Monday
25 Jun 2018

മരണത്തിനപ്പുറം

By: Web Desk | Sunday 8 April 2018 8:20 AM IST

ദീപ ജയരാജ്

ചെറുതിരിനാളമാമെന്റെ വെട്ടം
ഞാന്‍ പോയ്മറയുമ്പോള്‍ നീയറിയും
ചെറുപുഞ്ചിരിപോലെ എന്റെ സ്‌നേഹം
ഞാന്‍ അഗ്നിയില്‍ ചേരുമ്പോള്‍ നീ അറിയും
നിനക്കായ് ഉരുകുമീയെന്‍ നെഞ്ചകം-
ചിതയിലെരിയുമ്പോള്‍ നീ അറിയും…..
കരളിന്റെ കോണിലായ് ഞാന്‍ വാര്‍ത്ത കണ്ണുനീര്‍
കദനത്തോടന്നു നീ കണ്ടു നില്‍ക്കും
അവസാനമായെന്റെ ചിതയില്‍ നീ അണയണം-
വേവാതെ വേവുമെന്‍ മാനസം കാണുവാന്‍
അവിടെ നീയേകിയ മൃദുലമാം ഓര്‍മകള്‍-
കുളിര്‍തെന്നലായ് വന്നു നിന്നെ തഴുകിടും….
മരണത്തിന്‍ കരമേറി ഞാന്‍ മാഞ്ഞിടും നേരം
നിന്നെ വരവേറ്റിടുമെന്‍ മുറിവാര്‍ന്നൊരോര്‍മ്മകള്‍
നഷ്ടസ്വപ്നങ്ങളാല്‍ ഞാന്‍ കോര്‍ത്ത പൂമാല്യം-
സ്വീകരിക്കാതെ നീ പോയിടല്ലേ……
നിത്യ ദു:ഖത്താലെ ഞാന്‍ തീര്‍ത്ത നൊമ്പരം-
കണ്ടിടാതിന്നു നീ പോയിടല്ലേ…
നിറമില്ലാമനതാരില്‍ നിറമാല ചാര്‍ത്തിയ-
നിര്‍മ്മാല്യമായി ഞാന്‍ നിന്നിടുന്നു…..
ദേഹി അകന്നൊരു ദേഹമായ് ഞാനിന്നു-
ദേവലോകത്തേക്കു പോയിടുന്നു….
മോഹപുഷ്പങ്ങളെ മാറോടമര്‍ത്തി ഞാന്‍-
മാരിവില്‍പോലെ മറഞ്ഞിടുന്നു.
തീയിലേക്കിന്നു ഞാന്‍ പോകുന്നയീ വേളയില്‍
ഒരു നോക്കുകൊണ്ടന്നെ യാത്രയാക്കൂ…..
ഒരു നോക്കു കാണുവാന്‍ നീ വരൂ എന്‍പ്രിയാ
വിരഹാഗ്നിപോലെന്റെ അരികില്‍ വരൂ….
ഒരു ചുംബനത്താലെ ധന്യയാക്കൂ…
മൃത്യുവിനപ്പുറമൊരുലോകമുണ്ടെന്നാല്‍
മാനസമോഹനാ വന്നു ചേരൂ….
മിഴിനീരുതോരാത്ത മാന്‍പേട പോലെ ഞാനെന്‍-
മാനസചോരനെ ഓര്‍ത്തിരിക്കാം
മാതളപൂവാലെ മഞ്ചമൊരുക്കിഞാന്‍-
മൈകണ്ണു ചിമ്മാതെ കാത്തിരിക്കാം
മായാത്തൊരോര്‍മ്മയായ് പെയ്തു നില്‍ക്കാം.