Thursday
24 Jan 2019

നോമ്പ് തുറക്കാനെത്തുന്നവർക്ക് വിലകൂടിയ സമ്മാനങ്ങളുമായി ഈ മസ്ജിദ്

By: Web Desk | Tuesday 12 June 2018 8:42 AM IST

നോമ്പ് തുറക്കാനെത്തുന്നവര്‍ക്ക് വിഭവസമൃദ്ധമായ ഭക്ഷണത്തിനൊപ്പം വിലകൂടിയ സമ്മാനങ്ങളും നല്‍കുന്ന ഒരു മസ്ജിദ്. കേരളത്തിലോ ഇന്ത്യയിലോ അല്ല ഇത്. അങ്ങ് ഖത്തറിലാണ് ഈ പള്ളി. അല്‍വാബിലെ ജാമിഉല്‍ അഖവൈന്‍ മസ്ജിദിനോട് ചേര്‍ന്ന ഇഫ്താര്‍ തമ്പില്‍ നോമ്പു തുറക്കാനെത്തുന്നവര്‍ക്കായി ടൊയോട്ട കാറടക്കം വിലപിടിപ്പുള്ള സമ്മാനങ്ങളാണ് ഒരുക്കിയിരിക്കുന്നത്.

ഖത്തറിലെ അല്‍വാബിലുള്ള ജാമിഉല്‍ അഖവൈന്‍ മസ്ജിദില്‍ ശരാശരി 700 പേര്‍ വീതമാണ് ഇപ്പോള്‍ നോമ്പ് തുറക്കാനെത്തുന്നത്. മജ്ബൂസും ഹരീസും റിഗാഗും തുടങ്ങി സമൃദ്ധമായ ഭക്ഷണത്തോടൊപ്പം തീന്‍മേശയില്‍ തന്നെ ഒരു കൂപ്പണും ലഭിക്കും. പുറത്തിറങ്ങിയാല്‍ പള്ളിയുടെ കവാടത്തില്‍ വെച്ച് നടക്കുന്ന നറുക്കെടുപ്പില്‍ ദിവസേന ഓരോ വിജയികളെ തെരഞ്ഞടുത്ത് സമ്മാനങ്ങള്‍ നല്‍കും.

റമദാനില്‍ ഇങ്ങനെ 15 മൊബൈല്‍ഫോണുകളും 15 ടാബ്ലറ്റുകളുമാണ് ദൈനംദിന സമ്മാനമായി നല്‍കുന്നത് . പള്ളിക്ക് മുമ്പില്‍ പ്രദര്‍ശിപ്പിച്ചിരിക്കുന്ന ടൊയോട്ട കാറാണ് ബമ്പര്‍ സമ്മാനം. റമദാന്‍ അവസാന ദിവസമാണ് കാറിനായുള്ള നറുക്കെടുപ്പ് . നോമ്പു തുറക്കാനെത്തുന്നവരെ കൂടുതല്‍ സന്തോഷിപ്പിക്കാനായി പള്ളിയുടെ നടത്തിപ്പുകാരായ രാജകുടുംബാംഗങ്ങള്‍ തന്നെയാണ് നോമ്പുകാര്‍ക്ക് സ്‌നേഹ സമ്മാനങ്ങള്‍ നല്‍കാന്‍ തീരുമാനമെടുത്തത് .

സാധാരണക്കാരായ പ്രവാസികളെ ലക്ഷ്യമിട്ട് നടത്തുന്ന ഈ നോമ്പുതുറയിലേക്ക് എത്ര പേര്‍ അധികമായെത്തിയാലും ആതിഥേയരുടെ സന്തോഷമാണ് അധികരിക്കുന്നത് .

Related News