Friday
19 Jul 2019

അക്ഷരങ്ങളെ അമൃതാക്കിയ അബൂബേക്കര്‍ കുഞ്ഞ്

By: Web Desk | Sunday 7 July 2019 7:53 AM IST


പി. ഉഷാകുമാരി

വായനശാലകളും ഗ്രന്ഥപ്പുരകളും വഴിവക്കിലെ പൂമരങ്ങളാണെന്നത് കവി വചനം. അതില്‍ നിന്നും അടര്‍ന്നു വീഴുന്നത് അറിവും ജിജ്ഞാസയുമാണ്. ഗ്രന്ഥശാലയാകുന്ന പൂമരത്തെ നട്ടുനനച്ച് വെള്ളവും വളവും നല്‍കി സംരക്ഷിച്ചു പോരുന്ന നിസ്തുലനായ ഗ്രന്ഥശാലാ പ്രവര്‍ത്തകനെ ഗ്രാമീണതയുടെ ചാരുത ചാര്‍ത്തി ഇങ്ങനെ അടയാളപ്പെടുത്താം; കൊല്ലം കണ്ണനല്ലൂര്‍ എ അബൂബക്കര്‍ കുഞ്ഞ്.
പുതിയ തലമുറയ്ക്ക് ദിശാബോധം നല്‍കുന്നതിനും അറിവ് പകരുന്നതിനും തന്റെ ജീവിതയാത്രയിലുടനീളം നിശബ്ദമായി ഗ്രന്ഥശാലാ പ്രവര്‍ത്തനം നിര്‍വഹിച്ചു വരുന്ന അക്ഷര സ്‌നേഹിയായ മനുഷ്യന്‍. ജാതിയ്ക്കും മതത്തിനും അതീതമായി ചിന്തിക്കുകയും വായനയിലൂടെ മാത്രമേ സാമൂഹ്യ ബോധത്തിന്റെയും നന്മയുടെയും വാടാത്ത മലരുകള്‍ കൊണ്ട് വസന്തം തീര്‍ക്കാനാവൂ എന്ന് സ്വന്തം അനുഭവത്തിലൂടെ സമൂഹത്തിനു കാട്ടികൊടുത്ത അബൂബേക്കര്‍ കുഞ്ഞ് ഒരു സമ്പൂര്‍ണ്ണ വായനക്കാരനാണ്. പത്രങ്ങളും ജീവിത സ്പര്‍ശിയായ നോവലും കഥയും കവിതയും നിരക്ഷരരായ ഗ്രാമീണരെ വായിച്ചു കേള്‍പ്പിച്ചു കൊണ്ടാണ് അദ്ദേഹം ഗ്രന്ഥശാലാ പ്രവര്‍ത്തനത്തിന് തുടക്കമിട്ടത്. വായനയിലൂടെ പകരം വയ്ക്കാനാവാത്ത അനുഭൂതി നുകര്‍ന്നവര്‍ അക്ഷരങ്ങളെ തേടി വായനശാലയിലേക്ക് വരികയായിരുന്നു.
കണ്ണനല്ലൂരില്‍ ആദ്യത്തെ ലൈബ്രറി ഉദ്ഘാടനം ചെയ്യപ്പെട്ട 1954 ല്‍ കേവലം പതിനാലു വയസ്സുള്ള അബൂബേക്കര്‍ കുഞ്ഞ് വായനശാലയായി പ്രവര്‍ത്തിച്ച കുടുസു മുറികളില്‍ ഇരുന്ന് പത്രം ഉറക്കെ വായിക്കും. അത് കേള്‍ക്കാന്‍ അക്ഷരം പഠിച്ചിട്ടില്ലാത്ത ഗ്രാമവാസികള്‍ അടുത്തുകൂടി; അതൊരു സാംസ്‌കാരിക വിപ്ലവത്തിന് നാന്ദികുറിക്കലായിരുന്നു. അന്ന് ലൈബ്രറി പ്രവര്‍ത്തനം ആരംഭിച്ച കടമുറി തുറക്കുകയും അടയ്ക്കുകയും തൂത്തുവാരുകയും ചെയ്യുന്ന ജോലി ഒരാനന്ദലഹരിയായി അദ്ദേഹം സ്വയം ഏറ്റെടുത്തു. മുതിര്‍ന്നവര്‍ക്ക് കേള്‍ക്കാനായി പത്രങ്ങളും ആനുകാലികങ്ങളും ഉറക്കെ വായിച്ചു. ലൈബ്രേറിയന്‍ ഇല്ലാത്ത അക്കാലത്ത് പുസ്തകമെടുക്കാന്‍ ആളുവരുമെന്ന് പ്രതീക്ഷിച്ച് കാത്തിരുന്നു. ആരും വന്നില്ല. ”മലതേടി മമ്മത് വന്നില്ലെങ്കില്‍ മമ്മതിനെ തേടി മല വരുന്നതു” പോലെ അദ്ദേഹം പുസ്തകങ്ങള്‍ തലച്ചുമടാക്കി വീടുകള്‍ തോറും കൊണ്ടു നടന്നു കൊടുത്തു.

