Wednesday
17 Jan 2018

മത്സ്യത്തിനും അടിസ്ഥാന വില വരുന്നു

By: Web Desk | Saturday 13 January 2018 1:34 PM IST

കൊച്ചി: മത്സ്യബന്ധനമേഖലയിൽ തൊഴിലാളികളുടെ നേര്‍ക്കുള്ള വിപണിയുടെ ചൂഷണം ഒഴിവാക്കുന്നതിനായി മത്സ്യത്തിനും അടിസ്ഥാനവില നിശ്ചയിക്കാനൊരുങ്ങുന്നു. അടിസ്ഥാനവിലയോ ഏകീകൃതലേലരീതിയോ ഇല്ലാത്തതുമൂലമുള്ള പ്രശ്നങ്ങള്‍ പരിഹരിക്കാൻ സര്‍ക്കാര്‍ ശ്രമം തുടങ്ങിയതായി മാതൃഭൂമി റിപ്പോര്‍ട്ട് ചെയ്തു.

വരുന്ന നിയമസഭയിൽ സമഗ്രനിയമം അവതരിപ്പിക്കുന്നതിനായുള്ള നടപടിക്രമങ്ങള്‍ ആരംഭിച്ചതായി മത്സ്യത്തൊളിലാളി ക്ഷേമനിധി ബോര്‍ഡ് ചെയര്‍മാൻ പി പി ചിത്തരഞ്ജൻ പറഞ്ഞു.

വിപണിയിൽ മത്സ്യത്തിന് ഉയര്‍ന്ന വില നല്‍കേണ്ടി വരുന്നുണ്ടെങ്കിലും മത്സ്യത്തൊഴിലാളികള്‍ക്ക് പലപ്പോഴും ലഭിക്കുന്നത് വളരെ തുച്ഛമായ തുകയാണ്. ഇതിന് അറുതി വരുത്തുകയാണ് സര്‍ക്കാര്‍ ലക്ഷ്യം.

കൂടുതല്‍ മത്സ്യം ലഭിച്ചാല്‍ സൂക്ഷിക്കാന്‍ തീരങ്ങളില്‍ സംവിധാനമില്ലാത്തതാണ് ഇടനിലക്കാരുടെ ചൂഷണത്തിന് പ്രോത്സാഹനമാകുന്നത്. നിലവിലെ ലേലരീതിപ്രകാരം 10 ശതമാനം ലേലക്കാരനും മൊത്തവില്‍പ്പനക്കാരന് 10 ശതമാനം വിലയില്‍ കുറവും നല്‍കുന്നുണ്ട്. ഇതിനുപുറമേ അഞ്ചു കുട്ട മത്സ്യം ഒന്നിച്ചെടുക്കുമ്പോള്‍ ഒരു കുട്ട സൗജന്യമാകും. ഇതില്‍നിന്നും മാറി അഞ്ചു കുട്ടയ്ക്ക് ഒന്നും പത്തു കുട്ടയ്ക്ക് മൂന്നും സൗജന്യമാക്കിയാണ് പുതിയ ലേലരീതി. 100 കുട്ട വിലയ്‌ക്കെടുക്കുമ്പോള്‍ 30 ശതമാനം സൗജന്യമായി നല്‍കണം.

പുന്നപ്ര, മുനമ്പം എന്നിവിടങ്ങളില്‍ ഇതിനെതിരേ മത്സ്യത്തൊഴിലാളികള്‍ പ്രതിഷേധമുയര്‍ത്തിയിരുന്നു. പ്രശ്‌നം പരിഹരിക്കാന്‍ ചെറിയ മാറ്റങ്ങള്‍ വരുത്തിയെങ്കിലും പ്രായോഗികമായിട്ടില്ല.