Thursday
24 May 2018

പകയും വിദ്വേഷവും ആര്‍എസ്എസിന്റെ മുഖമുദ്ര

By: Web Desk | Wednesday 14 February 2018 10:10 PM IST

സംഘപരിവാര ശക്തികള്‍ക്കെതിരെ ശക്തമായ നിലപാട് സ്വീകരിച്ച നെഹ്‌റുവിനെ സ്വാഭാവികമായും വര്‍ത്തമാനകാല ഇന്ത്യന്‍ ഭരണാധികാരികള്‍ക്ക് ദഹിക്കാന്‍ പ്രയാസമാണ്. മറ്റേതൊരു കോണ്‍ഗ്രസ്സുകാരനെക്കാളും നെഹ്‌റുവിനോട് അടങ്ങാത്ത പകയും വിദ്വേഷവുമാണ് അവര്‍ വെച്ചുപുലര്‍ത്തുന്നത്. അതുകൊണ്ടുതന്നെയാണ് അദ്ദേഹത്തെ നിരാകരിക്കുന്നതിന് മോഡി ഭരണകൂടം എല്ലാവഴികളും തേടുന്നത്. നെഹ്‌റുവിനെ നിരാകരിക്കുകയെന്നാല്‍ മതേതര ജനാധിപത്യമൂല്യങ്ങളെകൂടി നിരാകരിക്കുകയെന്നതാണര്‍ത്ഥം

രാജ്യം വിഭജിക്കുന്ന സന്ദര്‍ഭത്തില്‍ പാകിസ്ഥാന്റെ ആവശ്യങ്ങളോട് ഗാന്ധിജി കാണിച്ച അനുഭാവപൂര്‍ണമായ നിലപാടാണ് ഹിന്ദുത്വശക്തികളെ പ്രകോപിപ്പിക്കുന്നതിനും അദ്ദേഹത്തെ കൊലപ്പെടുത്തുന്നതിനും ഇടയാക്കിയത്. നെഹ്‌റുവും അതേ പാത തന്നെയാണ് സ്വീകരിച്ചിരുന്നതെന്ന് ആര്‍എസ്എസിന്റെ ബുദ്ധിജീവിയായ രാകേഷ് സിഹ്‌ന കുറ്റപ്പെടുത്തുന്നു. മുസ്‌ലിംലീഗ് വക്താവായിരുന്ന സിയാവുദ്ദീന്‍മുഹമ്മദിനെ അലിഗഡ് സര്‍വകലാശാലയുടെ വൈസ് ചാന്‍സലറായി നിയോഗിച്ച അദ്ദേഹം, പഞ്ചാബ് യൂണിവേഴ്‌സിറ്റിയുടെ വി സിയായി ആര്‍എസ്എസിന്റെ മേധാവിയെ അവരോധിച്ചു എന്ന് തെറ്റിധരിച്ച് പഞ്ചാബ് മുഖ്യമന്ത്രിക്ക് കത്തയച്ചതായി രാജേഷ് സിഹ്‌ന കുറ്റപ്പെടുത്തുന്നു. ആര്‍എസ്എസ് മേധാവിയല്ലായിരുന്നുവെന്ന് അറിഞ്ഞപ്പോഴാണ് നെഹ്‌റുവിന് ആശ്വാസമായതെന്ന് സിഹ്‌ന പരിഹസിക്കുന്നു. ഗാന്ധി വധത്തിനുശേഷം ക്യാബിനറ്റ് തീരുമാനമൊന്നും ഇല്ലാതെ സംഭവത്തിന് പിന്നില്‍ ആര്‍എസ്എസ് ആണെന്ന മുന്‍വിധിയോടെ നിരോധിക്കുകയായിരുന്നുവെന്ന് സിഹ്‌ന കുറ്റപ്പെടുത്തുന്നു.