Aboobakker kunju

അബൂബക്കര്‍ കുഞ്ഞ് കോളജിലെത്തിയപ്പോഴേക്കും ആദ്യത്തെ ലൈബ്രറിയുടെ പ്രവര്‍ത്തനം നിലച്ചു. പിന്നീട് ഏതാനും ചെറുപ്പക്കാര്‍ ചേര്‍ന്ന് പ്രോഗ്രസീവ് ലൈബ്രറിക്ക് രൂപം നല്‍കി. തുടര്‍ പ്രവര്‍ത്തനത്തില്‍ അത് പിന്നോക്കം പോയി. നേരിന്റെയും പ്രത്യാശയുടെയും തീക്കാറ്റ് പടര്‍ത്തികൊണ്ട് ‘സലാം സേവാസംഘം’ എന്ന സാമൂഹ്യ പരിഷ്‌കരണ പ്രസ്ഥാനം പടുത്തുയര്‍ത്തി. പി എ എ സലാം പ്രസിഡന്റും അബൂബക്കര്‍ കുഞ്ഞ് സെക്രട്ടറിയുമായുള്ള പ്രസ്ഥാനത്തിന്റെ മുഖ്യ പ്രവര്‍ത്തനം സാമൂഹ്യ സേവനമായിരുന്നു. ഗ്രാമങ്ങള്‍ ശുചീകരിക്കുക, പാവപ്പെട്ടവരെ സഹായിക്കുക, സാക്ഷരതാ പ്രവര്‍ത്തനം നടത്തുക, ഓടകള്‍ വൃത്തിയാക്കുക പുരകെട്ടി മേഞ്ഞുകൊടുക്കുക തുടങ്ങി അന്നുവരെ ആരും ചെയ്തിട്ടില്ലാത്ത ജനസേവനത്തിലൂടെ സലാം സേവാ സംഘത്തിന് ജനങ്ങളുടെയിടയില്‍ അംഗീകാരം നേടാനായി. അതോടൊപ്പം കടമുറിയുടെ മുന്നില്‍ ‘വായനശാല’ എന്നൊരു ബോര്‍ഡ് വച്ച് പ്രവര്‍ത്തനവും തുടങ്ങി. അപ്പോഴേക്കും പ്രോഗ്രസ്സീവ് ലൈബ്രറി സലാം സേവാ സംഘത്തില്‍ ലയിച്ചു.
വായനയുടെ വാതായനങ്ങള്‍ തുറന്നിട്ടുകൊണ്ട് ‘മലയാള രാജ്യം’ ദിനപത്രം ആദ്യമെത്തി. തൊട്ടടുത്ത ബാര്‍ബര്‍ഷാപ്പില്‍ നിന്നും ‘ജനയുഗം’ കൂടി വായനശാലയിലേക്ക് കൊണ്ടു വന്നു. വായനയുടെ ഉത്സവകാലത്തിന് കേളി കൊട്ടുണരുകയായിരുന്നു. തുടര്‍ന്ന് ലൈബ്രറി പ്രവര്‍ത്തനം മുന്നോട്ടു കൊണ്ടു പോകാനും സ്വന്തമായി കെട്ടിടം നിര്‍മ്മിച്ചെടുക്കുവാനുള്ള പ്രയത്‌നമായി. സമ്പത്ത് കണ്ടെത്തുന്നതിന് പല വഴികളും ആലോചിച്ചു. അങ്ങനെ പഞ്ചായത്ത് മൈതാനിയില്‍ കായിക മത്സരങ്ങള്‍ സംഘടിപ്പിക്കുക വഴി ലൈബ്രറിയുടെ പ്രവര്‍ത്തനം മെച്ചപ്പെടുത്തുവാനുള്ള പദ്ധതികള്‍ക്ക് രൂപം നല്‍കി. കിളിത്തട്ട് കളി, ഫുട്‌ബോള്‍, ബാഡ്മിന്റണ്‍ തുടങ്ങിയവ സ്ഥിരമായി സംഘടിപ്പിച്ചു. കായിക പ്രേമികള്‍ ആവേശത്തോടെ കണ്ണനല്ലൂരിലേക്ക് വന്നു. കേരളത്തിന്റെ പല ഭാഗത്തു നിന്നും മത്സരങ്ങള്‍ കാണുവാന്‍ ആളുകള്‍ എത്തുമ്പോള്‍ കണ്ണനല്ലൂരും പരിസരവും പൂരപ്പറമ്പുപോലെ ഉത്സാഹത്തിലാവും ലൈബ്രറി പ്രവര്‍ത്തനത്തിന് ഇത് കരുത്തു പകര്‍ന്നു.
ഇതിനിടെ സലാം സേവാസംഘം ഗ്രാമീണ സേവാ സംഘമായി. കണ്ണനല്ലൂര്‍ സൗത്തില്‍ പ്രവര്‍ത്തിച്ചിരുന്ന ഒരു വായനശാലയുമായി ഗ്രാന്റിന് തര്‍ക്കമുണ്ടായപ്പോള്‍ അന്നത്തെ ഗ്രന്ഥശാലാ സംഘം സെക്രട്ടറി പി. എന്‍. പണിക്കര്‍, മഹാകവി ജി. ശങ്കരക്കുറുപ്പ്, മുന്‍ സ്പീക്കര്‍ ഗംഗാധരന്‍, പ്രാക്കുളം ഭാസി തുടങ്ങിയവര്‍ ലൈബ്രറി പ്രവര്‍ത്തകരുമായി ഒരു യോഗം ചേരുകയും നിലച്ചുപോയ ലൈബ്രറികളെകൂടി കൂട്ടിചേര്‍ത്ത് ലൈബ്രറിയുടെ പേര് കണ്ണനല്ലൂര്‍ പബ്ലിക് ലൈബ്രറി എന്നാക്കുകയും ചെയ്തു. തുടര്‍ന്ന് ഗ്രന്ഥശാലാ സംഘത്തിന്റെ അംഗീകാരം നേടിയെടുത്തു.

