Wednesday
17 Jan 2018

‘റെഡ്‌ ഒക്ടോബര്‍’ നാളെ മുതല്‍ ദര്‍ബാര്‍ ഹാള്‍ കലാകേന്ദ്രത്തില്‍

By: Web Desk | Saturday 13 January 2018 1:32 PM IST

കൊച്ചി: റഷ്യന്‍ വിപ്ലവത്തിന്റെ നൂറ്‌ വര്‍ഷങ്ങള്‍ അടയാളപ്പെടുത്തുന്നതിന്റെ ഭാഗമായി കേരള ലളിതകലാ അക്കാദമിയുടെ ആഭിമുഖ്യത്തില്‍ നാളെ മുതല്‍ ദര്‍ബാര്‍ ഹാള്‍ കലാകേന്ദ്രത്തില്‍ വിവിധ പരിപാടികള്‍ സംഘടിപ്പിക്കുന്നു. ‘റെഡ്‌ ഒക്ടോബര്‍’ എന്ന്‌ പേരിട്ടിരിക്കുന്ന പരിപാടിയില്‍ സെര്‍ജി ഐസന്‍സ്റ്റെയ്‌ന്‍ ചിത്രങ്ങളുടെയും റഷ്യന്‍ വിപ്ലവത്തെ അടയാളപ്പെടുത്തുന്ന പോസ്‌റ്ററുകളുടെയും പ്രദര്‍ശനവും വിപ്ലവത്തെക്കുറിച്ചുള്ള പുസ്‌തകങ്ങളുടെ പ്രദര്‍ശനവും വില്‍പനയുമുണ്ടാകും. നാളെ വൈകീട്ട്‌ 4.30-ന്‌ പ്രമുഖ കലാനിരൂപകന്‍ സുനീത്‌ ചോപ്ര പ്രദര്‍ശനം ഉദ്‌ഘാടനം ചെയ്യും. കേരള ലളിതകലാ അക്കാദമി ചെയര്‍മാന്‍ നേമം പുഷ്‌പരാജിന്റെ അധ്യക്ഷതയില്‍ നടക്കുന്ന ചടങ്ങില്‍ കേരള സാഹിത്യ അക്കാദമി സെക്രട്ടറി കെ.പി. മോഹനന്‍ മുഖ്യപ്രഭാഷണം നടത്തും. സീഗള്‍ ആര്‍ട്ട്‌ ഫൗണ്ടേഷനുമായി ചേര്‍ന്നാണ്‌ പരിപാടി സംഘടിപ്പിക്കുന്നത്‌.

ജനുവരി 30 വരെ തിങ്കളാഴ്‌ചയൊഴികെ എല്ലാ ദിവസവും രാവിലെ 11 മുതല്‍ വൈകീട്ട്‌ 7 വരെയായിരിക്കും പ്രദര്‍ശനം. സെര്‍ജി ഐസന്‍സ്റ്റെയ്‌ന്‍ സംവിധാനം ചെയ്‌ത പ്രശസ്‌ത ചലച്ചിത്രങ്ങളുടെ പ്രദര്‍ശനവും ഇതോടനുബന്ധിച്ച്‌ നടക്കും. എല്ലാ ദിവസവും വൈകീട്ട്‌ 3-നായിരിക്കും ചലച്ചിത്ര പ്രദര്‍ശനം. ബാട്ടില്‍ഷിപ്പ്‌ പൊട്ടെംകിന്‍, ഇവാന്‍ ദി ടെറിബ്‌ള്‍, അലക്‌സാണ്ടര്‍ നേവ്‌സ്‌കി, ക്യു വിവാ മെക്‌സിക്കോ, ടെന്‍ ഡെയ്‌സ്‌ ദാറ്റ്‌ ഷുക്ക്‌ ദ വേള്‍ഡ്‌ തുടങ്ങിയ ചലച്ചിത്രങ്ങളാണ്‌ പ്രദര്‍ശിപ്പിക്കുക.