ആദ്യ കുഞ്ഞിനെ പ്രസവിച്ച ശേഷം എറണാകുളം വൈറ്റില സ്വദേശിയുടെ പേർഷ്യൻ പൂച്ച പറയത്തക്ക ബുദ്ധിമുട്ടുകളൊന്നും പ്രകടിപ്പിക്കാതെ കുഞ്ഞിന് മുലയൂട്ടാൻ ആരംഭിച്ചപ്പോൾ വീട്ടുകാർ അശ്വസിച്ചു. പിറ്റേന്ന് രാവിലെയാണ് ചുവന്ന ട്യൂബ് പോലെയെന്തോ യോനിയിൽ നിന്നും പുറത്തേക്ക് നീണ്ടു നിൽക്കുന്നത് അവരുടെ ശ്രദ്ധയിൽ പെട്ടത്.. ഉടനെ അവർ അതിനെ സർക്കാർ ജില്ലാ വെറ്ററിനറി കേന്ദ്രത്തിൽ എത്തിച്ചു. ഡോക്ടറുടെ നിർദേശപ്രകാരം അൾട്രാസൗണ്ട് സ്‌കാനും എക്സ്റേയും എടുത്തപ്പോഴാണ് ഗർഭപാത്രത്തിൽ അപൂർവമായി മാത്രം കാണപ്പെടുന്ന ഇന്റുസ്സസ്സപ്‌ഷൻ എന്ന അവസ്ഥയാണെന്ന്‌ രോഗനിർണ്ണയം നsത്താൻ കഴിഞ്ഞത്.

ഒരു ടെലിസ്കോപ്പിന്റെ കുഴലുകൾ തമ്മിൽ തെന്നി വലിയ ട്യൂബിന്റെ ഉള്ളിൽ ചെറിയ ട്യൂബ് കയറുന്ന സങ്കീർണമായ അവസ്ഥയാണ് ഈ രോഗം. ഇങ്ങനെ സംഭവിച്ചാൽ ഗർഭപാത്രത്തിന്റെ ആന്തരിക ആവർണമായ എൻഡോമെട്രീയത്തിന്റെ കോശങ്ങൾക്ക് അതിവേഗം അപകടം സംഭവിക്കുകയും കുഞ്ഞിന്റെയും അമ്മയുടെയും ജീവൻ അപകടത്തിലാവുകയും ചെയ്യുന്നു. എറണാകുളം ജില്ലാ വെറററിനറി കേന്ദ്രത്തിലെ ചീഫ് വെറ്ററിനറി ഓഫീസർ ഡോ ഇന്ദിരയുടെ നേതൃത്വത്തിൽ ഡോ ലത്തീഫ്, ഡോ എൽദോസ്, ഡോ പാർവ്വതി എന്നീ മൂവർ സംഘം അടങ്ങിയ ടീം ഒന്നര മണിക്കൂർ നീണ്ടു നിന്ന സങ്കീർണമായ ശസ്ത്രക്രിയയിലൂടെ ഗർഭപാത്രത്തിന്റെ ഉള്ളിൽ കുടുങ്ങിക്കിടന്ന കുഞ്ഞിനെ ജീവനോടെ രക്ഷിച്ചെടുത്തു. അമ്മയും കുഞ്ഞും സുഖം പ്രാപിച്ചു വരുന്നു എന്ന് എറണാകുളം ജില്ലാ മൃഗസംരക്ഷണ ഓഫീസർക്ക് വേണ്ടി പബ്ലിക്ക് റിലേഷൻസ് ഓഫീസർ അറിയിച്ചു.

പ്രതീകാത്മക ചിത്രം