Web Desk

ലഖ്നൗ

March 14, 2020, 7:05 pm

പൗരത്വ പ്രതിഷേധക്കാരെ ലക്ഷ്യമിട്ട് വീണ്ടും യോഗി; നഷ്ടപരിഹാരം ഈടാക്കാൻ ഓർഡിനൻസ് കൊണ്ടുവരാൻ ബിജെപി

Janayugom Online

പൊതുമുതൽ നശിപ്പിക്കുന്നവരിൽ നിന്ന് നഷ്ടപരിഹാരം ഇടാക്കുന്നത് വ്യവസ്ഥചെയ്യുന്ന ഓർഡിനൻസിന് ഉത്തർപ്രദേശ് സർക്കാർ അംഗീകാരം നൽകി. നിയമം അനുസരിച്ച് പ്രതിഷേധത്തിന്റെയോ സമരത്തിന്റെയോ പേരിൽ പൊതു-സ്വകാര്യ മുതലുകൾ നശിപ്പിക്കപ്പെട്ടാൽ കാരണക്കാരായവരിൽ നിന്ന് നഷ്ടപരിഹാരം ഈടാക്കുന്നത് നിയമപരമായി സാധൂകരിക്കപ്പെടും. മുഖ്യമന്ത്രി യോഗി ആദിത്യനാഥിന്റെ അധ്യക്ഷതിയൽ ചേർന്ന മന്ത്രിസഭാ യോഗമാണ് ഓർഡിനൻസിന് അംഗീകാരം നൽകിയത്. പൗരത്വ ഭേദഗതി നിയമത്തിനെതിരെ പ്രതിഷേധിച്ചവരെ അപമാനിക്കുന്ന തരത്തിൽ യുപി സർക്കാർ പോസ്റ്ററുകൾ പതിപ്പിച്ച നടപടിയെ സുപ്രീംകോടതി രൂക്ഷമായി വിമർശിച്ചിരുന്നു. ഈ പശ്ചാത്തലത്തിലാണ് പൊതുമുതൽ നശീകരണ നഷ്ടപരിഹാര വസൂലാക്കൽ നിയമം 2020 ഓർഡിനൻസിന് സർക്കാർ തിരക്കിട്ട് അംഗീകാരം നൽകിയിരിക്കുന്നത്.

പൗരത്വഭേദഗതി നിയമത്തിനെതിരെ യുപിയിൽ നടന്ന പ്രതിഷേധത്തിനിടയിൽ ഉണ്ടായ കലാപത്തിൽ പൊതുമുതൽ നശിപ്പിക്കപ്പെട്ടു എന്ന പേരിൽ പ്രതിഷേധവുമായി യാതൊരു ബന്ധവുമില്ലാത്തവരുടെയും സാമൂഹ്യപ്രവർത്തകരുടെയും ചിന്തകരുടെയും പേരിൽ സർക്കാർ നഷ്ടപരിഹാരം ഈടാക്കുമെന്ന് കാട്ടി നോട്ടീസ് അയച്ചിരുന്നു.

you may also like this video;


മാത്രമല്ല ഇവരുടെ പേരുകളും ചിത്രങ്ങളും മറ്റും പൊതുഇടങ്ങളിൽ അപമാനകരമാം വിധം പ്രദർശിപ്പിക്കുകയും ചെയ്തിരുന്നു. അലഹബാദ് കോടതി സർക്കാരിന്റെ നടപടിയെ നിശിതമായി വിമർശിക്കുകയും പോസ്റ്ററുകളും മറ്റും അടിയന്തരമായി നീക്കം ചെയ്യണമെന്ന് ഉത്തരവിടുകയും ചെയ്തു. വിധിക്കെതിരെ യോഗി സർക്കാർ സുപ്രിംകോടതിയിൽ ഹർജി നൽകി.

എന്നാൽ സുപ്രിം കോടതിയിലും വൻ തിരിച്ചടിയാണ് യോഗി സർക്കാരിന് ഉണ്ടായത്. യോഗി സർക്കാരിന്റെ നടപടിയെ പിന്തുണയ്ക്കുന്ന ഒരു നിയമവും നിലവിലില്ലെന്നാണ് സുപ്രീംകോടതി നിരീക്ഷിച്ചത്. ഇത്തരം പോസ്റ്ററുകൾ പതിപ്പിക്കാൻ സർക്കാരിന് അധികാരമുണ്ടോയെന്നും ഹർജിക്കാർക്ക് വേണ്ടി ഹാജരായ സോളിസിറ്റർ ജനറൽ തുഷാർ മേത്തയോട് കോടതി ചോദിച്ചിരുന്നു. പരമോന്നത കോടതിയിൽ നിന്നുണ്ടായ നാണക്കേട് മാറ്റുവാനായാണ് പുതിയ ഓർഡിനൻസ് യോഗി സർക്കാർ തിടുക്കപ്പെട്ട് പുറപ്പെടുവിച്ചിരിക്കുന്നത്. കലാപത്തിലും സംഘർഷങ്ങൾക്കുമിടിയിൽ പൊതുമുതൽ നശിപ്പിക്കപ്പെട്ടാൽ അതിന് ഉത്തരവാദികളായവരിൽ നിന്ന് നഷ്ടപരിഹാരം ഈടാക്കണമെന്ന സുപ്രീംകോടതി ഉത്തരവിന്റെ അടിസ്ഥാനത്തിൽ തന്നെയാണ് യുപി സർക്കാർ ഓർഡിനൻസ് പുറപ്പെടുവിച്ചിരിക്കുന്നതെന്നാണ് യുപി മന്ത്രിമാരായ സുരേഷ് കുമാർ ഖന്നയും സിദ്ധാർത്ഥ് നാഥ് സിങും മാധ്യമങ്ങൾക്ക് നൽകിയ വിശദീകരണം.