Tuesday
19 Jun 2018

കേരളത്തെ ഐടി ഹബ് ആക്കാന്‍ ഇന്റലുമായി ധാരണ

By: Web Desk | Monday 6 November 2017 10:07 PM IST

തിരുവനന്തപുരം: ഐടി മേഖലയിലെ സോഫ്റ്റ്‌വെയര്‍ രംഗത്ത് മികച്ച വളര്‍ച്ച കൈവരിച്ച കേരളം, ഹാര്‍ഡ് വെയര്‍ ഉല്‍പ്പാദന മേഖലയിലും ചുവടുറപ്പിക്കുന്നു. കേരളത്തില്‍ വ്യാവസായിക അടിസ്ഥാനത്തില്‍ ലാപ്‌ടോപ്പുകള്‍, സര്‍വര്‍ ഘടകങ്ങള്‍ തുടങ്ങിയവ ഉല്‍പാദിപ്പിച്ച് ലോക വിപണിയില്‍ ഇടം നേടുന്നതിനായുള്ള പുതിയ ചുവടുവെയ്പ്പിന് തുടക്കം കുറിച്ചു. ഇതിന്റെ ഭാഗമായി പ്രമുഖ ആഗോള ഹാര്‍ഡ്‌വേര്‍ കമ്പനിയായ ഇന്റല്‍ ഇന്ത്യയുമായും പ്രമുഖ സാങ്കേതിക സേവന കമ്പനിയായ യുഎസ്ടി ഗ്ലോബലുമായും കേരള സര്‍ക്കാര്‍ ധാരണാപത്രം ഒപ്പിട്ടു. സംസ്ഥാനത്തെ ഇലക്‌ട്രോണിക് ഹാര്‍ഡ്‌വേര്‍ വ്യവസായങ്ങളുടെ ആവാസ വ്യവസ്ഥ വികസിപ്പിച്ചെടുക്കുന്നതിനുളള പദ്ധതി കേരള ഹാര്‍ഡ്‌വേര്‍ മിഷന്‍, കെല്‍ട്രോണ്‍ എന്നിവയുമായി ചേര്‍ന്ന് ഇന്റലും യുഎസ്ടി ഗ്ലോബലും തയ്യാറാക്കും. ലാപ്‌ടോപ്പുകള്‍, സര്‍വര്‍ ഘടകങ്ങള്‍ മുതലായവ ഉല്‍പാദിപ്പിച്ച് വിപണനം ചെയ്യുന്നതിന് കേരളത്തിന് വലിയ സാധ്യതകള്‍ ഉണ്ടെന്നാണ് കണക്കാക്കുന്നത്. പഠന റിപ്പോര്‍ട്ട് ഡിസംബര്‍ 31ന് മുമ്പ് സര്‍ക്കാരിന് സമര്‍പ്പിക്കും.
മുഖ്യമന്ത്രി പിണറായി വിജയന്റെ സാന്നിധ്യത്തിലാണ് ഇന്റലുമായും യുഎസ്ടി ഗ്ലോബലുമായും സംസ്ഥാന ഐടി വകുപ്പ് ധാരണാപത്രം ഒപ്പിട്ടത്. മുഖ്യമന്ത്രിയുടെ ഓഫീസില്‍ നടന്ന ചടങ്ങില്‍ ഐടി സെക്രട്ടറി എം ശിവശങ്കര്‍, ഇന്റല്‍ ഇന്ത്യ മാര്‍ക്കറ്റിങ് വിഭാഗം എം ഡി പ്രകാശ് മല്യ, ഇന്റല്‍ ഇന്ത്യ സ്ട്രാറ്റജിക് ഡവലപ്‌മെന്റ് ഡയറക്ടര്‍ ജിതേന്ദ്ര ചദ്ദ, യുഎസ്ടി ഗ്ലോബല്‍ സെമി കണ്ടക്ടര്‍ ഡിവിഷന്‍ തലവന്‍ ഗില്‍റോയ് മാത്യു, ഹാര്‍ഡ്‌വേര്‍ മിഷന്‍ സ്‌പെഷ്യല്‍ ഓഫീസര്‍ ഡോ. ജയശങ്കര്‍ പ്രസാദ്, കെല്‍ട്രോണ്‍ എംഡി ഹേമലത തുടങ്ങിയവര്‍ പങ്കെടുത്തു. ഇലക്‌ട്രോണിക് ഹാര്‍ഡ്‌വേര്‍ വ്യവസായ പദ്ധതി നടപ്പാക്കാന്‍ സ്വകാര്യ കമ്പനികളുമായി ചേര്‍ന്ന് സംയുക്ത സംരംഭം ആരംഭിക്കാന്‍ സംസ്ഥാന സര്‍ക്കാര്‍ ഉദ്ദ്യേശിക്കുന്നുണ്ട്. ഇന്റല്‍, യുഎസ്ടി ഗ്ലോബല്‍ എന്നീ കമ്പനികളുടെ നിര്‍മാണ വൈദഗ്ധ്യം ഇതിനുവേണ്ടി പ്രയോജനപ്പെടുത്തും. ഈ രംഗത്ത് കേരളത്തിനുളള സാങ്കേതിക പോരായ്മകള്‍ കണ്ടെത്തി പരിഹരിക്കും.
കേരളത്തില്‍ ഹാര്‍ഡ്‌വേര്‍ വ്യവസായം വികസിപ്പിക്കുന്നതിന് സര്‍ക്കാര്‍ പ്രതിജ്ഞാബദ്ധമാണെന്ന് മുഖ്യമന്ത്രി പറഞ്ഞു. ഈ ലക്ഷ്യം നേടാനാണ് ഹാര്‍ഡ്‌വേര്‍ മിഷന്‍ രൂപീകരിച്ചത്. ഇന്റല്‍, യുഎസ്ടി ഗ്ലോബല്‍ എന്നിവയുമായി ഒപ്പിട്ട ധാരണാപത്രം ഈ ദിശയിലുളള പ്രധാന ചുവടുവയ്പ്പാണെന്ന് അദ്ദേഹം പറഞ്ഞു.