Friday
25 May 2018

വന്യ ‘ജാതിക്ക’ചതുപ്പുകള്‍ അന്യം നില്‍ക്കുമോ

By: Web Desk | Monday 5 February 2018 10:10 PM IST

പൊയ്ക്കാല്‍ വേരുകള്‍/ കൂനന്‍ വേരുകള്‍

സി സുശാന്ത്

ശ്ചിമഘട്ടത്തിലെ അതിസവിശേഷമായ ഒരു ആവാസവ്യവസ്ഥയാണ് ശുദ്ധജല ചതുപ്പുകളായ വന്യജാതിക്ക ചതുപ്പുകള്‍. താഴ്ന്ന വിതാനങ്ങളിലെ നിബിഡമായ മഴക്കാടുകളിലെ ഒരു ആവാസവ്യവസ്ഥയാണ് വന്യജാതിക്ക ചതുപ്പുകള്‍. സദാസമയവും ശുദ്ധജലം കെട്ടിനില്‍ക്കുകയും ചെറുനീര്‍ച്ചാലുകളാലും ചെറുവെള്ളക്കെട്ടുകളാലും സമ്പന്നമായ ഈ ചതുപ്പുകളില്‍ സാധാരണ വൃക്ഷങ്ങള്‍ക്ക് വളരുവാന്‍ കഴിയുകയില്ല. വര്‍ഷത്തിന്റെ മുക്കാല്‍പങ്കും വെള്ളം കെട്ടി നില്‍ക്കുന്നതിനാല്‍ പശിമരാശിയുള്ള മണ്ണുള്ള ചതുപ്പില്‍ വളരുവാന്‍ അനുകൂലനങ്ങളുള്ള കാട്ടുജാതിക്ക മരങ്ങളാണ് ഇവിടെ വളരുന്നത്. ആയതിനാലാണ് ശുദ്ധജല ചതുപ്പുകളെ വന്യജാതിക്ക ചതുപ്പുകള്‍ എന്ന് സസ്യശാസ്ത്രജ്ഞര്‍ വിളിക്കുന്നത്.
ഇവിടെ വളരുന്ന കാട്ടുജാതിക്ക മരങ്ങളുടെ പ്രത്യേകതയെന്തെന്ന് നോക്കാം.

സുവര്‍ണതവള

ശുദ്ധജല ചതുപ്പുകളില്‍ വളരുന്ന ഈ മരങ്ങളുടെ താഴ്തടിയില്‍ നിന്നും താങ്ങുവേരുകള്‍ അഥവാ പൊയ്ക്കാല്‍ വേരുകള്‍ താഴേയ്ക്ക് വളരുന്നു. ഈ വലിയ താങ്ങുവേരുകളുടെ ബലത്തിലാണിവ നില്‍ക്കുന്നത്. കാലുകള്‍ പോലെ വലിയ വേരുകള്‍ കണ്ടാല്‍ സഞ്ചരിക്കുന്ന മരങ്ങള്‍, നടക്കുന്ന മരങ്ങള്‍ എന്നുതോന്നാം. അത്ര ഉയരത്തിലാണ് താങ്ങുവേരുകള്‍ താഴ്ത്തടിയില്‍ നിന്നും താഴേക്ക് നീണ്ടിരിക്കുന്നത്. ഇത് കൂടാതെ ചെറുവേരുകള്‍ കൂനുള്ളതുപോലെ വളഞ്ഞ് വളയങ്ങള്‍ സൃഷ്ടിച്ച് ചതുപ്പുകളില്‍ പൊന്തിനില്‍ക്കുന്നു. ഈ കൂനന്‍ വേരുകളാണ് കാട്ടുജാതിക്ക മരങ്ങളുടെ ശ്വസനവേരുകള്‍. ഇവയിലെ വായു അറകളിലൂടെയാണ് നീര്‍ക്കെട്ടില്‍ നില്‍ക്കുന്ന മരങ്ങള്‍ ശ്വസിക്കുന്നത്. കൂനന്‍വേരുകളാല്‍ മൂടപ്പെട്ട ‘വന്യജാതിക്ക ചതുപ്പുകളെ’ കൂനന്‍ ചതുപ്പുകള്‍ എന്നും പതാല്‍ എന്നും വിളിക്കാറുണ്ട്. പൊയ്ക്കാല്‍ വേരുകളും കൂനന്‍ വേരുകളുമാണ് ശുദ്ധജല ചതുപ്പുകളില്‍ കാട്ടുജാതിക്ക മരങ്ങള്‍ക്ക് വളരുവാന്‍ അനുകൂലമായി തീര്‍ന്നിരിക്കുന്നത്.
വന്യജാതിക്ക ചതുപ്പുകളില്‍ കാട്ടുജാതിക്ക മരങ്ങളായ ഉണ്ടപ്പൈന്‍, ചോരപ്പൈന്‍, ചോരപ്പാലി, കൊത്തപ്പൈന്‍, പത്ര എന്നിവ സമൃദ്ധമായി ഇടതിങ്ങി വളരുന്നു. പശ്ചിമഘട്ടത്തിലെ തനതു മരവും ഞാവല്‍ വര്‍ഗത്തില്‍പ്പെട്ട വംശനാശ ഭീഷണി നേരിടുന്നതുമായ ചവറാന്‍ വന്യജാതിക്ക ചതുപ്പുകളില്‍ വളരുന്ന മരമാണ്.