നെഹ്‌റുവിന്റെ അറിയപ്പെടാത്ത രചനകളില്‍ വളരെ പ്രധാനപ്പെട്ടതാണ് അദ്ദേഹം മുഖ്യമന്ത്രിമാര്‍ക്കെഴുതിയ കത്തുകള്‍. സ്വാതന്ത്ര്യം കിട്ടി ഏറെ താമസിയാതെ സംസ്ഥാന സര്‍ക്കാരുകളുടെ നടത്തിപ്പുകാര്‍ക്ക് ഓരോ ആഴ്ച ഇടവിട്ട് കത്തെഴുതുന്ന ശീലം അദ്ദേഹത്തിനുണ്ടായിരുന്നു. 1947 ഒക്‌ടോബര്‍ മുതല്‍ 1963 ഡിസംബര്‍ വരെ ഈ പരമ്പര തുടര്‍ന്നതായി പ്രശസ്ത ചരിത്രകാരനായ രാമചന്ദ്രഗുഹ പറയുന്നു. ഇന്ത്യയുടെയും ലോകത്തിന്റെയും പതിനാറ് കലാപകലുഷിത വര്‍ഷങ്ങളുടെ ചരിത്രത്തെ നെഹ്‌റു എങ്ങിനെ നോക്കിക്കാണുന്നുവെന്ന് ഈ കത്തുകളിലൂടെ മനസിലാക്കാമെന്ന് രാമചന്ദ്രഗുഹ വിശദീകരിക്കുന്നുണ്ട്. ഒരു മതേതര രാജ്യത്ത് ന്യൂനപക്ഷങ്ങളെ തുല്യപൗരന്മാരായി കണക്കാക്കണമെന്നും അവര്‍ക്ക് സുരക്ഷിതരാണെന്ന ബോധം ഉണ്ടാക്കണമെന്നും അദ്ദേഹം ശഠിച്ചു. ഈ വിഷയത്തില്‍ നെഹ്‌റു മുഖ്യമന്ത്രിമാര്‍ക്കെഴുതിയ ഒരു കത്തിലെ പ്രസക്ത ഭാഗങ്ങള്‍ ചുവടെ ചേര്‍ക്കുന്നു. 1947 ഒക്‌ടോബര്‍ 15-ാം തീയതി എഴുതിയ കത്തില്‍നിന്ന്: ”കേന്ദ്രസര്‍ക്കാര്‍ ഏതോ പ്രകാരത്തില്‍ ദൗര്‍ബല്യം കാണിക്കുകയാണെന്നും മുസ്‌ലിങ്ങളോട് പ്രീണന നയം കൈകൊള്ളുന്നുവെന്നുമുള്ള തോന്നല്‍ രാജ്യത്ത് വ്യാപിച്ചിട്ടുണ്ടെന്ന് എനിക്കറിയാം. അത് ശുദ്ധ അസംബന്ധമാണ്. ഇവിടെ മുസ്‌ലിം ന്യൂനപക്ഷം എണ്ണത്തില്‍ വളരെ വലുതാണ്. വേണമെന്നുണ്ടെങ്കില്‍പോലും മറ്റെവിടേക്കും പോകാന്‍ അവര്‍ക്ക് കഴിയില്ല. പാകിസ്ഥാനില്‍നിന്നും എന്തുതരം പ്രകോപനമുണ്ടായാലും അവിടെ അമുസ്‌ലിങ്ങളോട് എന്തുമാത്രം അമാന്യമായി പെരുമാറിയാലും ഇവിടെ നാം ന്യൂനപക്ഷങ്ങളോട് സംസ്‌കാരസമ്പന്നതയോടെ പെരുമാറിയേ പറ്റൂ. ഒരു ജനാധിപത്യ ഭരണകൂടത്തില്‍ പൗരന്മാര്‍ക്ക് ലഭ്യമാക്കേണ്ട അവകാശവും സുരക്ഷയും അവര്‍ക്ക് നല്‍കണം. അതില്‍ നാം പരാജയപ്പെട്ടാല്‍ ഉണങ്ങാത്ത മുറിവായിരിക്കും ബാക്കിയാവുക. ക്രമേണ ആ മുറിവ് രാഷ്ട്രഗാത്രത്തെയാകെ വിഷലിപ്തമാക്കുകയും ഒരുപക്ഷെ നശിപ്പിക്കുകയും ചെയ്യും…. ഇങ്ങനെ തുടരുന്ന ഈ കത്തില്‍ വര്‍ഗീയ രാഷട്രീയത്തില്‍നിന്നും രാജ്യത്തെ മോചിപ്പിക്കുന്നതിനും മുസ്‌ലിങ്ങളുടെ സുരക്ഷിതത്വം ഉറപ്പുവരുത്തുന്നതിനും വേണ്ട നടപടികള്‍ കൈക്കൊള്ളണമെന്ന് അദ്ദേഹം പ്രവിശ്യഭരണാധികാരികളെ ഓര്‍മപ്പെടുത്തുന്നു. 