Friday
18 Oct 2019

എഐടിയുസി ജന്മശതാബ്ദി ദേശീയ സമ്മേളന ഫണ്ട്; മുനിസിപ്പല്‍ കണ്ടിജന്റ് ജീവനക്കാര്‍ ഒരു ദിവസത്തെ വേതനം നല്‍കും 

By: Web Desk | Wednesday 4 September 2019 7:13 PM IST


കോഴിക്കോട്: ഇന്ത്യന്‍ തൊഴിലാളി വര്‍ഗ്ഗത്തിന്റെ ആദ്യത്തെ സമര സംഘടനയായ എ ഐ ടി യു സി യുടെ ജന്മശതാബ്ദി ആഘോഷങ്ങളുടെ സമാപനവും 42-ാം ദേശീയ സമ്മേളനവും 2020 ഏപ്രില്‍ മാസം ആലപ്പുഴയില്‍ നടക്കും. പരിപാടികളുടെ നടത്തിപ്പിനായി കേരളാ സ്റ്റേറ്റ് മുന്‍സിപ്പല്‍ കോര്‍പ്പറേഷന്‍ വര്‍ക്കേഴ്‌സ് ഫെഡറേഷന്‍ (എ ഐ ടി യു സി) മെമ്പര്‍മാര്‍ ഒരു ദിവസത്തെ വേതനം സംഭാവനയായി നല്‍കും. ആലപ്പുഴ ജോര്‍ജ് ചടയംമുറി സ്മാരകത്തില്‍ ഫെഡറേഷന്‍ പ്രസിഡണ്ട് കെ ജി പങ്കജാക്ഷന്റെ അദ്ധ്യക്ഷതയില്‍ ചേര്‍ന്ന ജനറല്‍ കൗണ്‍സില്‍ യോഗമാണ് തീരുമാനമെടുത്തത്.
മുന്‍സിപ്പല്‍ കണ്ടിജന്റ് ജീവനക്കാരുടെ വേതനവും പെന്‍ഷനും പരിഷ്‌കരിക്കണമെന്നാവശ്യപ്പെട്ട് കഴിഞ്ഞ മാര്‍ച്ച് 5 ന് ഫെഡറേഷന്‍ നല്‍കിയ അവകാശപത്രികക്കു മറുപടിയായി സര്‍ക്കാര്‍ ജീവനക്കാരുടെ ശമ്പള പരിഷ്‌കരണത്തോടൊപ്പം തന്നെ നഗരസഭാ കണ്ടിജന്റ് ജീവനക്കാരുടേയും വേതനം -പെന്‍ഷന്‍ എന്നിവ പരിഷ്‌കരിക്കും എന്ന് സര്‍ക്കാര്‍ രേഖാമൂലം നല്‍കിയ ഉറപ്പിനെ യോഗം സ്വാഗതം ചെയ്തു. എന്നാല്‍ ഇക്കാര്യത്തില്‍ വരുത്തുന്ന കാലതാമസത്തില്‍ യോഗം ഉല്‍ക്കണ്ഠ രേഖപ്പെടുത്തുകയും ചെയ്തു. വേതന-പെന്‍ഷന്‍ പരിഷ്‌കരണ നടപടികള്‍ എത്രയും വേഗം ആരംഭിക്കണമെന്ന് യോഗം ആവശ്യപ്പെട്ടു. ജനറല്‍ കൗണ്‍സില്‍ യോഗം 21 അംഗ എക്‌സിക്യൂട്ടീവ് കമ്മറ്റിയെ തെരഞ്ഞെടുത്തു. യോഗത്തില്‍ ജനറല്‍ സെക്രട്ടറി ഡി രഞ്ജിത്ത്കുമാര്‍, ട്രഷറര്‍ പി ഇ ഇസ്മായില്‍, സംസ്ഥാന നേതാക്കളായ പി എസ് നായിഡു (തിരുവനന്തപുരം), കെ എ നവാസ് (മൂവാറ്റുപുഴ), വി ടി ഗോപാലന്‍ (കോഴിക്കോട്) തുടങ്ങിയവര്‍ സംസാരിച്ചു.

Related News