഞു. ഈ ദിശയില്‍ ഇത് ചുരുക്കം ചില ഉദാഹരണങ്ങള്‍ മാത്രം. കുറ്റപത്രം സമര്‍പ്പിക്കപ്പെട്ട് വിചാരണ വര്‍ഷങ്ങള്‍ നീളുന്നു. കോടികളുടെ അഴിമതി നടത്തിയവര്‍ ജാമ്യമെടുത്ത് നാട്ടില്‍ വിലസുന്നു. ചിലര്‍ നാടുവിടുന്നു. അഴിമതിക്കാര്‍ക്ക് നാടുവിടാന്‍ ഇന്ത്യന്‍ ജനാധിപത്യവ്യവസ്ഥയുടെ നടത്തിപ്പുകാര്‍ തന്നെ അവസരമൊരുക്കികൊടുക്കുന്നു.

1987ലെ അഴിമതി നിരോധന നിയമമുണ്ട്. സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍. സെന്‍ട്രല്‍ വിജിലന്‍സ് കമ്മിഷന്‍. എല്ലാ മന്ത്രാലയങ്ങളിലും സര്‍ക്കാര്‍ സ്ഥാപനങ്ങളിലും മുഖ്യ വിജിലന്‍സ് ഓഫീസര്‍. സിവില്‍ സര്‍വീസ് പെരുമാറ്റ ചട്ടങ്ങള്‍, സംസ്ഥാനങ്ങളില്‍ വിജിലന്‍സ് വിങ്, ലോകായുക്ത, ഉപേേലാകായുക്ത ഇപ്പറഞ്ഞ ഭരണ സംവിധാനങ്ങളെല്ലാം അഴിമതി ഇല്ലായ്മ ചെയ്യുകയെന്നതിലാണ് വ്യാപൃതരായിട്ടുള്ളത്. ഈ സംവിധാനങ്ങള്‍ക്കായി പൊതുഖജനാവില്‍ നിന്ന് കോടിക്കണക്കിന് രൂപ ചെലവിടുന്നു. പക്ഷെ അഴിമതി ഇല്ലായ്മ ചെയ്യുന്നത് പോകട്ടെ ഒരു തരിമ്പെങ്കിലും അഴിമതി കുറയ്ക്കുന്നതില്‍ കെടുകാര്യസ്ഥതയിലും അനാസ്ഥയിലും രാഷ്ട്രീയ എക്‌സിക്യൂട്ടീവിന്റെ പിടിയിലകപ്പെട്ട ഈ സംവിധാനങ്ങള്‍ അതീവ ദയനീയമായി പരാജയപ്പെടുകയാണ്.

ഇന്ത്യന്‍ ജനാധിപത്യത്തിന്റെ മഹത്വം കൊട്ടിഘോഷിക്കപ്പെടുമ്പോഴും അഴിമതിയ്‌ക്കെതിരെയുള്ള തക്കതായ ശിക്ഷ തക്ക സമയത്ത് ലഭിക്കുന്നില്ലെന്നത് ദൗര്‍ഭാഗ്യകരമാണ്. തൊട്ട് അയല്‍രാജ്യമായ പാകിസ്ഥാന്റെ കാര്യമെടുക്കുക. ഏറ്റവും ഒടുവില്‍ അവിടെ പ്രധാനമന്ത്രി നവാസ് ഷെരീഫ് രാജിവെച്ചു. പനാമ പേപ്പര്‍ വിവാദത്തില്‍ നവാസ് ഷെരീഫിന്റെ പേരുള്‍പ്പെട്ടു. തുടര്‍ന്ന് അദ്ദേഹത്തിനെതിരെ അഴിമതിക്കേസ്. കാലവിളംബമില്ലാതെ സമയബന്ധിതമായി കോടതി വിധി. ഷെരീഫ് അഴിമതിക്കാരനാണെന്ന് കോടതിയുടെ ശരിവയ്ക്കല്‍. പിന്നെ അമാന്തിച്ചില്ല. നവാസ് ഷെരീഫിന്റെ രാജി. ദുര്‍ബല ജനാധിപത്യ വ്യവസ്ഥയുടെ ഗണത്തിലാണ് പാകിസ്ഥാന്‍. എന്നിട്ടും അവിടെ അഴിമതിയ്‌ക്കെതിരെ ചടുലമായ നീതിന്യായ ഇടപെടലുകള്‍. ഇവിടെയാണ് ഇന്ത്യന്‍ ജനാധിപത്യവ്യവസ്ഥയില്‍ അഴിമതി പാതകമല്ലാതാകുന്നതും ദുര്‍ബല പാക് ജനാധിപത്യ വ്യവസ്ഥ അഴിമതി വിരുദ്ധപാതയില്‍ അതിന്റെ അചഞ്ചല സ്ഥാനം അടയാളപ്പെടുത്തുന്നതും. ഇന്ത്യന്‍ ജനാധിപത്യവ്യവസ്ഥയുടെ നടത്തിപ്പുകാര്‍ ലജ്ജിക്കണം.

