Saturday
18 Nov 2017

കള്ളപ്പണത്തില്‍ കരിവാളിച്ചുപോയ മോഡീമുഖം

By: Web Desk | Sunday 12 November 2017 1:00 AM IST

വിദേശരാജ്യങ്ങളില്‍ ഇന്ത്യാക്കാര്‍ നിക്ഷേപിച്ചിട്ടുള്ള കള്ളപ്പണം സംബന്ധിച്ച കഴിഞ്ഞ രണ്ട് വര്‍ഷത്തിനിടെയുണ്ടായ വെളിപ്പെടുത്തലുകള്‍ നരേന്ദ്രമോഡി സര്‍ക്കാരിന്റെ മുഖം കരിവാളിപ്പിക്കുന്ന ഒന്നാണ്. സര്‍ക്കാര്‍ മുഖം മിനുക്കാന്‍ അവലംബിക്കുന്ന മാര്‍ഗങ്ങളൊന്നും തന്നെ സാധാരണക്കാരന് സ്വീകാര്യമല്ലെന്നാണ് പ്രതിപക്ഷ പാര്‍ട്ടികള്‍ ആഹ്വാനം ചെയ്ത പ്രതിഷേധ ദിനത്തിലെ ജനപങ്കാളിത്തം വ്യക്തമാക്കുന്നത്. കള്ളപ്പണം സംബന്ധിച്ച ഏറ്റവും ഒടുവിലത്തെ വെളിപ്പെടുത്തലുണ്ടായത് പാരഡൈസ് പേപ്പേഴ്‌സിലൂടെയാണ്. വിദേശങ്ങളില്‍ കള്ളപ്പണം നിക്ഷേപിച്ചിട്ടുള്ള 714 ഇന്ത്യാക്കാരുടെ പേരുകളാണ് പാരഡൈസ് പേപ്പേഴ്‌സിന്റെ പട്ടികയിലുള്ളത്. ഇതില്‍ കേന്ദ്രമന്ത്രിയുടെ പേരും ഉള്‍പ്പെട്ടിട്ടുണ്ട്. ബിജെപി നേതാക്കള്‍, അവരുടെ ബന്ധുക്കള്‍, കോണ്‍ഗ്രസ് നേതാക്കള്‍ എന്നിവരുടെ പേരുകളും പട്ടികയിലുണ്ട്. പനാമ പേപ്പേഴ്‌സിലെപ്പോലെ അമിതാഭ്ബച്ചന്റെ പേര് പാരഡൈസ് പേപ്പേഴ്‌സിലുമുണ്ട്.
പനാമ പേപ്പേഴ്‌സിലുള്‍പ്പെട്ട കള്ളപ്പണക്കാരായ കുറ്റവാളികള്‍ക്കെതിരെ നടപടി സ്വീകരിക്കുമെന്നാണ് മോഡി സര്‍ക്കാര്‍ വ്യക്തമാക്കിയത്. പാരഡൈസ് പേപ്പേഴ്‌സിന്റെ കാര്യത്തിലും സമാനമായ നിലപാട് സ്വീകരിക്കുമെന്നാണ് കേന്ദ്ര സര്‍ക്കാര്‍ പറയുന്നത്. പനാമ പേപ്പേഴ്‌സ് പുറത്തുവിട്ട പട്ടികയിലുള്ള ഇന്ത്യാക്കാരുടെ പേരുകള്‍ സംബന്ധിച്ച് കേന്ദ്ര സര്‍ക്കാര്‍ മൗനം പാലിക്കുകയാണ്. ഈ പേരുകള്‍ പുറത്തുവിടണമെന്ന് സമ്മര്‍ദ്ദമേറിയപ്പോള്‍ മുദ്രവച്ച കവറിലാക്കി സുപ്രിം കോടതിയില്‍ സമര്‍പ്പിച്ചു. ഈ സീലുവച്ച