Janayugom Online
avakashi

അവകാശി

Web Desk
Posted on November 11, 2018, 10:30 am

മൈനാഗപ്പള്ളി ശ്രീരംഗന്‍

കരഞ്ഞില്ല പിഴിഞ്ഞില്ല കണ്ണീരുപൊഴിച്ചില്ല
കരഞ്ഞോണ്ടു ചിരിച്ചില്ല ചിരിച്ചോണ്ടും കരഞ്ഞില്ല
എനിക്കിപ്പം കണ്ണില്ല മൂക്കില്ല നാക്കില്ല
എനിക്കിപ്പം രാവില്ല പകലില്ല വെളിവില്ല
അകത്തെന്നും പൊറത്തെന്നും കറുപ്പെന്നും വെളുപ്പെന്നും
എനിക്കിപ്പം ഞാനാണേ ഞാനെന്നുമറിയില്ല
എനിക്കിപ്പം പകലെല്ലാം രാവായിത്തോന്നുന്നേ
എനിക്കിപ്പം രാവെല്ലാം കടലായി തോന്നുന്നേ
എനിക്കിപ്പം കടലെല്ലാം ഞാനായി തോന്നുന്നേ
എനിക്കെന്നെക്കാണാഞ്ഞു പരക്കം ഞാന്‍ പായുന്നേ
എനിക്കെന്റെ മലയാളം എങ്ങാണ്ടുപോയെന്നേ
എനിക്കെന്റെ മണ്ണിന്റെ മണമിങ്ങുനാറുന്നേ
എനിക്കെന്റെ മലയെല്ലാം മാന്തിക്കുഴിക്കുന്നേ
എനിക്കെന്റെ കാടെല്ലാം കോടാലി തിന്നുന്നേ
എനിക്കെന്റെ പുഴയെല്ലാം തേവിക്കളയുന്നേ
എനിക്കെന്റെ പൂമാനം പൂക്കാതെ പോയെന്നേ
വയലേലപ്പാട്ടിന്റെ വാഴ്ത്താരി ചെലമ്പിച്ചേ
കതിര്‍ചൂടും ക്‌നാവിന്റെ കഴുത്താരുകണ്ടിച്ചേ
നുകവും കലപ്പയും ചിതലിനെ തീറ്റിച്ചേ
പറയും പറക്കൊട്ടേം പരണേലും കേറ്റിച്ചേ
ഉടലെല്ലാം കഴുകന്മാര്‍ കൊത്തിപ്പറിക്കുന്നേ
ഉരിയാടാനാവാണ്ടങ്ങുയിരും പെടയ്ക്കുന്നേ
ഉറക്കെക്കരഞ്ഞാലോ ഊറയ്ക്കിടുമെന്നേ
നെരിപ്പോടുമാടന്മാര്‍ക്കിടിത്തീയുമില്ലെന്നേ
വഴികെട്ടിയടച്ചെന്റെ
വാമൂടിക്കെട്ടല്ലേ
കുടിവെള്ളം മുട്ടിച്ചെന്നെ
കുളിപ്പിച്ചുകെടത്തല്ലേ
തരവഴികള്‍ കണ്ടുമടുത്തൊരു
തലമുറയുമിവിടില്ലേ
അധികാരം കൈയാളുന്നവര്‍
അതുകണ്ടോ കണ്ടില്ലേ
എനിക്കെന്റെ സൂര്യന്റെ വെട്ടം പൊലിച്ചുതാ
എനിക്കെന്റെ ന്‌ലാവിന്റെ കുളിരും പൊതച്ചുതാ
എനിക്കെന്റെ മണ്ണെന്റെ മണ്ണായ് തിരിച്ചുതാ
എനിക്കെന്നെ ഞാനാക്കി വെക്കം തിരിച്ചുതാ