2017ല്‍ ജനുവരിയില്‍ പുറത്തിറക്കിയ പുതിയ ചട്ടപ്രകാരം അഴിമതി കേസില്‍ അപ്പീലുകള്‍ ഉയര്‍ന്ന കോടതികളില്‍ നിലവിലുണ്ടെങ്കിലും ഉദ്യോഗസ്ഥര്‍ക്ക് ജോലിക്കയറ്റം നല്‍കാമെന്നാണ് കേന്ദ്ര പേഴ്‌സണല്‍ മന്ത്രാലയത്തിന്റെ നിലപാട്. അന്തിമവിധിയില്‍ അഴിമതി തെളിയിക്കപ്പെട്ടാല്‍ 48 മണിക്കൂറിനുള്ളില്‍ സസ്‌പെന്‍ഷന്‍ മാത്രം. അപ്പോഴും സര്‍വീസില്‍ നിന്ന് നീക്കം ചെയ്യപ്പെടുന്നില്ല. അന്തിമവിധി പ്രഖ്യാപിക്കപ്പെടുന്നതാകട്ടെ പലപ്പോഴും പതിറ്റാണ്ടുകള്‍ പിന്നിട്ട്. അത്രയും കാലവും ആ ഉദ്യോഗസ്ഥന്് സ്ഥാനക്കയറ്റവും ഒപ്പം ശമ്പളവും ആനുകൂല്യങ്ങളും. അന്തിമ വിധിയില്‍ അഴിമതി തെളിയിക്കപ്പെട്ടാല്‍ സ്ഥാനക്കയറ്റമില്ലാതാകും. സസ്‌പെന്‍ഷനിലുമാകും. അഴിമതിക്കാരനായ ഉദ്യോഗസ്ഥന്‍ അത്രയും കാലം കൈപ്പറ്റിയ ശമ്പളം പക്ഷേ തിരിച്ചുപിടിക്കുവാനുള്ള വ്യവസ്ഥകളേതുമില്ല. ഇത് സൂചിപ്പിക്കുന്നത് അഴിമതിയ്ക്ക് ചൂട്ടുപിടിക്കുന്ന വ്യവസ്ഥ കോട്ടമേതുമേല്‍ക്കാതെ തുടരന്നുവെന്നാണ്.

