Friday
25 May 2018

ദീര്‍ഘകാല മൂലധന നേട്ടങ്ങളില്‍ നികുതി കാര്യമായ ദോഷം ചെയ്യില്ല

By: Web Desk | Thursday 1 February 2018 8:42 PM IST

ഡോ.വി.കെ വിജയകുമാര്‍

(ചീഫ് ഇന്‍വെസ്റ്റ്‌മെന്റ് സ്ട്രാറ്റജിസ്റ്റ് , ജിയോജിത് ഫിനാന്‍ഷ്യല്‍ സര്‍വീസസ്)

2018ലെ ബജറ്റ് ഒരു രാഷ്ട്രീയ രേഖയാണെങ്കിലും ഒരു ജന പ്രീണന ബജറ്റല്ല. ധന കമ്മി 3.2 ശതമാനം ലക്ഷ്യമിട്ടിരുന്നത് 3.5 ശതമാനമായി ഉയര്‍ന്നതും ദീര്‍ഘകാല മൂലധന നേട്ടങ്ങളുടെ മേല്‍ (LTCG) 10 ശതമാനം നികുതി ചുമത്തിയതും വിപണിയുടെ കാഴ്ചപ്പാടില്‍ നെഗറ്റീവ് ആണ്. 10 ശതമാനം LTCG നികുതി ചുമത്തിയിട്ടുണ്ടെങ്കിലും 2018 ജനുവരി 31 വരെയുള്ള ദീര്‍ഘകാല മൂലധന നേട്ടങ്ങളെ ഒഴിവാക്കിയിട്ടുണ്ടെന്നത് ആശ്വാസകരമാണ്. വിപണിയുടെ കാഴ്ചപ്പാടില്‍ നിന്നു നോക്കുമ്പോള്‍ STT (സെക്യൂരിറ്റീസ് ട്രാന്‍സാക്ഷന്‍ ടാക്‌സ്) നില നിര്‍ത്തി എന്നത് ശുഭോദര്‍ക്കമല്ല.
ദീര്‍ഘകാല മൂലധന നേട്ടങ്ങള്‍ നികുതി വിമുക്തമാക്കിയത് 2004 ബജറ്റിലായിരുന്നു. ഇതിനു പകരമായാണ് STT കൊണ്ടു വന്നത്. ദീര്‍ഘകാല മൂലധന നേട്ടങ്ങളെ നികുതി മുക്തമാക്കിയതിന്റെ ഉദ്ദേശം സ്വര്‍ണം തുടങ്ങിയ പ്രത്യുല്‍പാദനപരമല്ലാത്ത ആസ്തികളില്‍ നിന്ന് മൂലധന വിപണിയിലേക്കു കൂടുതല്‍ നിക്ഷേപം ആകര്‍ഷിക്കാന്‍ വേണ്ടിയാണ്. ഇപ്പോള്‍ വിപണിയിലേക്ക് ധാരാളം മൂലധനം ഒഴുകുന്നതുകൊണ്ട് ഈ ആനുകൂല്യം ഇനി തുടരേണ്ടതില്ലെന്ന് സര്‍ക്കാരിനു തോന്നിക്കാണും. മാത്രമല്ല, മൊറീഷ്യസ്, സിങ്കപ്പൂര്‍, സൈപ്രസ് എന്നീ രാജ്യങ്ങളുമായി ഇരട്ട നികുതി ഒഴിവാക്കല്‍ ഉടമ്പടി (DTAA) ഒപ്പുവെച്ചതോടെ വിദേശ നിക്ഷേപകരും തദ്ദേശീയ നിക്ഷേപകരും തമ്മിലുള്ള വ്യത്യാസം ഇല്ലാതായിരുന്നു. 2018ലെ ബജറ്റില്‍ ഒരു ലക്ഷം രൂപയില്‍ കൂടുതലുള്ള ദീര്‍ഘകാല മൂലധന നേട്ടങ്ങള്‍ക്കാണ് 10 ശതമാനം നികുതി ഏര്‍പ്പെടുത്തിയിരിക്കുന്നത്. ഇതിന് ഇന്‍ഡെക്‌സേഷന്റെ ആനുകൂല്യവും ലഭ്യമല്ല. ഹൃസ്വകാല മൂലധന നേട്ടങ്ങളിന്‍മേലുള്ള നികുതി മാറ്റമില്ലാതെ 15 ശതമാനമായി തുടരുന്നു. ദീര്‍ഘകാല LTCG 10 ശതമാനം ഏര്‍പ്പെടുത്തിയതോടെ LTCGയും STCGയും തമ്മിലുള്ള വ്യത്യാസം ഗണ്യമായി കുറഞ്ഞിരിക്കയാണ്. ഇതിന്റെ ഫലമായി നിക്ഷേപകര്‍ LTCG നേട്ടമെടുക്കാന്‍ കാത്തിരിക്കാതെ കൂടുതല്‍ ഹൃസ്വകാല ഇടപാടുകളിലേക്കു തിരിയാനും സാധ്യതയുണ്ട്.
ഗുണപരമായ വശം നോക്കുകയാണെങ്കില്‍ ദീര്‍ഘകാല മൂലധന നേട്ട നികുതി വിപണിയിലെ അമിതവും അനാരോഗ്യകരവുമായ വ്യാപാരത്തെ അല്‍പം തണുപ്പിക്കും.
വിപണിയില്‍ കുമിളകള്‍ രൂപപ്പെട്ട് വലിയ തകര്‍ച്ചയിലേക്കു നീങ്ങുന്നതിനെ ഇതു തടയിടും. ദീര്‍ഘകാല കാഴ്ചപ്പാടില്‍ നോക്കുകയാണെങ്കില്‍ LTCG വലിയൊരു പ്രശ്‌നമല്ല. കഴിഞ്ഞ 38 വര്‍ഷ കാലയളവില്‍ ഓഹരി നിക്ഷേപം ശരാശരി 15 ശതമാനത്തിലധികം വാര്‍ഷിക നേട്ടം നല്‍കിയിട്ടുണ്ട്. ഭാവിയിലും ഇത്തരത്തിലുള്ള നേട്ടം വിപണിയില്‍ നിന്നു പ്രതീക്ഷിക്കാം. ഇതില്‍ നിന്നു 10 ശതമാനം പോയാലും പതിമൂന്നര ശതമാനം വാര്‍ഷിക നേട്ടത്തോടെ ഓഹരികള്‍ മറ്റ് ആസ്തികളേക്കാള്‍ മികച്ച നേട്ടം നല്‍കും.

Related News