Monday
10 Dec 2018

ഈ ഗ്രാമത്തില്‍ എല്ലാവരും പക്ഷികളെപ്പോലെ!

By: Web Desk | Tuesday 13 March 2018 7:51 PM IST

അങ്കാറ: ആരും പരസ്പരം സംസാരിക്കാത്ത ഈ ഗ്രാമം ഇന്ന് യുനെസ്‌കോ പട്ടികയില്‍ ഇടം നേടിയതിലൂടെ ശ്രദ്ധേയമായിരിക്കുകയാണ്. സംസാരത്തിന് ഇവര്‍ തെരഞ്ഞെടുത്ത ഭാഷയാണ് ഈ നേട്ടത്തിന് അവരെ അര്‍ഹമാക്കിയിരിക്കുന്നത്.
പക്ഷികളുടേയതിന് സമാനമായ ഭാഷയാണ് ഇവര്‍ ആശയസംവാദത്തിന് ഉപയോഗിക്കുക എന്നതാണ് ഏറെ കൗതുകകരം. തുര്‍ക്കിയിലെ കനാക്‌സി ജില്ലയിലെ കുസ്‌കോയ് ഗ്രാമത്തിലെ ജനങ്ങളാണ് അസാധാരണ ശബ്ദം ആശയവിനിമയത്തിന് ഉപയോഗിക്കുന്നത്. നഷ്ടപ്പെട്ടുകൊണ്ടിരിക്കുന്ന ഗ്രാമവാസികളുടെ ഈ പക്ഷിഭാഷാ പൈതൃകം സംരക്ഷിക്കുന്നതിനായാണ് യുനസ്‌കോ ഗ്രാമത്തിന് പ്രത്യേക പരിഗണന നല്‍കിയിരിക്കുന്നത്.

In Turkey They Don't Speak, They Whistle

These Turkish villagers have a secret language ?

Posted by Vocativ on Sunday, December 24, 2017

കുന്നും മലയും നിറഞ്ഞ കനാക്‌സി പ്രവിശ്യയില്‍ 10,000 ആളുകളാണ് വസിക്കുന്നത്. മലനിരകളില്‍ പരസ്പരം കാണാന്‍ പറ്റാത്ത ദൂരെ നില്‍ക്കുന്ന ആളുകളുമായി പോലും ഈ പക്ഷിഭാഷയിലൂടെ സംസാരിക്കാന്‍ ഈ ഗ്രാമവാസികള്‍ക്ക് സാധിക്കും. 500 വര്‍ഷം മുമ്പ് ഓട്ടോമന്‍ സാമ്രാജ്യകാലത്തോളം പഴക്കമുണ്ട് ഗ്രാമവാസികളുടെ ഈ പക്ഷിഭാഷയ്ക്ക്. വിസില്‍ അഥവാ ഉച്ചത്തില്‍ ചൂളമിടുന്നതിലൂടെയാണ് ആശയവിനിമയം നടത്തുന്നത്. എന്നാല്‍ ആധുനിക ആശയവിനിമയ സാങ്കേതിക വിദ്യകളുടെ വളര്‍ച്ച ഈ പാരമ്പര്യത്തിന് കടുത്ത ഭീഷണിയായിരിക്കുകയാണ്.
നൂറ്റാണ്ടുകളായി തലമുറകള്‍ കൈമാറിയാണ് ഈ ഭാഷ നില നിന്നുപോന്നത്. ഇന്ന് ഈ ഭാഷയറിയുന്നവര്‍ വിരളമാണ്. പലര്‍ക്കും പ്രായമാവുകയും ചെയ്തു. യുവാക്കള്‍ക്ക് ഈ ഭാഷ പഠിക്കുന്നതിലോ ഭാഷയെ കാലത്തിനനുസരിച്ച് പരിഷ്‌കരിക്കുന്നതിനോ താല്‍പര്യവുമില്ല. വരുന്ന കുറച്ച് തലമുറകള്‍ക്കുള്ളില്‍ തന്നെ ഈ ഭാഷ വിസ്മൃതിയിലേക്ക് മടങ്ങുകയും ചെയ്‌തേക്കുമെന്ന് ഈ ഗ്രാമവാസികള്‍ക്ക് ആശങ്കയുണ്ട.
ഭാഷ സംരക്ഷിക്കുന്നതിനായി ഇന്ന് ഗ്രാമവാസികളെ ഈ ഭാഷ പരിശീലിപ്പിക്കുന്നുണ്ട്. 2014 മുതല്‍ തന്നെ പ്രൈമറി സ്‌കൂള്‍ തലത്തില്‍ ഈ പക്ഷി ഭാഷ പഠിപ്പിക്കുന്നുമുണ്ട്.
വാക്കുകള്‍ മുതല്‍ വാക്യങ്ങള്‍ വരെയും കവിതപോലെ സുന്ദരമായ ഈ ഭാഷയിലൂടെ മറ്റുള്ളവരിലേയ്ക്ക് എത്തിക്കാന്‍ കഴിയും. ഓരോ പേരിനും ഓരോ തരത്തിലുള്ള ചൂളംവിളികളാണുള്ളത്.
താഴ്‌വരകളില്‍ നിന്ന് താഴ്‌വരകളിലേയ്ക്ക് പ്രതിധ്വനിക്കുന്ന ഈ ചൂളം വിളികള്‍ ഗ്രാമവാസികളുടെ ആത്മാവിന്റെ ഒരു ഭാഗംതന്നെയാണ്. ഒരു സംസ്‌കാരത്തിന്റെ മുഴുവന്‍ പ്രതീകമായ ഈ ഭാഷയെ ചേര്‍ത്ത് പിടിക്കുന്നതിനുള്ള ശ്രമത്തിലാണ് ഈ ഗ്രാമവാസികള്‍.