Thursday
23 May 2019

ബിഡിജെഎസിനെ തഴഞ്ഞ് ബിജെപി സ്ഥാനാര്‍ത്ഥിപ്പട്ടിക

By: Web Desk | Wednesday 13 February 2019 6:46 PM IST


സ്വന്തം ലേഖകന്‍

തൃശൂര്‍: എന്‍ഡിഎ സഖ്യകക്ഷിയായ ബിഡിജെഎസിനെ തഴഞ്ഞ് ബിജെപി സ്വന്തം നിലയില്‍ ലോക്‌സഭാ തെരഞ്ഞെടുപ്പിലേക്കുള്ള പ്രാഥമിക പട്ടിക കേന്ദ്ര നേതൃത്വത്തിന് സമര്‍പ്പിച്ചു. ബിഡിജെഎസ് ആവശ്യപ്പെടുന്ന പ്രധാന സീറ്റായ തൃശൂരില്‍ ബിജെപി ജനറല്‍ സെക്രട്ടറി കെ സുരേന്ദ്രന്റെ പേരാണ് സംസ്ഥാന നേതൃത്വം കേന്ദ്രത്തിന് നല്‍കിയിട്ടുള്ളത്. തൃശൂരിലെ പാര്‍ട്ടി ചുമതലയുളള എഎന്‍ രാധാകൃഷ്ണന്റെ പേരും തൃശൂരിലെ സാധ്യതാ പട്ടികയിലുണ്ട്.
തൃശൂര്‍ സീറ്റ് തങ്ങള്‍ക്ക് വേണമെന്ന് ബിഡിജെഎസ് നേരത്തെ ആവശ്യപ്പെട്ടിട്ടുണ്ട്. എന്നാല്‍ തുഷാര്‍ വെള്ളാപ്പള്ളി മത്സരിക്കുകയാണെങ്കില്‍ മാത്രമേ സീറ്റ് വിട്ട് നല്‍കൂ എന്നാണ് ബിജെപി തീരുമാനം. തുഷാര്‍ വെള്ളാപ്പള്ളി മത്സരിക്കില്ലെന്ന് നേരത്തെ വെള്ളാപ്പള്ളി നടേശന്‍ വ്യക്തമാക്കിയതാണ്. ഇതോടെ സഖ്യത്തിന് സ്വാധീനമുള്ള മണ്ഡലങ്ങളിലൊന്നും ബിഡിജെഎസിന് നല്‍കേണ്ടതില്ല എന്ന ബിജെപിയുടെ കണക്കുകൂട്ടലാണ് സാധ്യതാപട്ടികയിലൂടെ വെളിച്ചത്തായത്.

കുമ്മനം രാജശേഖരന്‍, സുരേഷ്‌ഗോപി, മഹേഷ് മോഹനര്, അല്‍ഫോണ്‍സ് കണ്ണന്താനം, ശശികുമാര വര്‍മ്മ തുടങ്ങിയവരൊക്കെ ഇടംപിടിച്ച പട്ടികയാണ് സംസ്ഥാന നേതൃത്വം സമര്‍പ്പിച്ചിട്ടുള്ളത്. ഇതില്‍ തങ്ങളുടെ പക്ഷത്തു നിന്നുള്ളവരുടെ എണ്ണം കുറവാണെന്ന് വി മുരളീധരന്‍പക്ഷം സൂചിപ്പിച്ചു കഴിഞ്ഞു. പട്ടിക കേന്ദ്രത്തിന് കൈമാറും മുമ്പ് സംസ്ഥാനത്ത് വിശദമായ ചര്‍ച്ചകള്‍ നടത്തിയില്ലെന്ന പരാതിയാണ് വി മുരളീധരപക്ഷത്തിനുള്ളത്.
ഒരു മണ്ഡലത്തില്‍ ഏറ്റവും വിജയ സാധ്യതയുളള മൂന്ന് പേരുടെ പേരാണ് പട്ടികയിലുള്ളതെന്ന് സംസ്ഥാന അധ്യക്ഷന്‍ പിഎസ് ശ്രീധരന്‍പിള്ള വ്യക്തമാക്കി. തിരുവനന്തപുരത്തെ സ്ഥാനാര്‍ത്ഥി പട്ടികയില്‍ ആദ്യ പേര് കുമ്മനം രാജശേഖരന്റെതാണ്. രണ്ടാമതായി പട്ടികയില്‍ ഉള്‍പ്പെട്ടിരിക്കുന്നത് സുരേഷ് ഗോപി എംപിയും സംസ്ഥാന അധ്യക്ഷന്‍ പിഎസ് ശ്രീധരന്‍പിള്ളയുടെ പേരും പട്ടികയിലുണ്ട്.