ഇന്ദ്രനീലതുമ്പി

ഇടവപ്പാതി മഴകഴിയുന്നതോടെ ശുദ്ധജല ചതുപ്പുകള്‍ വെള്ളംകൊണ്ട് നിറയുന്നു. ഇങ്ങനെ മഴക്കാലത്ത് ലഭിക്കുന്ന മഴവെള്ളം മുഴുവന്‍ സംഭരിച്ചുവച്ച് വര്‍ഷം മുഴുവന്‍ വെള്ളം നല്‍കുവാന്‍ കഴിയുന്ന ഒരു അക്ഷയപാത്രമെന്നു വേണമെങ്കില്‍ വന്യജാതിക്ക ചതുപ്പുകളെ വിളിക്കാം. ജൂലൈ മുതല്‍ ഡിസംബര്‍മാസംവരെ ശുദ്ധജലം ശേഖരിച്ചുവയ്ക്കുകയും വേനല്‍ക്കാലത്ത് നീര്‍ച്ചാലുകളാലും കൈത്തോടുകളാലും പരിസരപ്രദേശത്തെ നനവ് നിലനിര്‍ത്തുവാനും കഴിവുള്ള സവിശേഷ ആവാസ വ്യവസ്ഥയാണ് വന്യജാതിക്ക ചതുപ്പുകള്‍. ശുദ്ധജല ചതുപ്പിലെ നീരൊലിപ്പായി ആരംഭിച്ച് കൈത്തോടായും നദികളുടെ കൈവഴിയുമൊക്കെയായിത്തീരുന്നു. കടുത്ത വേനല്‍ക്കാലത്തുപോലും വന്യജാതിക്ക ചതുപ്പിനുള്ളില്‍ കടന്നാല്‍ എന്തു കുളിര്‍മയാണെന്നോ. ഇവിടുള്ള വൃക്ഷങ്ങള്‍ മാനംമുട്ടേ വളര്‍ന്ന് വൃക്ഷമേലാപ്പുകള്‍ കുടപിടിച്ചു നില്‍ക്കുകയും, ഈ തണലും തണുപ്പും നമുക്ക് കുളിര്‍മയേകുന്നു.

