December 2, 2022 Friday

‘മര’ ചിന്തുകൾ

സുബൈർ പടപ്പിൽ
August 7, 2022 3:05 am

തണലായിരുന്നു ഞാൻ — വെറും
മരമായിരുന്നില്ല
മരമായിരുന്നു- വെറും
തണലായിരുന്നില്ല
മരമല്ല തണലല്ല തണിയല്ല
ശ്വസിക്കാനിനിയും ബാക്കിയാവേണ്ട
വായു വാഹകനാകുന്നു ഞാൻ
പ്രകൃതിയുടെ തുടിപ്പിൽ മടുപ്പില്ലാതെ
മതിയാവോളം മണ്ണിൽ നിന്നും
ചുരത്തിതരുന്നു നീരുറവ ‑എന്നിട്ടും
ഞാൻ വെറും മരം പോലെ
മരവിച്ചു നിന്നില്ല
കൊടുങ്കാറ്റുയർത്തുന്ന ഭീതിയെ
ഈ കരങ്ങളാൽ തഴുകി തഴുകി
തെന്നലായ് മാറാൻ മരം പോലെ
നിലകൊണ്ടിരുന്നീ ഞാൻ
നിരത്തുകൾ വമിക്കും വിഷപ്പുക വിഴുങ്ങി
നരച്ചു പോയെൻ ശിരസുകളെങ്കിലും
നിവൃത്തികേടില്ലാതെയി പാതയോരത്ത്
തരത്തിനൊപ്പം നിന്നിടുന്നു മരമായ് ഞാൻ
ചില്ലയിൽ കൂടു കുട്ടിയ പറവതൻ കലപില
ചോട്ടിൽ കുളിരൂറും തണൽ തേടും പഥികരും
പാത തൻ വികസനം പകുതി വഴിയെൻ പഴി
വാതോരാ കേട്ടെൻ തളിരിലയും കൊഴിഞ്ഞു
തീർന്നൊടുക്കമീ പാഴ് തടിക്കടയ്ക്കൽ യന്ത്ര-
ത്തല നീർത്തി വന്നിടുന്നു
ഒടുക്കം വീഥിയും വീർത്തൊരുനാളെൻ
വിധി വന്നു തീർപ്പായ് വാഹനപ്പുറത്തേറി
വിശ്രമസ്ഥാനം ലക്ഷ്യം വെച്ചോടുന്നു
ഇന്ന് ഞാൻ വെറും ഒരു മരം മാത്രം
കാലങ്ങൾക്ക് മറവിയുടെ തളിരിടും പാഴ്മരം
മരമാണ് വെറും മരമല്ല തണലാണ്
പറവകൾ കൂരയണഞ്ഞതെൻ വിരിമാറിലാണ്
മർത്യർ കുളിരോടെ കോൾമയിൽ
കൊണ്ടതുമെൻ ചോട്ടിലാണ്
ഞാനൊരു മരമാണ് വെറും മരം 

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.