Web Desk

കൊച്ചി

February 28, 2020, 5:23 pm

അരൂജ സ്കൂൾ വിദ്യാർത്ഥികൾക്ക് തിരിച്ചടി: പരീക്ഷ എഴുതാൻ അനുമതി തേടിയുള്ള ഹർജി തള്ളി ഹൈക്കോടതി

Janayugom Online

മാനേജ്മെന്റിന്റെ അനാസ്ഥമൂലം സിബിഎസ്ഇ പത്താംക്ലാസ് പരീക്ഷയെഴുതാൻ കഴിയാതെ പോയ തോപ്പുംപടി  അരൂജ സ്കൂളിലെ വിദ്യാർത്ഥികൾക്ക് ഹൈക്കോടതിയുടെ തിരിച്ചടി. പരീക്ഷയെഴുതാൻ അനുമതി തേടിക്കൊണ്ടുള്ള അരൂജ സ്കൂളിലെ 28 വിദ്യാർത്ഥികളുടെ ആവശ്യം ഹൈക്കോടതി തള്ളി. 24 മുതൽ തുടങ്ങിയ പരീക്ഷ എഴുതാൻ അനുവദിക്കണം എന്നായിരുന്നു ആവശ്യം. എന്നാൽ വിദ്യാർത്ഥികളുടെ ഹർജി നിലനിൽക്കും, പ്രധാന ആവശ്യം മാത്രമാണ് തള്ളിയിരിക്കുന്നത്.

വിദ്യാർത്ഥികളുടെ ഹർജി മാനേജ്മെന്റ് നൽകിയ ഹ‍ർജിയോടൊപ്പം ബുധനാഴ്ച വീണ്ടും പരിഗണിക്കും. 24-ാം തീയ്യതി ആരംഭിച്ച സിബിഎസ്ഇ പത്താം ക്ലാസ് പരീക്ഷയെഴുതാനെത്തിയപ്പോൾ മാത്രമാണ് പരീക്ഷയെഴുതാനാകില്ലെന്ന യാഥാർത്ഥ്യം വിദ്യാർത്ഥികൾ മനസിലാക്കിയത്. വിഷയത്തിൽ സിബിഎസ്ഇയെ ഹൈക്കോടതി രൂക്ഷമായി വിമർശിച്ചിരുന്നു. ലാഭക്കൊതികാരണം നാട്ടിൽ മുഴുവൻ സ്കൂളുകള്‍ തുറന്ന് വിദ്യാർത്ഥികളെ ചൂഷണം ചെയ്യുകയാണെന്ന് ഹൈക്കോടതി വിമർശിച്ചു. സിബിഎസ്ഇ റീജിയണൽ ഡയറക്ടർ സച്ചിൻ ധാക്കൂറിനെ വിളിച്ചുവരുത്തിയായിരുന്നു സിംഗിൾ ബെഞ്ചിന്‍റെ വിമർശനം.

അംഗീകാരമില്ലാത്തെ സ്കൂളുകൾക്കെതിരെ എന്തുകൊണ്ടാണ് സിബിഎസ്ഇ നടപടിയെടുക്കാത്തതെന്ന് കോടതി ചോദിച്ചിരുന്നു. വിദ്യാർഥികൾക്ക് ഒരു വർ‍ഷം നഷ്ടപ്പെടാതിരിക്കാൻ എന്തുചെയ്യാനാകുമെന്ന് ബുധനാഴ്ച അറിയിക്കണമെന്ന് സംസ്ഥാന സർക്കാരിനോട് നേരത്തെ കേസ് പരിഗണിച്ചപ്പോൾ ഹൈക്കോടതി ആവശ്യപ്പെട്ടിരുന്നു. ബുധനാഴ്ച ഇക്കാര്യത്തിൽ ഇത് വരെ സ്വീകരിച്ച നടപടികൾ അടക്കം വ്യക്തമാക്കി വിശദമായ സത്യവാങ്മൂലം നൽകാനും സിബിഎസ്ഇയോട് സിംഗിൾ ബെഞ്ച് ആവശ്യപ്പെട്ടിരുന്നു.

Eng­lish Sum­ma­ry: Aroo­ja school stu­dents plea reject by court

You may also like this video