Sunday
21 Jul 2019

പാക് വ്യോമപാത: എയര്‍ ഇന്ത്യക്ക് പ്രതിദിനം 13 ലക്ഷം നഷ്ടം

By: Web Desk | Friday 12 July 2019 10:45 PM IST


ഇസ്‌ലാമാബാദ്: പാകിസ്ഥാന്‍ വ്യോമപാത അടച്ചത് കൊണ്ട് എയര്‍ ഇന്ത്യക്ക് പ്രതിദിനം 13 ലക്ഷം നഷ്ടം സംഭവിക്കുന്നതായി കേന്ദ്ര വ്യോമയാന മന്ത്രി ഹര്‍ദീപ് സിങ് പൂരി. ലോക്‌സഭയെയാണ് മന്ത്രി ഇക്കാര്യം അറിയിച്ചത്. വിമാനങ്ങള്‍ വഴിതിരിച്ചു വിടുന്നത് കൊണ്ട് യാത്രാ സമയം 15 മിനിറ്റ് വര്‍ധിക്കുന്നതായി മന്ത്രി പറഞ്ഞു.
നിരോധനത്തിന്റെ തുടക്കത്തില്‍ പ്രതിദിനം ആറുകോടി നഷ്ടം വന്നതായി എയര്‍ ഇന്ത്യ പറഞ്ഞിരുന്നു.
അതേസമയം വ്യോമപാത തുറന്നു തരണമെന്ന ഇന്ത്യയുടെ ആവശ്യം നിരസിച്ചതായി പാകിസ്ഥാന്‍ ഏവിയേഷന്‍ സെക്രട്ടറി ഷാരൂഖ് നുസ്‌റത് പറഞ്ഞു. പാകിസ്ഥാന്‍ ഏവിയേഷന്‍ സ്റ്റാന്‍ഡിങ് കമ്മിറ്റിക്ക് മുന്നിലാണ് ഇക്കാര്യം വിശദീകരിച്ചതെന്ന് ദ ഡോണ്‍ പത്രം റിപ്പോര്‍ട്ട് ചെയ്തു.
ഇന്ത്യ മുന്നോട്ടുവച്ച യുദ്ധ വിമാനങ്ങള്‍ പിന്‍വലിക്കണമെന്നതാണ് ആവശ്യമെന്ന് ഷാരൂഖ് നുസ്‌റത് വ്യക്തമാക്കി. അതേസമയം വ്യോമപാത അടച്ചിട്ടത് കൊണ്ട് പാകിസ്ഥാനും നഷ്ടം സംഭവിച്ചതായി റിപ്പോര്‍ട്ടുകളുണ്ടായിരുന്നു. വന്‍ സാമ്പത്തിക പ്രതിസന്ധി നേരിടുന്ന പാകിസ്ഥാന് കഴിഞ്ഞ കുറച്ചു ആഴ്ചകളായി ഏകദേശം 688 കോടി നഷ്ടം സംഭവിച്ചെന്നും റിപ്പോര്‍ട്ടുകളുണ്ടായിരുന്നു.
ഫെബ്രുവരി 26ലെ ഇന്ത്യയുടെ ബലാകോട്ട് ആക്രമണത്തെ തുടര്‍ന്നാണ് പാകിസ്ഥാന്‍ വ്യോമപാത അടച്ചത്.

Related News