രാവുംപകലും വായനശാലാ പ്രവര്‍ത്തനവുമായി നടന്ന ചെറുപ്പക്കാര്‍ക്ക് ‘ബാധ’ പിടികൂടിയിട്ടുണ്ടെന്നും ഇവര്‍ ‘കിറുക്കന്മാര്‍’ ആണെന്നും വകയ്ക്ക് കൊള്ളരുതാത്തവരാണെന്നും സമൂഹത്തിലെ നല്ലൊരു വിഭാഗം പറഞ്ഞു പരത്തി. പാട്ടും കവിതയും നാടകവുമായി നടക്കുന്നവരെ സമുദായ പ്രമാണിമാര്‍ തീണ്ടാപ്പാടകലെ നിര്‍ത്തി. ഇവര്‍ക്ക് പണം നല്‍കി സഹായിക്കരുതെന്നും ഇവര്‍ സമൂഹത്തിനും സമുദായത്തിനും അനഭിമതര്‍ ആണെന്നും സഹായിക്കുന്നവര്‍ക്ക് പരലോകത്ത് ശിക്ഷ കിട്ടുമെന്നും പ്രഖ്യാപനങ്ങള്‍ ഉണ്ടായി. ഗ്രന്ഥശാലാ പ്രവര്‍ത്തനം ‘ബാധ’ ഉപദ്രവമാണെന്ന് ധരിച്ച് മന്ത്രവാദിയെ കൊണ്ട് തീക്കുണ്ഠം ഉണ്ടാക്കി ബാധ ഒഴിപ്പിക്കല്‍ വരെ നടന്നു.
കവിതയുടെ സാന്ദ്രമായ അനുഭൂതി നുകരും പോലെ ഗ്രന്ഥശാലാ പ്രവര്‍ ത്തനം മുന്നോട്ടുപോയി. ഒരു കാന്തക്കല്ലുപോലെ അബൂബേക്കര്‍ കുഞ്ഞ് വായനശാലയില്‍ എപ്പോഴും ഉണ്ടാവും. ഫലം ഇച്ഛിക്കാതെയുള്ള സാമൂഹ്യ പ്രവര്‍ത്തനമാണല്ലോ ലൈബ്രറി പ്രവര്‍ത്തനം. മനസ്സില്‍ നന്മയുള്ളവര്‍ക്ക് മാത്രം ചെയ്യാന്‍ കഴിയുന്നത്. ഗ്രന്ഥശാലാ പ്രവര്‍ത്തനത്തിന് നവോത്ഥാനമൂല്യങ്ങള്‍ ഉയര്‍ത്തിപ്പിടിക്കുന്ന ഏതൊന്നിനോടും സമരസപ്പെടാന്‍ കഴിയും. ഉടലുതൊട്ട് ഉയിരോളം പിന്തുടരുന്ന നവോത്ഥാന ചിന്തകള്‍ക്ക് പ്രകാശിതമായ ഒരു ഉണര്‍വ്. വായനശാലകളില്‍ നിന്നും ലഭിക്കുന്നു എന്ന് അദ്ദേഹം സാക്ഷ്യപ്പെടുത്തുന്നു.
