Web Desk

തിരുവനന്തപുരം

January 23, 2021, 2:04 pm

കോണ്‍ഗ്രസ് പ്രസിഡന്‍റ് തെരഞ്ഞെടുപ്പ്; പ്രഹസനമായ ഓണ്‍ലൈന്‍ വര്‍ക്കിംഗ് കമ്മിറ്റി

Janayugom Online

കോൺഗ്രസ് പ്രസിഡൻറിനേയും, പ്രവർത്തക സമിതി തെരഞ്ഞെടുപ്പും നടത്തണമെന്ന് പാർട്ടിയിലെ 23 അംഗങ്ങൾ കത്തിലൂടെ ആവശ്യപ്പെട്ടിരുന്നു. എന്നാൽ ഇതു സംബന്ധിച്ച് യാതൊരു നടപടിയും എടുക്കാൻ കോൺഗ്രസ് നേതൃത്വം തയ്യാറായില്ല. പാർട്ടിയിൽ ജനാധിപത്യം വേണമന്നാവശ്യപ്പെടുന്നവരെ ആക്ഷേപിക്കുന്ന നിലപാടാണ് സോണിയ‑രാഹുൽ ഭക്തർ നടത്തിയത്. അധ്യക്ഷനെ ചൊല്ലി തമ്മിലടി തുടരവെ അവസാനം സംഘടനാതെരഞ്ഞെടുപ്പ് ചർച്ച ചെയ്യാൻ വിളിച്ച ഓൺലൈൻ പ്രവർത്തകസമിതി യോഗത്തിലും മുതിർന്ന കോൺ​ഗ്രസ് നേതാക്കളുടെ വാക്പോര് സജീവമായി.

അധ്യക്ഷനെ തെരഞ്ഞെടുപ്പിലൂടെ ഉടൻ കണ്ടെത്തണമെന്ന് ഒരു വിഭാഗം ആവശ്യപ്പെട്ടപ്പോൾ കേരളത്തിലടക്കമുള്ള നിയമസഭാ തെരഞ്ഞെടുപ്പ് കഴിഞ്ഞുമതി അധ്യക്ഷതെരഞ്ഞെടുപ്പെന്ന് കുടുംബവാഴ്ചാവാദികൾ ആവശ്യപ്പെട്ടു. അവരിൽ പ്രമുഖൻ എ കെ ആന്റണി ആയിരുന്നു. അദ്ദേഹത്തിനൊപ്പമാണ് കേരളത്തിൽ നിന്നുള്ള മറ്റ് രണ്ട് പ്രവർത്തകസമിതി അംഗങ്ങളായ സംഘടനാജനറൽ സെക്രട്ടറികൂടിയായ കെ സി വേണുഗോപാലും, ഉമ്മൻചാണ്ടിയും. രാജ്യസഭാ പ്രതിപക്ഷ നേതാവ് ഗുലാംനബി ആസാദ്, ആനന്ദ് ശർമ്മ, മുകുൾ വാസ്നിക്ക്, പി ചിദംബരം എന്നിവരാണ് അധ്യക്ഷ തെരഞ്ഞെടുപ്പിനായി വാദിച്ചത്. ലോക്‌സഭാ തെരഞ്ഞെടുപ്പ് തോൽവിക്കുശേഷം നാഥനില്ലാത്ത നിലയിലാണ് കോൺഗ്രസ്. രണ്ടുവർഷത്തോളം അധ്യക്ഷനില്ലാത്ത അവസ്ഥ പരിതാപകരമാണെന്നും ഗുലാംനബി അടക്കമുള്ള നേതാക്കൾ തുറന്നടിച്ചു.