1947 ഡിസംബര്‍ ഏഴിന് അയച്ച മറ്റൊരു കത്തിലെ പ്രസക്ത ഭാഗങ്ങള്‍ ഇങ്ങനെയാണ്: ”ചില പ്രവിശ്യകളില്‍ ആര്‍എസ്എസ് വമ്പിച്ച പ്രകടനങ്ങള്‍ സംഘടിപ്പിച്ചതിന്റെ റിപ്പോര്‍ട്ടുകള്‍ എനിക്ക് കിട്ടിയിട്ടുണ്ട്. പലപ്പോഴും ഈ പ്രകടനങ്ങള്‍ നിരോധനാജ്ഞ ലംഘിച്ചാണ് നടന്നിട്ടുള്ളത്. ചില പ്രവിശ്യാഭരണാധികാരികള്‍ ഇക്കാര്യത്തില്‍ യാതൊരു നടപടിയും കൈക്കൊണ്ടിട്ടില്ല. അവര്‍ ഈ ആജ്ഞാ ലംഘനത്തെ അംഗീകരിച്ച മട്ടാണ്. ആര്‍എസ്എസ്. ഒരു സ്വകാര്യ സൈന്യ സ്വഭാവമുള്ള സംഘടനയാണ്. അത് പിന്‍തുടരുന്നത് നാസി പാതയാണെന്ന് കാണിക്കുന്ന ധാരാളം തെളിവുകള്‍ നമുക്ക് ലഭ്യമാണ്. നാസി സംഘടന രീതിപോലും അവര്‍ അനുവര്‍ത്തിക്കുന്നതായി കാണാം. പൗരസ്വാതന്ത്ര്യത്തില്‍ കൈകടത്താന്‍ നാം ആഗ്രഹിക്കുന്നില്ല. എന്നാല്‍ ആയുധങ്ങള്‍ നല്‍കുകയും പരിശീലനം നടത്തുകയും ചെയ്യുന്നത് പ്രോത്സാഹിപ്പിക്കുവാന്‍ കഴിയുന്നതല്ല. അവരുടെ പ്രവര്‍ത്തനം അതിരുകവിഞ്ഞിരിക്കുന്നു. പ്രവിശ്യാസര്‍ക്കാരുകള്‍ ആ പ്രവര്‍ത്തനത്തിനുമേല്‍ കണ്ണുവെയ്ക്കുന്നത് നന്നായിരിക്കും. ജര്‍മനിയില്‍ നാസി പ്രസ്ഥാനം എങ്ങിനെയാണ് വികാസം പ്രാപിച്ചതെന്ന് ഞാന്‍ കുറച്ചൊക്കെ മനസിലാക്കിയിട്ടുണ്ട്. അച്ചടക്കം കൊണ്ടും ഏറെ ബുദ്ധിയൊന്നും ഇല്ലാത്ത ജീവിതത്തില്‍ ആകര്‍ഷകമായി യാതൊന്നുമില്ലാത്ത കീഴ്മദ്ധ്യവര്‍ഗ്ഗത്തില്‍പ്പെട്ട യുവാക്കളും യുവതികളുമാണ് അതിനോട് അടുപ്പം കാണിച്ചത്. അതിന്റെ നയവും പരിപാടികളും ലളിതവും നിഷേധാത്മകവും മാനസിക വിദ്യാഭ്യാസമില്ലാത്തതുമായിരുന്നു. നാസി പാര്‍ട്ടി ജര്‍മ്മനിയെ നശിപ്പിച്ചു. ഈ പ്രവര്‍ത്തനം ഇന്ത്യയില്‍ പടരാനും വര്‍ദ്ധിക്കുവാനും ‘ഇടവരരുതെന്ന്’ നെഹ്‌റു പ്രവിശ്യ സര്‍ക്കാരുകള്‍ക്ക് കത്തുകളിലൂടെ മുന്നറിയിപ്പ് നല്‍കുന്നു. ഡല്‍ഹിയിലെ ജവഹര്‍ലാല്‍ നെഹ്‌റു ഫണ്ടിനുവേണ്ടി പാര്‍ത്ഥസാരഥി സംശോധനം നിര്‍വ്വഹിച്ച 1947 മുതല്‍ 1963 വരെയുള്ള ആയിരക്കണക്കിന് കത്തുകളുടെ അഞ്ചു വാള്യങ്ങളില്‍നിന്നും രണ്ട് കത്തുകളുടെ പ്രസക്ത ഭാഗങ്ങളാണ് ഇവിടെ ചേര്‍ത്തത്. രാമചന്ദ്രഗുഹയുടെ ‘ആധുനിക ഇന്ത്യയുടെ ശില്‍പികള്‍’എന്ന കൃതിയിലാണ് ഈ കത്തുകള്‍ പരാമര്‍ശിക്കപ്പെട്ടിട്ടുള്ളത്. ഹിന്ദുത്വ ശക്തികള്‍ക്കെതിരായി വിട്ടുവീഴ്ച്ചയില്ലാത്ത നിലപാടായിരുന്നു നെഹ്‌റുവിന്റേതെന്ന് തെളിയിക്കുന്നതാണ് ഈ കത്തുകള്‍.

(അവസാനിച്ചു)