1974 ലെ ഓണാഘോഷ പരിപാടിയില്‍ കൊല്ലത്തിന്റെ സാംസ്‌കാരിക നായകന്‍ കെ രവീന്ദ്രനാഥന്‍നായര്‍, ഗ്രന്ഥശാലാ പ്രവര്‍ത്തനത്തിന് കര്‍ക്കശ നിലപാടെടുക്കുന്ന മണലില്‍ ജി നാരായണപിള്ള, നോവലിസ്റ്റ് നൂറനാട് ഹനീഫ് തുടങ്ങിയവര്‍ പങ്കെടുക്കുത്ത ചടങ്ങില്‍ ജീര്‍ണ്ണിച്ചു തുടങ്ങിയ ലൈബ്രറി കെട്ടിടം പണി പൂര്‍ത്തീകരിച്ചു കൊടുക്കുമെന്ന് പറഞ്ഞ രവീന്ദ്രനാഥന്‍നായര്‍ മൂന്നര മാസം കൊണ്ട് അത് സഫലീകരിച്ചു. ലൈബ്രറിയുടെ ചരിത്ര മുഹൂര്‍ത്തങ്ങളില്‍ അവിസ്മരണീയമായി നിലകൊള്ളുന്ന ഒന്നായിരുന്നു അത്.
തിരക്കേറിയ കണ്ണനല്ലൂര്‍ ജംഗ്ഷനില്‍ സ്വന്തമായി വസ്തുവും കെട്ടിടവും ‘എ’ ഗ്രേഡ് നിലവാരത്തിലേക്ക് ആവശ്യമായ പുസ്തകങ്ങളും ആനുകാലികങ്ങളും ചിട്ടയായ പ്രവര്‍ത്തനവും വൈകുന്നേരങ്ങളിലെ അഭൂതപൂര്‍വമായ ജനത്തിരക്കും വന്നു ചേര്‍ന്നപ്പോള്‍ ഭരണസമിതിയുടെ ഭാഗമാകുവാന്‍ മത്സരിക്കുന്നവരെയെത്തി കാര്യങ്ങള്‍.
ഒരുകാലത്ത് കണ്ണനല്ലൂരിനെ ‘കാളച്ചന്തയുടെ നാട്’ എന്ന് വിശേഷിപ്പിക്കപ്പെട്ടിരുന്നു. അക്ഷരങ്ങള്‍ അന്യമായിരുന്ന ജനതയ്ക്ക് അറിവ് വെളിച്ചമായി നിന്ന അബൂബക്കര്‍ കണ്ണനല്ലൂരിനെ അക്ഷര ഗ്രാമമാക്കി. വായിക്കുവാനുള്ള മൗലിക അവകാശം നേടിയിട്ടും പുസ്തകത്താളുകള്‍ മറിച്ചു നോക്കാത്ത അക്ഷരം പഠിച്ചവരെ വായനശാലയിലേക്ക് കൊണ്ടുവരാന്‍ അദ്ദേഹത്തിനു കഴിഞ്ഞു.
ശുഭ്രവസ്ത്രധാരിയായ അബൂബേക്കര്‍ കുഞ്ഞ് തികഞ്ഞ ഗാന്ധിയനും പൊതുപ്രവര്‍ത്തനകനുമാണ്. ഏകാങ്ക നാടകങ്ങളും കഥയും ലേഖനവും പ്രസിദ്ധീകരിച്ചിട്ടുണ്ട്. ലൈബ്രറി പ്രവര്‍ത്തന രംഗത്ത് 60 വര്‍ഷം പിന്നിടുമ്പോള്‍ എന്തുകൊണ്ട് മികച്ച ലൈബ്രറി പ്രവര്‍ത്തകനായി അദ്ദേഹത്തെ ആരും തെരഞ്ഞെടുത്തില്ല എന്നത് കാലം നമ്മോട് ചോദിക്കുന്ന ഒരു ചോദ്യമാണ്.