കെ സുരേന്ദ്രനെ ഒന്നാമനായി പരിഗണിക്കുന്നത് തൃശൂര്‍ ലോക്‌സഭാ മണ്ഡലത്തിലാണ്. കാസര്‍കോടും സുരേന്ദ്രന്‍ സാധ്യതയിലുണ്ട്. ശബരിമലവിഷയം ആളിക്കത്തിച്ച് വോട്ടാക്കാം എന്നുകരുതുന്ന മണ്ഡലമായ പത്തനംതിട്ടയില്‍ എംടി രമേശിന്റെ പേരാണ് സ്ഥാനാര്‍ത്ഥി പട്ടികയില്‍ ഇടം പിടിച്ചിരിക്കുന്നത്. ഇവിടെ മഹേഷ് മോഹനര്, കേന്ദ്രമന്ത്രി അല്‍ഫോണ്‍സ് കണ്ണന്താനം, പന്തളം കുടുംബാംഗം ശശികുമാര വര്‍മ്മ എന്നിവരേയുംപരിഗണിക്കുന്നുണ്ട്. തിരുവനന്തപുരത്തിനു പുറമേ കൊല്ലത്തും സുരേഷ് ഗോപിയെ പരിഗണിക്കുന്നുണ്ട്. ശോഭാ സുരേന്ദ്രന്റെ പേര് പാലക്കാട്, ആറ്റിങ്ങല്‍ മണ്ഡലങ്ങളിലേക്കാണ് പരിഗണിക്കുന്നത്. ആറ്റിങ്ങലില്‍ പികെ കൃഷ്ണദാസിന്റെ പേരും പട്ടികയിലുണ്ട്.

അഞ്ച് സീറ്റ് ബിഡിജെഎസിന് നല്‍കാനാണ് ധാരയെന്നും ഏതെക്കെ സീറ്റെന്നത് തുടര്‍ ചര്‍ച്ചക്ക് ശേഷം തീരുമാനിക്കുമെന്നും ബിജെപി അധ്യക്ഷന്‍ പറയുന്നു. എന്നാല്‍ പട്ടിക തയ്യാറാക്കി നല്‍കിയ ശേഷം അവസേഷിക്കുന്ന സീറ്റുകളില്‍ ചര്‍ച്ച നടത്തുന്നത് അപഹാസ്യമെന്ന കാഴ്ചയാണ് ഭിഡിജെഎസിലെ ഒരുവിഭാഗത്തിനുള്ളത്. പട്ടികയിലെ പേരുകളില്‍ കാണുന്ന സാമൂഹിക അസമത്വവും ബിഡിജെഎസിനെ നിരാശപ്പെടുത്തിയിട്ടുണ്ട്. സംസ്ഥാന നേതൃത്വം നിര്‍ദേശിച്ചിരിക്കുന്ന സ്ഥാനാര്‍ത്ഥികളുടെ പട്ടികയാണ് ഇതെന്ന് വ്യക്തമാക്കിയ ശ്രീധരന്‍ പിളള അന്തിമ തീരുമാനം കേന്ദ്ര നേതൃത്വമാണ് എടുക്കുകയെന്ന് പറഞ്ഞു. ബിഡിജെഎസ് നേതാവ് തുഷാര്‍ മത്സരിക്കാന്‍ തയ്യാറാവുകയാണ് എങ്കില്‍ പട്ടികയില്‍ വീണ്ടും മാറ്റം വന്നേക്കുമെന്നും ശ്രീധരന്‍പിള്ള പറഞ്ഞു.

Related News