Wednesday
21 Nov 2018

കുരുമുളക് ഇറക്കുമതി കര്‍ഷകര്‍ ദുരിതത്തില്‍

By: Web Desk | Thursday 25 January 2018 10:29 PM IST

ബേബി ആലുവ

കൊച്ചി: യാതൊരു നിയന്ത്രണവുമില്ലാത്ത ഇറക്കുമതി മൂലം കുരുമുളകിന് ആഭ്യന്തര വിപണിയിലുണ്ടാകുന്ന വിലയിടിവ് കര്‍ഷകരുടെ നട്ടെല്ലൊടിക്കുന്നു .ഇറക്കുമതി ചെയ്യുന്ന കുരുമുളകിന്റെ കുറഞ്ഞ വില 500 രൂപയാക്കി നിശ്ചയിച്ച് കേന്ദ്ര സര്‍ക്കാര്‍ ഉത്തരവിറക്കിയെങ്കിലും ഉത്തരവ് ലംഘിച്ച് അതിലും കുറഞ്ഞ വിലയ്ക്കാണ് ഇറക്കുമതി നടക്കുന്നത്. ഉത്തരവു കൊണ്ട് ഒരു പ്രയോജനവും കേരളത്തിലെ കൃഷിക്കാര്‍ക്ക് ഉണ്ടായില്ലെന്നു ചുരുക്കം.

വിയറ്റ്‌നാം, ബ്രസീല്‍, ഇന്തോനേഷ്യ, ശ്രീലങ്ക എന്നിവിടങ്ങളില്‍ നിന്നാണ് ഇന്ത്യയിലേക്ക് കുരുമുളക് ഇറക്കുമതി നടക്കുന്നത്. ഈ രാജ്യങ്ങളില്‍ കുരുമുളക് ഉത്പാദനം വളരെ കൂടുതലാണ്. ഇവിടങ്ങളില്‍ നിന്ന് ഇറക്കുമതി ചെയ്യുന്ന ഗുണമേന്മയില്ലാത്ത കുരുമുളക് നിലവാരത്തില്‍ മികച്ച സംസ്ഥാനത്തെ കുരുമുളകുമായി കൂട്ടിക്കലര്‍ത്തിയാണ് കയറ്റുമതി ചെയ്യുന്നത്. ഇതു മൂലം വിദേശത്ത് കേരളത്തിലെ ചരക്കിന്റെ മേന്മയ്ക്ക് ഇടിച്ചില്‍ തട്ടുന്നതോടൊപ്പം വിലയിടിവും സംഭവിക്കുന്നു. ഉത്തരേന്ത്യന്‍ വിപണിയിലും വിദേശ കുരുമുളക് സുലഭമായി വിറ്റഴിക്കുകയാണ്.ഇതോടെ കേരളത്തിലെ കുരുമുളക് ഉത്തരേന്ത്യന്‍ വിപണിക്ക് പുറത്താവുകയും ചെയ്തു.ഈ അവസ്ഥയില്‍ പൊറുതിമുട്ടിയപ്പോഴാണ് കുരുമുളക് കൃഷിക്കാര്‍ പരാതിയുമായി കേന്ദ്ര സര്‍ക്കാരിനെ സമീപിച്ചത്.ഒപ്പം, ഇറക്കുമതി കുരുമുളകിന് കുറഞ്ഞ വില (എംഐപി) പ്രഖ്യാപിക്കണമെന്ന് വാണിജ്യ മന്ത്രാലയത്തോട് സ്‌പൈസസ് ബോര്‍ഡിന്റെ ശുപാര്‍ശയുമുണ്ടായി. തുടര്‍ന്ന്, ഡിസംബര്‍ ആദ്യവാരത്തില്‍ കുരുമുളകിന്റെ കുറഞ്ഞ ഇറക്കുമതി വില 500 രൂപയായി നിജപ്പെടുത്തി അടിയന്തര പ്രാധാന്യത്തോടെ സര്‍ക്കാര്‍ ഉത്തരവുമിറങ്ങി. തുടക്കത്തില്‍ ഇറക്കുമതിക്ക് അല്പം ഇടിച്ചിലുണ്ടാവുകയും സംസ്ഥാനത്തെ കുരുമുളകിന്റെ വിലയില്‍ ചെറിയ വര്‍ദ്ധനവുണ്ടാവുകയും ചെയ്‌തെങ്കിലും വീണ്ടും വിപണി ഇറക്കുമതി ലോബിയുടെ കൈകളിലായി.ഇപ്പോള്‍, ഇറക്കുമതി കുരുമുളകിന്റെ വില കിലോഗ്രാമിന് 400 രൂപയാണ്.വിദേശ കുരുമുളകിന്റെ ഉത്പാദനം അവിടങ്ങളില്‍ വല്ലാതെ വര്‍ദ്ധിക്കുന്നതു കൊണ്ട് എട്ടു ശതമാനം ഇറക്കുമതി തീരുവ എന്നത് അവര്‍ ഗൗരവമായി കാണുന്നില്ല.