2019ലെ ലോക്‌സഭാ തെരഞ്ഞെടുപ്പിലെ കനത്ത തോൽവിക്ക് പിന്നാലെ അധ്യക്ഷസ്ഥാനമൊഴിഞ്ഞ രാഹുലിന്റെ മനസ്സ് മാറ്റാനുള്ള ശ്രമത്തിലാണ് കുടുംബവാഴ്ച വാദികൾ. എന്നാൽ, അധ്യക്ഷപദവി ഏറ്റെടുക്കാനുള്ള ധൈര്യത്തിലേക്ക് രാഹുൽ എത്തിയിട്ടില്ല. രാജ്യത്ത് കോൺഗ്രസ് സംഘടനാപരമായി ഏറെ ദുർബലമാണ്. താഴെതട്ടിലൊന്നും പ്രവർത്തനങ്ങൾ ഇല്ല. രാഹുൽ ഇല്ലെങ്കിൽ പ്രിയങ്ക വന്നാലും മതിയെന്നു വാദിക്കുന്നവരാണ് ആൻറണിയെപോലെയുള്ളവർ. ബിജെപിക്കെതിരെ ദേശീയ തലത്തിൽ നിലപാട് സ്വീകരിക്കുന്ന കോൺഗ്രസ് പ്രസിഡൻറിനെ ബിജെപിയെ എല്ലാ തരത്തിലും ശക്തമായി എതിർക്കുന്ന എൽഡിഎഫിന് സ്വാധീനമുള്ള കേരളത്തിലെ വയനാട്ടിൽ കൊണ്ടു വന്നുമത്സരിപ്പിച്ചതിൻറെ പിന്നിലും ആൻറണിയുടെ ബുദ്ധിയാണെന്നു പരക്കെ സംസാരമുണ്ട്. രാഹുൽ ഇല്ലെങ്കിൽ പ്രിയങ്ക അധ്യക്ഷയായാലും മതിയെന്നനിലപാടിലാണ് ആൻറണിയും കൂട്ടരും. എന്നാൽ സോണിയ ഇതിനോട് യോജിക്കുന്നില്ല. അനാരോഗ്യം അലട്ടുന്ന സോണിയ ഇടക്കാല അധ്യക്ഷപദവി ഒഴിയാൻ താൽപ്പര്യപ്പെടുകയുമാണ്. രാഹുലിന് മനംമാറ്റമുണ്ടാകുംവരെ അധ്യക്ഷതെരഞ്ഞെടുപ്പ് നീട്ടുകയെന്ന തന്ത്രമാണ് ആന്റണിയടക്കമുള്ളവർ പയറ്റുന്നത്.

കോൺഗ്രസിൽ അടിമുടി മാറ്റം ആവശ്യപ്പെട്ട് 23 മുതിർന്ന നേതാക്കൾ ആഗസ്തിൽ കത്തയച്ചപ്പോൾ കുടുംബവാഴ്ച വാദികൾ ഞെട്ടി. കത്ത് മാധ്യമങ്ങൾക്ക് ചോർത്തി ഇവർ തന്നെ ഇത് വിവാദമാക്കുകയും അച്ചടക്കലംഘനമെന്ന ഭീഷണി കത്തയച്ചവർക്കെതിരായി ഉയർത്തുകയും ചെയ്തു. ഏത് നടപടിയും നേരിടാൻ ഒരുക്കമെന്ന് ഗുലാംനബി അടക്കമുള്ള നേതാക്കൾ വ്യക്തമാക്കിയതോടെ അച്ചടക്കനടപടി എന്ന ഉമ്മാക്കി കുടുംബവാഴ്ച വാദികൾ മടക്കി. സ്വതവേ ദുർബലമായ ഘട്ടത്തിൽ ഇരുപതിലേറെ മുതിർന്ന നേതാക്കൾക്കെതിരായി നടപടിയെടുത്താലുണ്ടാകുന്ന പ്രത്യാഘാതം ആന്റണിക്കും സംഘത്തിനും ബോധ്യമുണ്ട്. ഒടുവിൽ സോണിയ തന്നെ കത്തയച്ചവരുമായി ചർച്ച നടത്തി ഉടൻ തെരഞ്ഞെടുപ്പ് നടത്താമെന്ന ഉറപ്പ് നൽകി. പ്രവർത്തകസമിതി തെരഞ്ഞെടുപ്പ് പ്രഖ്യാപിക്കുമെന്ന പ്രതീക്ഷയാണ് പൊതുവിലുണ്ടായിരുന്നത്.

