Thursday
20 Sep 2018

എഴുത്തുകാരുടെ യാത്ര

By: Web Desk | Sunday 11 March 2018 8:00 AM IST

ഷാഹുല്‍ ഹമീദ് കെ ടി

യാത്രയില്‍ യാദൃച്ഛികമായാണ് എഴുത്തുകാര്‍ കണ്ടുമുട്ടിയത്. ഒരാള്‍ വറ്റിവരണ്ട പുഴയെ നോക്കിനിന്നശേഷം ഇരിപ്പിടത്തിലേക്ക് മടങ്ങുമ്പോള്‍ ബോഗിയുടെ മറുഭാഗത്തുള്ള ബാത്ത്‌റൂമില്‍നിന്ന് ഇരിപ്പിടത്തിലേക്ക് വരികയായിരുന്നു മറ്റെയാള്‍. ചിരിച്ചുകൊണ്ട് അരികിലേക്കടുക്കുന്നതിനിടയില്‍, തങ്ങളുടെ യുവസാഹിത്യകാരന്‍ പട്ടത്തിലേക്ക് ചെളിവീഴാതിരിക്കാന്‍, ഒരാള്‍ തലയിലെ വിഗ്ഗ് സ്ഥാനം തെറ്റിയിട്ടില്ലല്ലോ എന്നുറപ്പു വരുത്തുമ്പോള്‍ മറ്റെയാള്‍ വിരലുകളിലെ ചുളിവുകള്‍ കാണാതിരിക്കാന്‍ കൈകള്‍ പോക്കറ്റുകളിലേക്കിട്ടു.
അകാലത്തില്‍ മരിച്ച എഴുത്തുകാരന്റെ നാമധേയത്തിലുള്ള പ്രഥമ അവാര്‍ഡ് എഴുത്തുകാരുടെ കൃതികള്‍ പങ്കിട്ടെടുത്ത വേദിയില്‍ വെച്ചാണ് അവരൊടുവില്‍ കണ്ടത്. ഏറെനേരം പുതിയ രചനകളെക്കുറിച്ചും വരാനിരിക്കുന്ന പുസ്തകങ്ങളെക്കുറിച്ചും സംസാരിച്ച അവര്‍, ബര്‍ത്തുകള്‍ അടുത്തടുത്തേക്കു മാറ്റുകയും ചെയ്തു. രാത്രിഭക്ഷണശേഷം അപ്പര്‍ ബര്‍ത്തിലേക്കു കിടക്കാനായി കയറിയ അവര്‍, ചെരിഞ്ഞുകിടന്നു സംസാരം തുടര്‍ന്നു.
‘മരിച്ച എഴുത്തുകാരുടെ സ്മരണക്കായുള്ള അവാര്‍ഡുകളെല്ലാം എനിക്ക് ലഭിച്ചുകഴിഞ്ഞു…’

‘സുഹൃത്തേ, എന്റെ അവസ്ഥയും തഥൈവ. ഇനി പുതിയ ആരെങ്കിലും…’
‘രണ്ടുമാസം മുമ്പ് മരിച്ച യുവകവയിത്രിയെ താനറിയില്ലേ?’
‘അറിയാതെ! രണ്ടുമൂന്ന് ക്യാമ്പുകളിലെ എന്റെ ക്ലാസുകളില്‍ അവളുണ്ടായിരുന്നു.’
‘ഞാനും ആ കുട്ടിയെ പരിചയപ്പെടുന്നത് വിദ്യാര്‍ത്ഥികള്‍ക്കുള്ള അക്കാദമി ക്യാമ്പില്‍ വെച്ചാണ്. അവളുടെ പേരില്‍ അവാര്‍ഡിന് കൃതികള്‍ ക്ഷണിച്ചിട്ടുണ്ട്. പുതിയ കവിതാ പുസ്തകം അടുത്തയാഴ്ച്ച ഇറങ്ങിയാലുടനെ ആ അവാര്‍ഡിന് വിടണം.’

‘സുഹൃത്തേ, ഞാനതിന് അയച്ചുകഴിഞ്ഞു. ഇന്നലെ…’
തീവണ്ടിയുടെ താരാട്ടുപാട്ടില്‍ അവര്‍ പതിയെപ്പതിയെ ഉറക്കത്തിന്റെ പാളങ്ങളിലേറി നീങ്ങിക്കൊണ്ടിരുന്നു.
ഇരമ്പലോടെ തീവണ്ടി നിശ്ചലമായപ്പോള്‍ ഒരാള്‍ പുതപ്പിനുള്ളില്‍ നിന്ന് പിടഞ്ഞെഴുന്നേറ്റ്, ബര്‍ത്തിനരികിലെ ഇരുമ്പുവലയില്‍ പിടിച്ച് വിറയലോടെ താഴേക്കുനോക്കി കരഞ്ഞു. പിന്നെ, തലകുടഞ്ഞ് അടുത്ത ബര്‍ത്തിലേക്ക് നോക്കി, കിതച്ചു. മറ്റെയാള്‍ ബര്‍ത്തിന്റെ മൂലയില്‍, ഭയത്തോടെ കോറിപ്പിടിച്ചിരിക്കുകയാണ്…!
‘എന്താ താനുറങ്ങിയില്ലെ…?’
‘സ്വപ്നം കണ്ട് ഞെട്ടിയുണര്‍ന്നതാ…! നീയെന്തിനാ ആ നെറ്റില്‍ വിരലുകളമര്‍ത്തുന്നെ..?’
‘ഒരാളെന്നെ പുഴയിലേക്കുന്തിയിട്ടത് സ്വപ്നം കണ്ടു..! പുഴയിലേക്കു വീഴുമ്പോള്‍ ഞാന്‍ കണ്ടു, അവന്റെ വിഗ്ഗ് പാറിപ്പോവുന്നത്..!’
‘ആരോ എന്റെ കഴുത്തു ഞെരിക്കുന്നതാണ് ഞാന്‍ കണ്ടത്. അവന്റെ വിരലുകള്‍ ചുക്കിച്ചുളിഞ്ഞതായിരുന്നു…’
പിന്നീട് എഴുത്തുകാര്‍ ഉറങ്ങാന്‍ കിടന്നെങ്കിലും ഇടയ്ക്കിടയ്ക്ക് പുതപ്പിന്‍ വിടവിലൂടെ പാളിനോക്കി. യാത്രയില്‍ അവര്‍ ഉറങ്ങിയതേയില്ല.