Web Desk

December 16, 2019, 11:28 am

ഓസ്ട്രേലിയയിൽ വീണ്ടും കാട്ടുതീ: ബ്രിസ്ബെയ്നിൽ താപനില 41.2 ഡിഗ്രി സെൽഷ്യസിലെത്തി, 1981ന് ശേഷമുണ്ടായ ഏറ്റവും ചൂടേറിയ ദിനം

Janayugom Online

സിഡ്നി: നഗരത്തിന് പുറത്ത് വൻ കാട്ടുതീ ഉണ്ടായതായി റിപ്പോർട്ട്. പശ്ചിമ ഓസ്ട്രേലിയയും ക്വീൻസ്‌ലാൻഡിലും കാട്ടു തീ വൻ ഭീഷണി ആണ് ഉയർത്തിയിരിക്കുന്നത്.

ബ്രിസ്ബെയ്നിൽ താപനില 41.2ഡിഗ്രി സെൽഷ്യസിലെത്തി. നഗരത്തിലെ റെക്കോർഡ് ചൂടാണ് ഇത്. 1981ൽ ആണ് ഇതിന് മുമ്പ് ഇതേ ചൂട് രേഖപ്പെടുത്തിയത്.

ന്യൂ സൗത്ത് വെയിൽസിൽ 74 സ്ഥലങ്ങളിൽ തീപടരുന്നുണ്ട്. ജാഗ്രതമുന്നറിയിപ്പ് പുറപ്പെടുവിച്ചിട്ടുണ്ട്. വൂലെമി ദേശീയോദ്യാനത്തിൽ 378,000 ഹെക്ടറിൽ തീ പടരുന്നുണ്ട്. വുഡ്റിഡ്ജ്,സീട്രീസ്, ബ്രേക്ക് വാട്ടർ എസ്റ്റേറ്റ് തുടങ്ങിയ സ്ഥലങ്ങളിലാണ് തീപടരുന്നത്.

രാജ്യത്തെ ദേശീയ ശരാശരി ഊഷ്മാവും റെക്കോർഡ് ഭേദിച്ചിരിക്കുകയാണെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. 40.3 ഡിഗ്രിയാണ് ഇപ്പോൾ രാജ്യത്തെ ശരാശരി താപനില. ഈയാഴ്ച മുഴുവൻ രാജ്യത്ത് ഉഷ്ണവാതമുണ്ടാകുമെന്ന മുന്നറിയിപ്പുമുണ്ട്. ക്വീൻസ്‌ലാൻഡിലെ കുമ്പാരില്ല വനത്തിൽ തീപടരുന്നതിനാൽ പ്രദേശവാസികൾ ഒഴിഞ്ഞ് പോകണമെന്ന് അധികൃതർ നിർദേശിച്ചിട്ടുണ്ട്.

അഗ്നിശമനസേന രംഗത്തുണ്ടെങ്കിലും ഇവർക്ക് എല്ലാം നിയന്ത്രണവിധേയമാക്കാൻ സാധിക്കാത്ത സ്ഥിതിയാണ്.

വെള്ളിയാഴ്ച വരെ ജാഗ്രതാ നിർദേശം തുടരുമെന്നാണ് സൂചന. രാജ്യത്ത് ചിലയിടങ്ങളിൽ താപനില അൻപത് ഡിഗ്രി കടക്കുമെന്നും റിപ്പോർട്ടുണ്ട്.