Web Desk

March 11, 2020, 7:29 pm

മരണവീട്ടിൽ സാനിറ്റൈസറും ജാഗ്രതാ നിർദേശ ബോർഡും: കൊറോണ ഭീതിക്കിടെ ജാഗ്രതയോടെ ഒരു കുടുംബം

Janayugom Online

കോറോണ ഭീതിയിൽ സംസ്ഥാനം അതീവ ജാഗ്രത പുലർത്തുമ്പോൾ മരണ വീട്ടിൽ ഒരു കുടുംബം പാലിച്ച ജാഗ്രതയാണ് ഇപ്പോൾ ചർച്ചയാകുന്നത്. പാലാ ചക്കാമ്പുഴയിലെ വഞ്ചിന്താനത്ത് കുടുംബമാണ് വീട്ടിൽ മരണനാനന്ത ചടങ്ങിൽ പങ്കെടുക്കാനെത്തുന്നവർക്കായി കൊറോണ ജാഗ്രതാ നിർദേശം അടങ്ങുന്ന ബോർഡും സാനിറ്റൈസർ, ഹാൻഡ്വാഷ് എന്നിവയും ഒരുക്കി ജാഗ്രത പാലിച്ചിരിക്കുന്നത്. സംസ്കാര ചടങ്ങിൽ പങ്കെടുക്കുന്നവരുടെ സുരക്ഷ മുൻനിർത്തിയാണ് മൃതശരീരത്തിൽ ചുംബിക്കാതെ പ്രാർത്ഥനയോടെ പങ്കെടുക്കണമെന്നും പരസ്പരം ഹസ്തദാനം ‚ആശ്ലേഷം എന്നിവ ഒഴിവാക്കണമെന്നും ബോർഡ് വെച്ചത്. ഒപ്പം ചടങ്ങുകളിൽ പങ്കെടുക്കുന്നവർക്ക് കൈകഴുകി വൃത്തിയാക്കുന്നതിനുള്ള സംവിധാനവും കുടുംബം ഒരുക്കി.

വഞ്ചിന്താനത്ത് കുടുംബത്തിലെ പരേതനായ തോമസിന്റെ ഭാര്യ അച്ചു തോമസിന്റെ സംസ്കാര ചടങ്ങുകളാണ് കുടുംബം തികഞ്ഞ ജാഗ്രതയോടെ ചെയ്തിരിക്കുന്നത്. സാമൂഹമാധ്യമങ്ങളിലുൾപ്പെടെ മികച്ച പ്രതികരണമാണ് കുടുംബത്തിന്റെ ഈ പ്രവർത്തിക്ക് ലഭിക്കുന്നത്. സംസ്ഥാനത്തും ലോകമൊട്ടുക്കും ഏവരും ഇത്രയും ഭീതിയിൽ നോക്കികാണുന്ന ഒരു രോഗത്തെ കഴിയും വിധം ചെറുക്കുക എന്നതാണ് ഏവരും ചെയ്യേണ്ടത്. ഇതൊരു സാമൂഹിക ഉത്തരവാദിത്വമാണ് എന്നുമാണ് കുടുംബാംഗങ്ങൾ സംഭവത്തെ കുറിച്ച് പ്രതികരിച്ചത്.

Eng­lish Sum­ma­ry: coro­na alert board in funer­al home

You may also like this video