രാജ്യത്തില്‍ നിന്ന് കടല്‍കടന്ന് പോയിട്ടുള്ള അഴിമതിയിലൂടെ വാരിക്കൂട്ടിയ കള്ളപ്പണം സ്വിറ്റ്‌സര്‍ലണ്ടിലും മൗറീഷ്യസിലുമടക്കമുള്ള ബാങ്കുകളില്‍ കുമിഞ്ഞുകൂടുകയാണ്. സ്വിസ് ബാങ്കുകളിലെ നിക്ഷേപത്തില്‍ ഇന്ത്യ 88-ാം സ്ഥാനത്താണെന്ന് 2017 ജൂലായ് വരെയുള്ള കണക്കുകള്‍ പറയുന്നു. 2016 ഡിസംബര്‍ ആറു വരെ സ്വിസ് ബാങ്കുകളിലെ ഇന്ത്യന്‍ നിക്ഷേപം 23,000 കോടി. 2017 ജൂണ്‍ ആദ്യവാരത്തില്‍ ഗ്ലോബല്‍ കണ്‍വന്‍ഷന്‍ ഓണ്‍ ഓട്ടോമാറ്റിക് എക്‌സ്‌ചെഞ്ച് ഓഫ് ഇന്‍ഫര്‍മേഷന്‍ ഓണ്‍ ഫിനാന്‍ഷ്യല്‍ ട്രാന്‍സാക്ഷന്‍ എന്ന ഉടമ്പടി സ്വിറ്റ്‌സര്‍ലന്റ് അംഗീകരിച്ചിട്ടുണ്ട്. സാമ്പത്തിക ഇടപാടുകളുടെ വിവരങ്ങള്‍ മറ്റ് രാഷ്ട്രങ്ങളുമായി പങ്കുവെക്കുന്ന ആഗോള ഉടമ്പടിയാണിത്.
2016 നവംബര്‍ ഒന്നിന് ഇന്ത്യയും സ്വിറ്റ്‌സര്‍ലന്റും സമാനമായ കരാറില്‍ ഒപ്പിട്ടിട്ടുണ്ട്. സ്വയമേവ ഇന്ത്യയ്ക്ക് സ്വിസ് ബാങ്കുകളിലെ ഇന്ത്യക്കാരുടെ സാമ്പത്തിക ഇടപാടുകളെ പരിശോധിക്കാവുന്ന അവസരമാണ് ഈ ഉടമ്പടിയിലൂടെ കൈവന്നിട്ടുള്ളത്. 2019 സെപ്റ്റംബറില്‍ മാത്രമേ ഇത് നിലവില്‍ വരൂ. ഇത്തരം ഒരു ഉടമ്പടി 2016 ജൂണില്‍ തന്നെ സ്വിസ് സര്‍ക്കാര്‍ അംഗീകരിച്ചിട്ടുണ്ട്. പിന്നെ എന്തിനാണ് ഇന്ത്യ സ്വിസ് കരാര്‍ പ്രാബല്യത്തിലാക്കുന്നത് 2019 സെപ്റ്റംബര്‍ വരെ വൈകിപ്പിക്കുന്നത്? ഈ സമയത്തിനുള്ളില്‍ സ്വിസ് ബാങ്കുകളിലെ പണം ഇന്ത്യന്‍ നിക്ഷേപകര്‍ക്ക് സുരക്ഷിതമായ മറ്റ് രാജ്യങ്ങളിലേയ്ക്ക് മാറ്റുവാനുള്ള അവസരം സൃഷ്ടിച്ചുകൊടുക്കുക ഇതിന് പിന്നില്‍ പതിയിരിക്കുന്നത്.
2014-15 കാലയളവില്‍ 77,0000 ദശലക്ഷം ഡോളര്‍ കള്ളപ്പണം ഇന്ത്യയിലേയ്ക്ക് എത്തിയെന്ന് തിങ്ക് ടാങ്ക് ഗ്ലോബല്‍ ഫിനാന്‍ഷ്യല്‍ ഇന്റഗ്രിറ്റിയുടെ റിപ്പോര്‍ട്ട് പറയുന്നു. കള്ളപ്പണ നിക്ഷേപത്തിന് ശേഷം പ്രസ്തുത ബാങ്കില്‍ നിന്നുള്ള സാമ്പത്തിക രേഖ (പാര്‍ട്ടിസിപ്പേറ്ററി നോട്ടി : പി-നോട്ട്) യുടെ പിന്‍ബലത്തില്‍ കടല്‍ കടന്ന് പോയ കള്ളപ്പണം ഇന്ത്യയിലേയ്ക്ക് തന്നെ തിരിച്ചെത്തുകയാണ്. ഇത് ഇന്ത്യന്‍ ഓഹരി വിപണിയിലെത്തുന്നു. പി-നോട്ട് ഉപയോഗിച്ച് ഓഹരി വിപണിയില്‍ പണമിറക്കുന്ന നിക്ഷേപകന്റെ പേര് വെളിപ്പെടുത്തണമെന്നില്ല. വിദേശത്തുള്ള കള്ളപ്പണം പി-നോട്ടിലൂടെ തിരിച്ചെത്തിക്കുന്നതില്‍ മുഖ്യപങ്ക് വഹിക്കുന്നത് രാഷ്ട്രീയക്കാരും ഉദ്യോഗസ്ഥരും വ്യവസായികളും ബിസിനസുകാരും സിനിമക്കാരുമടങ്ങുന്ന വന്‍ കള്ളപ്പണ സംഘം. കള്ളപ്പണം തിരിച്ചെത്തിക്കുവാന്‍ 2016 തുടക്കത്തില്‍ സുപ്രിം കോടതി പ്രത്യേക അന്വേഷണ സംഘത്തെ നിയോഗിച്ചു. ഇക്കാര്യത്തില്‍ പക്ഷേ ആശാവഹമായ പുരോഗതി ഇനിയും പ്രകടമായിട്ടില്ല. കള്ളപ്പണം തിരിച്ചെത്തിക്കുമെന്ന് ഗീര്‍വാണം മുഴക്കിയ മോഡിയുടെ മലക്കംമറിച്ചിലിനും സമകാലിക ഇന്ത്യ സാക്ഷ്യം വഹിക്കുന്നു.