വനറാണിശലഭം

ശുദ്ധജല ചതുപ്പുകള്‍ ജൈവവൈവിധ്യത്തിന്റെ നിറകുടമാണ്. ചെറു ഷഡ്പദങ്ങള്‍, പ്രാണികള്‍ മുതല്‍ സസ്തനികള്‍ വരെ ഈ ആവാസവ്യവസ്ഥയെ ആശ്രയിച്ചുകഴിയുന്നു. പശ്ചിമഘട്ടത്തിലെ തനത് സസ്യങ്ങളും വംശനാശഭീഷണി നേരിടുന്നതുമായ അനേകം സസ്യയിനങ്ങള്‍ ഇവിടെ വളരുന്നു. വന്യജാതിക്ക ചതുപ്പിലെ നീര്‍ച്ചാലുകളില്‍ മാത്രം കാണുന്ന പശ്ചിമഘട്ടത്തിലെ തനത് തുമ്പികളായ ഇന്ദ്രനീലി, ചതുപ്പന്‍ മുളനീലി, നീര്‍ച്ചോലത്തുമ്പി, പച്ചപെരുന്തലയന്‍ തുമ്പി, ചെങ്കറുമ്പന്‍ മുളവായന്‍ എന്നിവ ഇവിടെ കാണുന്നു. പശ്ചിമഘട്ടത്തിലെ തനത് ചിത്രശലഭവും ഏറ്റവും സാവധാനത്തില്‍ പറക്കുന്ന ചിത്രശലഭവുമായ വനദേവതയുടെ ലേഖകന്‍ കണ്ടെത്തിയ പുതിയ ആഹാരസസ്യമായ പെനലിവള്ളി സമൃദ്ധമായി കാണുന്നത് വന്യജാതിക്ക ചതുപ്പുകളിലാണ്. പശ്ചിമഘട്ടത്തിലെ തനത് ചിത്രശലഭമായ കാനനറോസിന്റെ ആഹാരസസ്യമായ പശ്ചിമഘട്ടത്തിലെ തനത് സസ്യമായ കുറ്റിക്കറുവയും ഇവിടെ വളരുന്നു. പശ്ചിമഘട്ടത്തിലെ തനത് ചിത്രശലഭങ്ങളായ പൂച്ചക്കണ്ണി, സന്ധ്യശലഭം, വനറാണി, തെങ്ങോലരാജന്‍, സുവര്‍ണമരിച്ചിന്നന്‍ എന്നിവയും വന്യജാതിക്ക ചതുപ്പില്‍ കാണുന്നു.
ശുദ്ധജല ചതുപ്പില്‍ അപൂര്‍വനും വംശനാശ ഭീഷണി നേരിടുന്നതുമായ കടുവച്ചിലന്തി, വെള്ളത്തില്‍ പൊന്തിക്കിടന്ന് മീന്‍ പിടിക്കുന്ന മീന്‍ചിലന്തി, ഉഭയജീവികളായ പറക്കുംതവള, ചെറുസുന്ദരി തവള, സുവര്‍ണ തവള, ചെമ്പന്‍തവള, വെരിക്കോസ് തവള എന്നിവയും ഉരഗങ്ങളായ കാട്ടുമണ്ഡലി, മുഴമൂക്കന്‍ അണലി, രാജവെമ്പാല, കാട്ടുനീര്‍ക്കോലി, കങ്കാരുഓന്ത്, പാറോന്ത്, എലിയറ്റ് ഓന്ത് എന്നിവയും വന്യജാതിക്ക ചതുപ്പിലെ അന്തേവാസികളാണ്.
രാത്രിഞ്ചരന്മാരായ കാട്ടുപക്ഷികളായ മാക്കാച്ചിക്കാട, ചെവിയന്‍ രാച്ചുക്കു, കാട്ടുരാച്ചുക്കു, കാട്ടുമൂങ്ങ, റിപ്ലിമൂങ്ങ, മീന്‍കൂമന്‍ എന്നിവയുടെ പകലുറങ്ങാന്‍ തിരഞ്ഞെടുക്കുന്ന ഇടമാണ് പതാലുകള്‍. പാമ്പ് പിടിയനായ ചുട്ടിപരുന്ത്, തേനീച്ചക്കൂട്ടിലെ തേനറകള്‍ ഭക്ഷിക്കുന്ന തേന്‍ കൊതിച്ചി പരുന്ത്, ചാരത്തലയന്‍ മീന്‍ പരുന്ത്, നെല്ലിക്കോഴി എന്നിവയും വന്യജാതിക്ക ചതുപ്പില്‍ വസിക്കുന്നു.

