Monday
20 Aug 2018

മത്തി ഒരു ചെറിയ മീനല്ല

By: Web Desk | Thursday 31 May 2018 4:30 PM IST

മീന്‍ ഇല്ലാതെ ചോറിറങ്ങില്ല, ഒട്ടുമിക്ക മലയാളിക്കും. അതും മത്തിയാണെങ്കില്‍ പിന്നത്തെ കാര്യം പറയേണ്ട. നമ്മുടെ നാട്ടില്‍ ഏറെ ലഭ്യമായ ഒരു മത്സ്യമാണ് മത്തി അഥവാ ചാള. വറുത്തും തേങ്ങയരച്ചുവെച്ചും മുളകിട്ടും പൊള്ളിച്ചും ഒക്കെ മത്തി ഉപയോഗിക്കുന്നു. കാഴ്ചയിൽ കുഞ്ഞനാണെങ്കിലും  മത്തിയുടെ ഗുണങ്ങള്‍ ഏറെയാണ്.

മത്തിയുടെ  ഇംഗ്ലീഷ് പേര് ‘സാര്‍ഡീന്‍’ എന്നാണ്. ഇറ്റലിക്ക് സമീപമുള്ള ‘സാര്‍ഡീന’ എന്ന ദ്വീപിന്റെ പേരില്‍ നിന്നാണ് ഈ വാക്കിന്റെ ഉത്ഭവം. ഈ ദ്വീപിന് ചുറ്റുമുള്ള കടലില്‍ മത്തിയുടെ വന്‍തോതിലുള്ള ശേഖരം എല്ലായ്‌പ്പോഴും കണ്ടുവരുന്നതിനാലാണ് മത്തിക്ക് ‘സാര്‍ഡീന്‍’ എന്ന പേര് വന്നത്. ആഗോളതലത്തില്‍ ഈ ചെറു മത്സ്യത്തിനുള്ള ജനപ്രീതിക്ക് ഒരു വലിയ അളവുവരെ നെപ്പോളിയന്‍ ചക്രവര്‍ത്തി കാരണമായിട്ടുണ്ടെന്ന് പറയപ്പെടുന്നു. ടിന്നിലടച്ച മത്തിയുടെ ഉപയോഗം പ്രോത്സാഹിപ്പിക്കുന്നതിന് അദ്ദേഹം വലിയ പങ്കുവഹിച്ചിരുന്നത്രെ. ആദ്യമായി ടിന്നിലടച്ചു സൂക്ഷിക്കപ്പെട്ട മത്സ്യവും മത്തിയാണെന്ന് ചരിത്രം പറയുന്നു. അറ്റ്‌ലാന്റിക് സമുദ്രവും പസഫിക് സമുദ്രവും മത്തിയുടെ മുഖ്യ ഉറവിടങ്ങളാണ്. കാഴ്ചയിൽ കുഞ്ഞനായ മത്തിയുടെ ഔഷധഗുണത്തെക്കുറിച്ച് അറിയുമ്പോഴാണ് മത്തിയുടെ പ്രസക്തിയേറുന്നത്.  അവ ഏതൊക്കെയാണെന്ന് നോക്കാം.

ഹൃദയ സംബന്ധമായ രോഗങ്ങൾ ; മത്തിയില്‍ അടങ്ങിയിരിക്കുന്ന ഒമേഗ-3 ഫാറ്റി ആസിഡ് ഹൃദ്രോരോഗങ്ങളെ ചെറുക്കാന്‍ പറ്റിയ മരുന്നാണ്. ഈ ആസിഡ് ശരീരത്തിലെ നല്ല കൊളസ്ട്രോളിന്റെ അളവ് കൂട്ടുകയും ചീത്ത കൊളസ്ട്രോളിന്റെ അളവ് കുറയ്ക്കുന്നതിനും സഹായകമാണ്.

തേയ്‌മാനം; ശരീര കോശങ്ങളുടെ വളര്‍ച്ചയ്ക്കും തേയ്മാനം പരിഹരിക്കുന്നതിനും മത്തിയേക്കാള്‍ മികച്ച ഭക്ഷണം ഇല്ലെന്നാണ് ഗവേഷകര്‍ പറയുന്നത്. ശരാശരി ഉപഭോഗത്തില്‍ ഒരു നേരം 37 ഗ്രാം പ്രോട്ടീന്‍ മത്തിയില്‍ നിന്നും ലഭിക്കുമെന്നാണ് പഠനങ്ങള്‍ വ്യക്തമാക്കുന്നത്.

ബുദ്ധി വികാസം; ബുദ്ധിവികാസത്തിന് മത്തി സഹായകമാണ്. അതുപോലെ തന്നെ എല്ലിന്റെയും പല്ലിന്റെയും ഉറപ്പിനും കരുത്തിനും മത്തി പകര്‍ന്നു നല്‍കുന്ന എനര്‍ജി മറ്റ് മത്സ്യങ്ങളില്‍നിന്ന് ലഭിക്കില്ല. വന്‍കുടലിലെ കാന്‍സറിനെ തടയാന്‍ സഹായിക്കുന്ന മത്തി ബുദ്ധി, ഓര്‍മ, ശ്രദ്ധ എന്നിവയ്ക്ക് മൂര്‍ച്ച കൂട്ടാന്‍ ഉതകുന്ന മരുന്നുമാണ്. മത്തിയുടെ മുള്ളും തലയും വിറ്റാമിന്റെ കലവറ കൂടിയാണ്.

അമിത വണ്ണം; തടി കുറയ്ക്കാന്‍ മത്തി സഹായിക്കുന്നു. മീനില്‍ അടങ്ങിയിട്ടുള്ള ഫിഷ് ഓയില്‍ ഫാറ്റ് ആണ് കൊഴുപ്പ് കുറച്ച്‌ തടി കുറക്കുന്നത്. മത്സ്യം ദിവസവും കഴിക്കുന്നത് ചര്‍മ്മം മിനുസമുള്ളതാക്കാന്‍ സഹായിക്കുന്നു. രക്തം കട്ട പിടിക്കുന്ന തരത്തിലുള്ള പ്രശ്നങ്ങളെ മത്തി ഇല്ലാതാക്കുന്നു.

Related News