യുഎന്‍ പൊതുസഭയുടെ 58/4 പ്രമേയം അനുസരിച്ച് 2005 ഡിസംബര്‍ 14ന് നിലവില്‍ വന്നതാണ് അഴിമതി നിരോധന ഉടമ്പടി. 2016 ഡിസംബര്‍ 12 വരെ 140 രാഷ്ട്രങ്ങള്‍ ഈ ഉടമ്പടിയില്‍ ഒപ്പുവെച്ചിട്ടുണ്ട്. അഴിമതി, കൈക്കൂലി, ധനാപഹരണം, കള്ളപ്പണം വെളുപ്പിക്കല്‍, വ്യാപാര വാണിജ്യ ഇടപാടുകളിലെ ദല്ലാള്‍ പണം തുടങ്ങിയ ക്രിമിനല്‍ കുറ്റങ്ങള്‍ക്കെതിരെ രാഷ്ട്രങ്ങള്‍ നിതാന്ത ജാഗ്രത പുലര്‍ത്തേണ്ടതിന്റെ അനിവാര്യതയില്‍ ഊന്നിയിട്ടുള്ള വ്യവസ്ഥകളാണ് ഉടമ്പടിയുടെ ഉള്ളടക്കം. അഴിമതി രഹിതരും സത്യസന്ധരുമായ ഉദ്യോഗസ്ഥരെ സംരക്ഷിക്കുന്നതിനും സ്വകാര്യ മേഖലയിലേതടക്കമുള്ള അഴിമതി തടയുന്നതിനുമുള്ള വ്യവസ്ഥകളുമുണ്ട്.

സാമ്പത്തിക കുറ്റവാളികളെ നിയമത്തിന് മുന്നില്‍ കൊണ്ടുവരുന്നതില്‍ അംഗ രാഷ്ട്രങ്ങള്‍ക്കിടയില്‍ പരസ്പര നിയമ സഹായ സഹകരണവും ഉടമ്പടി മുന്നോട്ടുവെക്കുന്നു.2005 ഡിസംബര്‍ 5ന് ഇന്ത്യ ഈ ഉടമ്പടി ഒപ്പുവെച്ചു. ഇന്ത്യ ഇത് അംഗീകരിച്ചതാകട്ടെ 2011 മെയ് 9ന്. ഉടമ്പടി വ്യവസ്ഥകളുള്‍ക്കൊള്ളിച്ചുള്ള നിയമം പക്ഷേ ഇനിയും നിര്‍മ്മിക്കപ്പെട്ടിട്ടിെല്ലന്നുമാത്രം. ഇതിനിടെ 2013ല്‍ പാര്‍ലമെന്റിന്റെ ഇരു സഭകളും ലോക്പാല്‍ ബില്ല് പാസാക്കി. 2016ല്‍ ഈ ബില്ല് ഭേദഗതിയ്ക്കായി ലോകസഭയിലെത്തി. ഇപ്പോഴത് സ്റ്റാന്‍ഡിങ് കമ്മിറ്റിയുടെ പരിഗണനയിലാണ് എന്നതല്ലാതെ കാര്യമായ മാറ്റങ്ങളൊന്നുമുണ്ടായിട്ടില്ല. ഏഴു പതീറ്റാണ്ടു പിന്നിട്ട ഇന്ത്യന്‍ ജനാധിപത്യ വ്യവസ്ഥ അഴിമതിയുടെ റിപ്പബ്ലിക്കായി പൂര്‍വാധികം ശക്തിപ്പെടുമെന്ന് ചുരുക്കം.

(അവസാനിക്കുന്നില്ല)