എന്നാൽ, തെരഞ്ഞെടുപ്പ് അതോറിറ്റി തലവനായ മധുസൂദൻ മിസ്ത്രിയെ സ്വാധീനിച്ച കുടുംബവാഴ്ച വാദികൾ തെരഞ്ഞെടുപ്പ് മെയ് അവസാനത്തിലേക്ക് മാറ്റി. കേരളത്തിലെയടക്കം നിയമസഭാ തെരഞ്ഞെടുപ്പാണ് കാരണമായി പറഞ്ഞത്. സംഘടനാതെരഞ്ഞെടുപ്പ് അനന്തമായി നീട്ടുകയാണ് കുടുംബവാഴ്ച വാദികളെന്ന് ബോധ്യപ്പെട്ടതോടെയാണ് പ്രവർത്തകസമിതിയിൽ ഗുലാംനബി അടക്കമുള്ളവർ പൊട്ടിത്തെറിച്ചതും വാക്പോരിലേക്ക് നീങ്ങിയതും. അവസാനം നിയമസഭാ തെരഞ്ഞെടുപ്പുകൾ കഴിഞ്ഞുമതി സംഘടനാ തെരഞ്ഞെടുപ്പെന്ന ആന്റണിയുടെ നിലപാടിനെ ഉമ്മൻ ചാണ്ടി, അശോക് ഗെലോട്ട്, അമരീന്ദർ സിങ്, താരിഖ് അൻവർ തുടങ്ങിയവർ പിന്തുണച്ചു. തർക്കം നീണ്ടപ്പോൾ എത്രയും വേഗം ഇത് അവസാനിപ്പിക്കാനും കർഷകസമരത്തിൽ ശ്രദ്ധകേന്ദ്രീകരിക്കാനും രാഹുൽ ആവശ്യപ്പെട്ടു. തുടർന്ന്, നിയമസഭാ തെരഞ്ഞെടുപ്പുകൾക്കുശേഷം പ്രസിഡന്റ് തെരഞ്ഞെടുപ്പെന്ന തീരുമാനത്തിലേക്ക് പ്രവർത്തകസമിതി എത്തി.

മെയ് 29ന് എഐസിസി സമ്മേളനവും പ്രസിഡന്റ് തെരഞ്ഞെടുപ്പുമെന്ന നിർദേശമാണ് മധുസൂദൻ മിസ്ത്രിയുടെ നേതൃത്വത്തിലുള്ള കോൺഗ്രസ് കേന്ദ്ര തെരഞ്ഞെടുപ്പ് അതോറിറ്റി പ്രവർത്തകസമിതി മുമ്പാകെ വച്ചത്. കോൺഗ്രസിലെ കുടുംബവാഴ്ചയ്ക്ക് ഒരുകാരണവശാലും മാറ്റമുണ്ടാകില്ലെന്ന് ഒരിക്കൽ കൂടി ഉറപ്പിക്കുന്നതായി പ്രവർത്തകസമിതി യോഗം. ബിജെപിയെ ചെറുക്കാനാകും വിധം പാർടിയിൽ അടിമുടി മാറ്റം ആവശ്യപ്പെടുന്നവരെ വർത്തകസമിതിയിലെ കുടുംബവാഴ്ച വാദികൾ വീണ്ടും അടിച്ചിരുത്തി. സോണിയ അല്ലെങ്കിൽ രാഹുൽ എന്ന തരത്തിൽ കോൺഗ്രസിലെ കുടുംബവാഴ്ച അരയ്ക്കിട്ടുറപ്പിക്കുന്നത് എ കെ ആന്റണിയുടെ നേതൃത്വത്തിലുള്ള വിഭാഗമാണ്.

എഐസിസിയിൽ ഒരുപറ്റം ഉപജാപകവൃന്ദങ്ങളാണ് കാര്യങ്ങൾ നിയന്ത്രിക്കുന്നതെന്ന് ഒരിക്കൽകൂടി ഓൺലൈൻപ്രവർത്തക സമിതി യോഗത്തിലൂടെ തെളിഞ്ഞിരിക്കുന്നു. ലോക്‌സഭയിലെ പ്രതിപക്ഷത്തെ ഏറ്റവും വലിയ കക്ഷിയെന്ന നിലയിൽ കോൺഗ്രിസന് ബിജെപിക്കും, അവരുടെ നേതൃത്വത്തിലുള്ള കേന്ദ്രസർക്കാരിനുമെതിരെ ശക്തമായ നിലപാടുകളും, സമരപരിപാടികളും സംഘടിപ്പിക്കാൻ കഴിയാത്തതും നേതൃത്വത്തിൻറെ വീഴ്ചയാണ്.

Eng­lish sum­ma­ry; con­gress pres­i­dent election
You may also like this video;