കവര്‍ പൊട്ടിക്കരുതെന്നും ഇതിലെ ഉള്ളടക്കം മറ്റാരുമായും പങ്കുവയ്ക്കരുതെന്നുമുള്ള ആവശ്യം മുന്നോട്ടുവച്ചാണ് പട്ടിക കോടതിയില്‍ സമര്‍പ്പിച്ചത്. പനാമ പേപ്പറുകളിലെ പേരുകള്‍ രഹസ്യമാക്കിവയ്ക്കുന്നതിലൂടെ ആരെയാണ് കേന്ദ്ര സര്‍ക്കാര്‍ സംരക്ഷിക്കുന്നത്. കൂടാതെ കള്ളപ്പണം പുറത്തുകൊണ്ടുവരുന്നതിനും വിദേശങ്ങളില്‍ നിക്ഷേപിച്ചിട്ടുള്ള കള്ളപ്പണം രാജ്യത്ത് എത്തിക്കുന്നതിനുമായി എന്ത് നടപടിയാണ് സ്വീകരിച്ചതെന്ന് വ്യക്തമാക്കാന്‍ മോഡി സര്‍ക്കാര്‍ തയാറാകണം. വിദേശത്ത് നിക്ഷേപിച്ചിട്ടുള്ള കള്ളപ്പണം രാജ്യത്ത് എത്തിച്ച് പാവപ്പെട്ടവന്റെ ബാങ്ക് അക്കൗണ്ടുകളില്‍ 15 ലക്ഷം രൂപ വീതം നിക്ഷേപിക്കുമെന്നായിരുന്നു തെരഞ്ഞെടുപ്പ് പ്രചാരണ സമയത്ത് നരേന്ദ്രമോഡി വ്യക്തമാക്കിയിരുന്നത്. കൂടാതെ ജനങ്ങളില്‍ നിന്നും നികുതി ഈടാക്കാതെ അടുത്ത പത്ത് വര്‍ഷത്തേക്കുള്ള വികസന പദ്ധതികള്‍ നടപ്പാക്കാനും ഈ പണം മതിയാവോളമാണെന്നും മോഡി വ്യക്തമാക്കിയിരുന്നു. ഈ ഭീമമായ കള്ളപ്പണം തിരിച്ചുപിടിക്കുന്നതിനു പകരം സംഭവിച്ചത് മറിച്ചാണ്.
വിദേശത്ത് നിക്ഷേപിച്ചിട്ടുള്ള കള്ളപ്പണം തിരിച്ചുപിടിക്കുന്നതിനു പകരം വിദേശത്ത് നിക്ഷേപം നടത്താനുള്ള പരിധി രണ്ട് തവണ ഉയര്‍ത്തി. ഇത് പനാമ പേപ്പേഴ്‌സില്‍ ഉള്‍പ്പെട്ട സാമ്പത്തിക കുറ്റവാളികളുടെ കള്ളപ്പണം വെളുപ്പിക്കാനുള്ള മോഡി സര്‍ക്കാരിന്റെ തന്ത്രമാണ്. ഇത്തരത്തില്‍ കള്ളപ്പണം വെളുപ്പിച്ചശേഷം പനാമ പേപ്പറിലെ പട്ടിക പുറത്തുവിടും. ഇതോടെ കള്ളപ്പണ നിക്ഷേപം നിയമസാധുത ഉള്ളതാക്കി മാറ്റാനുള്ള സൗകര്യമാണ് മോഡി സര്‍ക്കാര്‍ ഒരുക്കുന്നത്. കള്ളപ്പണക്കാരെ സഹായിക്കാനുള്ള തന്ത്രമാണ് നോട്ട് നിരോധിക്കല്‍ നടപടിയിലൂടെയും മോഡി സര്‍ക്കാര്‍ സ്വീകരിച്ചത്.
