Wednesday
22 Aug 2018

മഹാനഷ്ടങ്ങളുടെ ജൂലൈ: ഖത്തര്‍ യുവകലാസാഹിതിയുടെ വേറിട്ട ഓര്‍മ്മപുതുക്കല്‍

By: Web Desk | Friday 10 August 2018 10:05 PM IST

പ്രത്യേക ലേഖകന്‍

ദോഹ: കമ്മ്യൂണിസത്തിന്റെ മധുരസൗമ്യദീപ്തമുഖമായിരുന്ന പി കെ വാസുദേവന്‍ നായര്‍ ഭാരതീയ ദര്‍ശനങ്ങള്‍ക്ക് മാര്‍ക്‌സിയന്‍ മുഖം നല്‍കിയ എന്‍ ഇ ബലറാം, മാധ്യമ – കലാരംഗങ്ങളിലെ മഹാമേരുവായ കാമ്പിശ്ശേരി കരുണാകരന്‍, കമ്മ്യൂണിസ്റ്റ് പ്രത്യയശാസ്ത്രത്തിനും കലയ്ക്കും പുതിയൊരു ദിശാരൂപം നല്‍കിയ കെ ദാമോദരന്‍, ഉരുക്കിന്റെ കാഠിന്യമുള്ള കമ്മ്യൂണിസ്റ്റും ജനഹൃദയങ്ങളോടു തൊട്ടുനിന്ന ഭരണാധികാരിയുമായ പി എസ് ശ്രീനിവാസന്‍, ലോകത്ത് ആദ്യമായി ബാലറ്റിലൂടെ തെരഞ്ഞെടുക്കപ്പെട്ട മുസ്‌ലിം കമ്മ്യൂണിസ്റ്റ് മന്ത്രിയായ ടി എ മജീദ്, കേരളത്തിലെ കര്‍ഷകപ്രസ്ഥാനത്തിന്റെ പ്രാണവായുവായ കെ എ കേരളീയന്‍, തൊഴിലാളിവര്‍ഗത്തിന്റെ പ്രിയങ്കരനായ പി പി മുകുന്ദന്‍, മാര്‍ക്‌സിയന്‍ സാമ്രാജ്യത്തിന്റെ ആള്‍രൂപമായിരുന്ന പി എസ് നമ്പൂതിരി…

സിപിഐയെ നയിച്ച ഈ മഹാരഥന്മാരുടെയെല്ലാം വേര്‍പാട് ജൂലൈയിലായിരുന്നു. ഇവരെ അനുസ്മരിക്കാന്‍ ഖത്തര്‍ യുവകലാസാഹിതി ഇവിടെ സംഘടിപ്പിച്ച ഓര്‍മ്മപുതുക്കല്‍ വികാരനിര്‍ഭരതയാല്‍ നിറഞ്ഞ സദസിന് വേറിട്ട അനുഭവമായി. ചടങ്ങിനെ പേരുതന്നെ മഹാനഷ്ടങ്ങളുടെ ജൂലൈ. ഖത്തര്‍ ഐസിസി ഹാളില്‍ രാഗേഷ് കുമാറിന്റെ അധ്യക്ഷതയില്‍ ചേര്‍ന്ന ചടങ്ങില്‍ കെ ഇ ലാലു അനുസ്മരണ പ്രഭാഷണം നടത്തി. സൂരജ് ഉപ്പോട്ട്, കെപിഎസി സജു, സിറാജുദീന്‍ മുഹമ്മദ് കുഞ്ഞ്, ഷാന്‍, ഹൈദ്രോസ്, ഷെറിന്‍ കക്കത്ത്, നസീര്‍ ഷാഹുല്‍ എന്നിവര്‍ വേര്‍പിരിഞ്ഞ സഖാക്കള്‍ക്കു സ്മരണാഞ്ജലി അര്‍പ്പിച്ചു. ഉപ്പോട്ട് അനില്‍കുമാര്‍ സ്വാഗതവും സുജന്‍ ധര്‍മ്മപാലന്‍ നന്ദിയും പറഞ്ഞു.