വില എത്ര കുറച്ചു വിറ്റാലും അവര്‍ക്ക് പരിക്കേല്‍ക്കുകയുമില്ല. ദുരിതം കേരളത്തിലെ കൃഷിക്കാര്‍ക്കാണ്. എംആര്‍പി നിശ്ചയിച്ച് ഉത്തരവിറക്കിയതല്ലാതെ അത് പാലിക്കുന്നുണ്ടോ എന്ന് കേന്ദ്ര സര്‍ക്കാര്‍ അന്വേഷിച്ചിട്ടുമില്ല. ഒരു വര്‍ഷത്തിനുള്ളില്‍ കുരുമുളകിന് 35 ശതമാനം വിലയിടിവാണുണ്ടായതെന്ന് കര്‍ഷകര്‍ പറയുന്നു. ആസിയാന്‍ രാജ്യങ്ങളാണ് കുരുമുളക് ഉത്പാദിപ്പിക്കുന്നത്. എന്നാല്‍, ഇവിടങ്ങളില്‍ നിന്നുള്ള ചരക്ക് ഇന്ത്യന്‍ വിപണിയിലെത്തുന്നത് ശ്രീലങ്ക വഴിയാണ് .ദക്ഷിണേന്ത്യന്‍ സ്വതന്ത്രവ്യാപാര കരാറിന്റെ അടിസ്ഥാനത്തില്‍ ശ്രീലങ്കയില്‍ നിന്നുള്ള ഇറക്കുമതിക്ക് എട്ട് ശതമാനം തീരുവയേയുള്ളു. ഈ ആനുകൂല്യമാണ് ശ്രീലങ്ക അടക്കമുള്ള രാജ്യങ്ങളും ഇന്ത്യയിലെ കുത്തകകളും മുതലാക്കുന്നത്.രാജ്യാന്തര വിപണിയില്‍ കുരുമുളക് ഉത്പാദക രാജ്യങ്ങള്‍ വിലക്കുറച്ചാണ് കയറ്റുമതിക്ക് കരാര്‍തേടുന്നത്.ഇന്ത്യന്‍ കുത്തകകള്‍ അവ വന്‍തോതില്‍ ഇറക്കുമതി ചെയ്ത് കൊള്ളലാഭം കൊയ്യുന്നു.

അടുത്ത അവസരത്തില്‍, ഇന്ത്യയുടെ കയറ്റുമതി നിരക്ക് ഒരു ടണ്‍ കുരുമുളകിന് 7000 ഡോളറായി നില്‍ക്കെ വിയറ്റ്‌നാം കുരുമുളക് ശ്രീലങ്ക വഴി ഇന്ത്യയിലേക്കു വന്നത് 3500 ഡോളര്‍ നിരക്കിലാണെന്ന് കര്‍ഷകര്‍ ചൂണ്ടിക്കാട്ടുന്നു. ആഭ്യന്തര വിപണിയെ തകര്‍ക്കുക എന്ന ഗൂഢലക്ഷ്യത്തോടെയുള്ള നീക്കങ്ങള്‍ക്കു പിന്നില്‍ വന്‍കിട കയറ്റുമതി ലോബിയും കേന്ദ്ര സര്‍ക്കാരും തമ്മിലുള്ള ഒത്തുകളിയുണ്ടെന്ന് അവര്‍ ആരോപിക്കുന്നു.