സാധാരണക്കാരനെ കൊള്ളയടിക്കാനും കഷ്ടപ്പെട്ടുണ്ടാക്കിയ പണം ബാങ്കുകളില്‍ നിക്ഷേപിക്കാനുമുള്ള സമ്മര്‍ദ്ദമാണ് നോട്ട് പിന്‍വലിക്കല്‍ നടപടിയിലൂടെ സര്‍ക്കാര്‍ ലക്ഷ്യമിട്ടതെന്ന് കഴിഞ്ഞ ഒരു വര്‍ഷത്തിനിടെയുള്ള അനുഭവങ്ങളിലൂടെ സാധാരണക്കാരന് ബോധ്യപ്പെട്ടു. പല ഇനത്തിലായി ബാങ്കുകളും പാവപ്പെട്ടവനെ കൊള്ളയടിച്ചു. എന്നാല്‍ കള്ളപ്പണം വെളുപ്പിക്കാന്‍ തങ്ങളുടെ ആള്‍ക്കാര്‍ക്ക് സൗകര്യം മൊരുക്കുന്നതില്‍ മോഡി സര്‍ക്കാര്‍ വിജയിച്ചു. നാല് ലക്ഷം കോടി രൂപ കള്ളപ്പണം പുറത്തുകൊണ്ടുവരുമെന്ന് പറഞ്ഞ് മോഡിസര്‍ക്കാര്‍ ജനങ്ങളെ വിഡ്ഢികളാക്കി. ഈ പണം ബാങ്കുകളില്‍ എത്തില്ലെന്നായിരുന്നു സര്‍ക്കാരിന്റെ പ്രഖ്യാപനം. എന്നാല്‍ സംഭവിച്ചത് മറിച്ചായിരുന്നു. പിന്‍വലിച്ച നോട്ടുകളില്‍ 99 ശതമാനവും ബാങ്കുകളില്‍ തിരിച്ചെത്തി. ഇത്തരത്തില്‍ സ്വീകരിച്ച നോട്ടുകളുടെ പരിശോധന റിസര്‍വ് ബാങ്ക് ഇനിയും പൂര്‍ത്തിയാക്കിയിട്ടില്ല.
ബാങ്കുകളില്‍ നിക്ഷേപിച്ച കള്ളപ്പണവും വ്യാജനോട്ടുകളും സംബന്ധിച്ച് എഴുപതോളം കേസുകള്‍ ആര്‍ബിഐ പരിശോധിച്ചുവരുന്നതായാണ് പത്രറിപ്പോര്‍ട്ടുകള്‍ ചൂണ്ടിക്കാണിക്കുന്നത്. ഇത് ജനങ്ങളെ കബളിപ്പിക്കല്‍ മാത്രമാണ്. 2016 നവംബര്‍ എട്ടിനും 2017 മാര്‍ച്ചിനുമിടയിലുള്ള പത്രങ്ങള്‍ പരിശോധിച്ചാല്‍ കള്ളപ്പണവുമായി ബന്ധപ്പെട്ട ആയിരക്കണക്കിന് കേസുകളാണ് റിപ്പോര്‍ട്ട് ചെയ്തിട്ടുള്ളത്. ബിജെപി നേതാക്കളും അവരുടെ ബന്ധുക്കളുമാണ് ഇത്തരം നിക്ഷേപം നടത്തിയതില്‍ ഭൂരിഭാഗവും.
2000 രൂപനോട്ട് പുറത്തിറങ്ങിയ ഉടന്‍തന്നെ കോടികളുടെ നോട്ടുകളാണ് ബിജെപി നേതാക്കള്‍ക്കും അവരുടെ ബന്ധുക്കള്‍ക്കും ലഭിച്ചത്. ചുരുക്കിപ്പറഞ്ഞാല്‍ ബിജെപി നേതാക്കളുടെയും അവരുടെ ബന്ധുക്കളുടെയും കള്ളപ്പണം വെളുപ്പിക്കാനുള്ള തന്ത്രമായിരുന്നു നോട്ട് പിന്‍വലിക്കല്‍ നടപടി. അതുകൊണ്ടുതന്നെ ഇതുമായി ബന്ധപ്പെട്ട് വിശദീകരണങ്ങള്‍ നല്‍കാന്‍ സര്‍ക്കാര്‍ ബാധ്യസ്ഥമാണ്.
നോട്ട് പിന്‍വലിക്കല്‍ നടപടിയിലൂടെ ഏറെ ബുദ്ധിമുട്ടിലായ പാവപ്പെട്ട ജനങ്ങളുടെ മേലുള്ള മറ്റൊരു ഇരുട്ടടിയാണ് ജിഎസ്ടി നടപ്പിലാക്കല്‍ നടപടി. തെരഞ്ഞടുപ്പുകളില്‍ വോട്ട് നേടുന്നതിന് കള്ളപ്പണമൊഴുക്കാനുള്ള തന്ത്രങ്ങളാണ് മോഡി-അമിത്ഷാ ദ്വയം നടത്തുന്നത്. ഇതിനായി അവര്‍ ധാരാളം പണം സമ്പാദിക്കുകയും ചെയ്തു. ഇത്തരത്തിലുള്ള നെറികെട്ട പ്രവര്‍ത്തനങ്ങള്‍ക്ക് എങ്ങനെ മറുപടി നല്‍കണമെന്ന് ഇന്ത്യയിലെ ജനങ്ങള്‍ക്ക് അറിയാം.