മാക്കാച്ചിക്കാട

ഈയടുത്തകാലത്ത് വന്യജാതിക്ക ചതുപ്പിനെക്കുറിച്ച് നാമറിയുവാന്‍ തുടങ്ങിയത് പാലോടിനടുത്തുളള ഇലവുപാലത്തിലെ ഓട്ചുട്ട പടുക്ക പ്രദേശത്തെ വന്യജാതിക്ക ചതുപ്പിനെ ഇല്ലായ്മ ചെയ്തുകൊണ്ട് ഐഎംഎ ആരംഭിക്കുവാന്‍ പോകുന്ന ബയോമെഡിക്കല്‍ മാലിന്യ സംസ്‌കരണ പ്ലാന്റിലൂടെയാണ്. വളരെ പ്രാധാന്യവും സവിശേഷശ്രദ്ധയുമാകര്‍ഷിക്കുന്ന വന്യജാതിക്ക ചതുപ്പിനെ വെറും പാഴ്സ്ഥലമായി കണ്ടുകൊണ്ടാണ് പ്ലാന്റ് സ്ഥാപിക്കുവാന്‍ ഐഎംഎ തുനിഞ്ഞത്. നാം നമ്മുടെ ആവാസവ്യവസ്ഥയെക്കുറിച്ച് അശേഷം ചിന്തിക്കുന്നില്ല എന്നതിന് നല്ലൊരു ഉദാഹരണമാണിത്. ഓടുചുട്ട പടുക്കയിലെ വന്യജാതിക്ക ചതുപ്പ് സംരക്ഷിക്കുന്നതിനുള്ള നിരന്തരയത്‌നത്തിലാണ് തദ്ദേശവാസികളും പ്രകൃതിസ്‌നേഹികളും പരിസ്ഥിതി പ്രവര്‍ത്തകരും സാമൂഹ്യ പ്രവര്‍ത്തകരും എഴുത്തുകാരുമൊക്കെ. ഓരോ വേനല്‍ക്കാലം രൂക്ഷമാകുമ്പോഴും നാം അടുത്ത വേനല്‍ക്കാലം വരാതിരിക്കുവാന്‍ പരിഗണനക്രമത്തില്‍ നടപടികളെടുക്കും എന്ന് പ്രഖ്യാപിക്കുകയും എന്നാല്‍ പ്രകൃതിയെ കൂടുതല്‍ നാശത്തിലേക്ക് തള്ളിയിട്ട് നാം മറ്റൊരു കൊടും വരള്‍ച്ചയെ വരവേല്‍ക്കുകയും ചെയ്യുന്നു. തെളിനീരുറവകളുടെ സ്രോതസുകളായ പശ്ചിമഘട്ടത്തില്‍ വളരെ തുച്ഛമായി ഇനിയും അവശേഷിക്കുന്ന വന്യജാതിക്ക ചതുപ്പുകള്‍ നിലനിര്‍ത്തുവാന്‍ നാം അമാന്തിച്ചുകൂട. മനുഷ്യരാശിക്ക് നിലനില്‍ക്കുവാന്‍ അത്യന്താപേക്ഷിതമായ ഈ ജലസ്രോതസിനെ പരിപാലിച്ച് നിലനിര്‍ത്തുവാന്‍ നാം ഒറ്റക്കെട്ടായി പ്രവര്‍ത്തിക്കേണ്ട സമയം അതിക്രമിച്ചിരിക്കുന്നു.

Related News