Monday
25 Jun 2018

മൊട്ടമാഷ്

By: Web Desk | Sunday 18 March 2018 10:33 AM IST

ശിവദാസന്‍ എ കെ

സിവില്‍ സ്റ്റേഷന്‍ വരാന്തയിലെ തിരക്ക് വകഞ്ഞു മാറ്റി തിടുക്കത്തില്‍ നടക്കുമ്പോഴാണ് ആളെ കണ്ടത്.
കഷണ്ടിത്തലയാണ് ആദ്യം ശ്രദ്ധയില്‍പ്പെട്ടത്.
ട്രഷറിയുടെ കവാടത്തില്‍ ആരോടൊ എന്തോ സംസാരിച്ചു കൊണ്ട് നില്‍ക്കുകയാണ്.
മൊട്ടമാഷ്.
അത് ഇരട്ടപ്പേരാണ്. കണക്കു നന്നായി പഠിപ്പിക്കുകയും പഠിക്കാഞ്ഞാല്‍ നന്നായി തല്ലുകയും ചെയ്തിരുന്നതിന് കുട്ടികളിട്ട വിളിപ്പേരാണത്. അന്നേ അദ്ദേഹത്തിനുള്ളതാണ് ഈ കഷണ്ടിത്തല. യഥാര്‍ത്ഥ പേര് ആനന്ദനെന്നാണ്.
എത്രയോ നാളായി കണ്ടിട്ട്. എന്തെങ്കിലും സംസാരിക്കണോ. ഒരു നിമിഷം ആലോചിച്ചു നിന്നു.
വേണ്ട ഓര്‍മ്മ കാണില്ല. എത്രയോ കാലമായി . പ്രൈമറി ക്‌ളാസ്സില്‍ പഠിപ്പിച്ചതാണ്. ഊരും പേരുമൊക്കെ പറഞ്ഞ് പരിചയപ്പെടുത്തേണ്ടി വരും. ഈ തിരക്കിലത് വയ്യാവേലിയാകും.
വീണ്ടും മുന്നോട്ട് നടന്നു.
ഓഫീസ് കാര്യങ്ങള്‍ കഴിഞ്ഞ് തിരിച്ചു വന്നപ്പോഴാണ്. സിവില്‍ സ്റ്റേഷനു മുന്നിലെ വീതിയേറിയ റോഡ് മുറിച്ചു കടക്കാന്‍ പെടാപ്പാടുപെടുകയാണ് മാഷ്.
ഇദ്ദേഹം ഇതു വരെ പോയില്ലേ.
എന്തോ ഒരു ഉള്‍പ്രേരണയാല്‍ ചെന്ന് കൈ പിടിച്ചു.
” പോരെ ഞാന്‍ കടത്തി വിടാം.”
തലങ്ങും വിലങ്ങും പാഞ്ഞു വന്ന വാഹനങ്ങള്‍ക്കിടയിലൂടെ റോഡ് മുറിച്ചുകടക്കുമ്പോള്‍ കൈയില്‍ പിടുത്തം മുറുകുന്നതറിഞ്ഞു.
സ്‌കൂളിനു മുന്നിലെ റോഡ് മുറിച്ചു കടക്കാന്‍ ഞങ്ങളെ മാഷ് സഹായിക്കാറുള്ളത് പെട്ടെന്നോര്‍മ്മ വന്നു.
കാലം മാഷെ കുട്ടിയാക്കിയതു പോലെ.
അപ്പുറത്തെത്തിയപ്പോള്‍ മാഷ് നന്ദിപൂര്‍വ്വം മുഖത്ത് നോക്കി പുഞ്ചിരിച്ചു.
എന്തെങ്കിലും പറയണോ.
ഏയ്. വേണ്ട.
തിരികെ ഒരപരിചിതത്വത്തിന്റെ പുഞ്ചിരി സമ്മാനിച്ച് തിരിച്ചു നടക്കവെ കാതില്‍ ആ സ്വരം വന്നു വീണു.
”നാല് എ യിലെ മണികണ്ഠന്‍. അല്ലേ.”