Wednesday
21 Nov 2018

വിലക്ക്

By: Web Desk | Sunday 24 June 2018 8:15 AM IST

അക്ബര്‍

നീ നയതന്ത്ര ബന്ധം
വിച്ഛേദിച്ച രാജ്യമാണ് ഞാന്‍
എന്റെ ആകാശങ്ങളില്‍
നിന്റെ വിമാനങ്ങള്‍ ഇരമ്പുന്നില്ല

എന്റെ തുറമുഖത്ത്
നിന്റെ കപ്പല്‍ പായകള്‍ ഇളകുന്നില്ല

വിവരങ്ങളോ വിനിമയമോ ഇല്ലാതെ
ഒറ്റപ്പെട്ട മരുഭൂമി

അനിഷ്ടത്തിന്റെ, നിര്‍വ്വികാരതയുടെ
പതാകകള്‍ മാത്രം

പ്രണയ ഉച്ചകോടിയില്‍
എനിക്കായി ആരും വാദിച്ചില്ല

സങ്കടങ്ങള്‍ ഉരുണ്ടുകൂടുമ്പോള്‍
പകയുടെ ടാങ്കറുകള്‍
തുരുതുരെ എന്നിലേക്ക്..

നിശ്ശബ്ദത ദേശീയതയാക്കി
ചുരുണ്ടുകൂടുന്ന ഒരു രാഷ്ട്രം

ഇനിയുള്ളത് മിസൈലുകളുടെയും
ബോംബുകളുടെയും ചുംബനം

മരുഭൂമിയായി മലരുമ്പോള്‍
പതിക്കട്ടെ നിന്റെ ഉപരോധ പ്രേമം..

അക്ബര്‍
ആളത്തില്‍
നേര്യമംഗലം-തപാല്‍
നേര്യമംഗലം
എറണാകുളം-ജില്ല
പിന്‍-686 693
ഫോണ്‍: 8547625570, 7907472542
[email protected]