Sunday
18 Feb 2018

ഇടുക്കിയിലെ പട്ടയനടപടികള്‍ വേഗത്തിലാക്കണം: സിപിഐ

By: Web Desk | Tuesday 13 February 2018 10:56 PM IST

നെടുങ്കണ്ടം: പട്ടയ വിതരണ നടപടികള്‍ വേഗത്തിലാക്കണമെന്നും തോട്ടം തൊഴിലാളികളുടെ ശമ്പളം പണമായി നല്‍കണമെന്നും സിപിഐ ഇടുക്കി ജില്ലാ സമ്മേളനം പ്രമേയത്തിലൂടെ ആവശ്യപ്പെട്ടു. ജില്ലയില്‍ ഏകദേശം ഒരു ലക്ഷത്തോളം പേര്‍ക്ക് പട്ടയം ഇനിയും ലഭിക്കാനുണ്ട്.
1984 മുതല്‍ വിവിധ കോടതി നടപടികളില്‍ കുടുങ്ങിയ പട്ടയ വിതരണം കാര്യക്ഷമമായി നടത്തിയത് കഴിഞ്ഞ എല്‍ഡിഎഫ് സര്‍ക്കാരാണ്. എന്നാല്‍ പിന്നീട് വന്ന യൂഡിഎഫ് ഗവണ്‍മെന്‍റ് മലയോര കര്‍ഷകരെ അവഗണിക്കുകയാണ് ഉണ്ടായത്.

2016-ല്‍ അധികാരത്തില്‍ വന്ന എല്‍ഡിഎഫ് സര്‍ക്കാരിന്‍റെ റവന്യു, വനം വകുപ്പുകളുടെ നേത്യത്വത്തില്‍ നിരവധി പട്ടയമേളകള്‍ നടത്തുന്നുണ്ടെങ്കിലും വന ഭൂമിയില്‍ പതിറ്റാണ്ടുകളായി വീടു വെച്ചും കൃഷി ചെയ്ത് ജീവിച്ചുവരുന്ന കര്‍ഷകര്‍ക്കും പട്ടണങ്ങളില്‍ പ്രവര്‍ത്തിക്കുന്ന സ്ഥാപനങ്ങളുടെ ഭൂമി്ക്കും പട്ടയം നല്‍കുവാനുള്ള നടപടികള്‍ സ്വീകരിക്കണമെന്ന് സമ്മേളനം ആവശ്യപ്പെട്ടു.

തോട്ടം മേഖലകളില്‍ ജോലി ചെയ്യുന്ന തൊഴിലാളികളുടെ ശമ്പളം ബാങ്കുകള്‍ വഴിയാക്കിയതോടെ പണം എടുക്കുന്നതിനായി തൊഴിലാളികളുടെ ഒരുദിവസത്തെ ജോലി നഷ്ടപ്പെടുത്തി ബാങ്കുകളില്‍ എത്തേണ്ട ഗതികേടിലായിരിക്കുകയാണ്. സംസ്ഥാന സര്‍ക്കാര്‍ പെയ്‌മെന്റ് ഓഫ് വേജസ് ആക്ട് പ്രകാരം വീണ്ടും തൊഴി ലാളി കള്‍ക്കുള്ള ശമ്പളം പണമായി നല്‍കുവാനുള്ള വിജ്ഞാപനം സംസ്ഥാന സര്‍ക്കാര്‍ ഉടനടി ഇറക്കണമെന്ന് പ്രമേയത്തിലൂടെ സിപിഐ ജില്ലാ സമ്മേളനം ആവശ്യപ്പെട്ടു.

നെടുങ്കണ്ടത്ത് കഴിഞ്ഞ നാലു ദിവസമായി നടന്നുവരുന്ന സമ്മേളനത്തിന് നാളെ കൊടിയിറങ്ങും. നാളെ രാവിലെ 10ന് പ്രതിനിധി സമ്മേളനം തുടരും. റവന്യൂ മന്ത്രി ഇ ചന്ദ്രശേഖരന്‍ സമ്മേളനത്തെ അഭിവാദ്യം ചെയ്യും. വൈകിട്ട് 3 ന് ജില്ലാ സെക്രട്ടറി തിരഞ്ഞെടുപ്പോടു കൂടി സമ്മേളനം അവസാനിക്കുന്നത്.

ഇന്ന് പ്രതിനിധി സമ്മേളനത്തെ അഭിവാദ്യം ചെയ്ത് എഐടിയുസി ജനറല്‍ സെക്രട്ടറി കെ പി രാജേന്ദ്രനും വനം വകുപ്പ് മന്ത്രി കെ രാജുവും സംസാരിച്ചു. ആദ്യകാല നേതാക്കളെ സംസ്ഥാന സെക്രട്ടറി കാനം രാജേന്ദ്രന്‍ ആദരിച്ചു. യോഗത്തില്‍ സ്വാഗതസംഘം ചെയര്‍മാന്‍ സി കെ കൃഷ്ണന്‍കുട്ടി അധ്യക്ഷത വഹിച്ചു.

Related News