Web Desk

കോട്ടയം

January 04, 2021, 8:44 pm

കോട്ടയത്ത് 8000 താറാവുകള്‍ക്ക് പക്ഷിപ്പനി സ്ഥിരീകരിച്ചു

Janayugom Online

കോട്ടയം നീണ്ടൂരിൽ പതിനാലാം വാർഡിൽ എഴുപതു ദിവസത്തോളം പ്രായമുള്ള എണ്ണായിരം താറാവുകളുള്ള ഫാമില്‍ പക്ഷിപ്പനി സ്ഥിരീകരിച്ചു.ഇന്നലെ വരെ 1700 താറാവുകള്‍ ചത്തു. H‑5 N‑8 എന്ന വൈറസ് രോഗമാണ് താറാവുകളില്‍ സ്ഥിരീകരിച്ചിരിക്കുന്നത്. ഈ പ്രദേശങ്ങളിൽ കൂട്ടത്തോടെ താറാവുകൾ ചത്തിരുന്നു. തുടർന്ന് ഭോപ്പാലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമൽ ഡിസീസസിലേക്ക് സാമ്പിളുകള്‍ പരിശോധനയ്ക്ക് അയച്ചിരുന്നു. എട്ട് സാമ്പിളുകളിൽ അഞ്ച് എണ്ണത്തിൽ രോഗം സ്ഥിരീകരിച്ചു. വൈറസിനുണ്ടാകുന്ന വ്യതിയാനം അനുസരിച്ച മനുഷ്യരിലേക്ക് പകരാൻ സാധ്യതയുണ്ടെങ്കിലും ഇതു വരെ ഈ വൈറസ് മനുഷ്യരിൽ പകർന്നിട്ടില്ലെന്ന് വിദഗ്ധർ വ്യക്തമാക്കുന്നു.

നിലവില്‍ പക്ഷിപ്പനി സ്ഥിരീകരിച്ച ഫാം ഒറ്റപ്പെട്ട സ്ഥലത്തായതിനാൽ രോഗം പടർന്നു പിടിക്കാതെ നിയന്ത്രിക്കാനാകുമെന്നും പ്രതിരോധ നടപടികൾ ആരംഭിച്ചെന്നും ജില്ലാ മൃഗസംരക്ഷണ ഓഫീസർ ഡോ. ഷാജി അറിയിച്ചു. ഇതിന്റെ ഭാഗമായി രോഗബാധയുണ്ടായ ഫാമിൽ ശേഷിക്കുന്ന താറാവുകളെയും ഫാമിനു പുറത്ത് ഒരു കിലോമീറ്റർ ചുറ്റളവിലുള്ള എല്ലാ വളർത്തു പക്ഷികളെയും കൊന്നൊടുക്കുന്ന നടപടികൾക്ക് ഇന്നു രാവിലെ തുടക്കം കുറിക്കും. ഈ ഫാമിനു പുറത്ത് കോഴിയും താറാവും ഉൾപ്പെടെ മൂവായിരം വളർത്തു പക്ഷികൾ ഉള്ളതായാണ് കണക്കാക്കിയിരിക്കുന്നത്. രോഗം മനുഷ്യരിലേക്ക് പകരാതിരിക്കുന്നതിനും ആവശ്യമായ മുൻകരുതൽ നടപടികൾ സ്വീകരിച്ചിട്ടുണ്ടെന്നും ആശങ്ക വേണ്ടെന്നും ജില്ലാ കളക്ടർ എം അഞ്ജന പറഞ്ഞു.

ENGLISH SUMMARY: bird flu in kottayam
You may also like this video