Web Desk

തിരുവനന്തപുരം:

March 18, 2020, 7:19 pm

കൈവിടരുത് ജാഗ്രത

ജനജീവിതം സാധാരണ നിലയിൽ തുടരാനാകണമെന്ന് മുഖ്യമന്ത്രി പ്രൈമറി, ഫാമിലി ഹെൽത്ത് സെന്ററുകളിൽ വൈകുന്നേരംവരെ ഒപിയും ഒരു ഡോക്ടറുടെ സേവനവും
Janayugom Online

കോവിഡ് 19 വൈറസ് 159 രാജ്യങ്ങളിലേക്ക് വ്യാപിച്ചുകൊണ്ടിരിക്കുന്ന സാഹചര്യത്തിൽ സംസ്ഥാനത്ത് ഒരു രീതിയിലും ജാഗ്രത കൈവിടാൻ പാടില്ലെന്ന് മുഖ്യമന്ത്രി പിണറായി വിജയൻ. കേരളത്തിൽ പുതുതായി രോഗം സ്ഥിരീകരിച്ചിട്ടില്ലെന്നത് ഏറെ ആശ്വാസകരമാണ്. രോഗം പടർന്നാൽ ഗുരുതരമായ പ്രത്യാഘാതമാകും സംസ്ഥാനത്തുണ്ടാവുക.

വയോജനങ്ങളുടെ എണ്ണം കൂടുതലുള്ള സംസ്ഥാനമെന്ന നിലയ്ക്ക് രോഗം ബാധിക്കുന്നവരുടെ എണ്ണം കൂടുതലാകും. അതുകൊണ്ടുതന്നെ വൈറസ് വ്യാപനം പടരാതിരിക്കുകയെന്നത് കരുതലോടെ ശ്രമിക്കേണ്ട കാര്യമാണ്. നിലവിൽ സ്ഥിതി കൈവിട്ട് പോയിട്ടില്ലെങ്കിലും ഏതു സമയത്തും കാര്യങ്ങൾ പ്രതികൂലമായേക്കാം. വിദേശ രാജ്യങ്ങളുടെ അനുഭവം അതാണ് ഓർമ്മിപ്പിക്കുന്നതെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു.

സംസ്ഥാനത്ത് 25,603 പേർ നിരീക്ഷണത്തിലുണ്ട്. 237 പേർ ആശുപത്രികളിലും ശേഷിക്കുന്നവർ വീടുകളിലുമാണ്. ഇന്നലെ 57 പേരെ പുതുതായി ആശുപത്രിയിൽ പ്രവേശിപ്പിച്ചു. 7,261 പേരെ പുതുതായി നിരീക്ഷണത്തിലാക്കി. 4,162 പേരെ നിരീക്ഷണത്തില്‍ നിന്നും ഒഴിവാക്കിയിട്ടുണ്ട്. 2,550 സാമ്പിൾ പരിശോധനയ്ക്ക് അയച്ചതിൽ 2,140 എണ്ണത്തിന്റെ പരിശോധനാഫലവും നെഗറ്റീവാണ്. വൈറസ് വ്യാപന പ്രതിരോധ പ്രവർത്തനങ്ങൾക്ക് കൂടുതൽ കരുത്ത് പകരുന്നതാണ് കഴിഞ്ഞ ദിവസം സുപ്രിംകോടതിയും ഹൈക്കോടതിയും സംതൃപ്തി രേഖപ്പെടുത്തിയത്. ഇത് സർക്കാരിന്റെ പ്രവർത്തനങ്ങൾ കൂടുതൽ നല്ല നിലയിൽ നടത്തുന്നതിന് ഇടായാക്കുമെന്നും മുഖ്യമന്ത്രി പറഞ്ഞു. റവന്യൂമന്ത്രി ഇ ചന്ദ്രശേഖരൻ, ആരോഗ്യമന്ത്രി കെ കെ ശൈലജ തുടങ്ങിയവർ വാർത്താസമ്മേളനത്തിൽ പങ്കെടുത്തു.

  • മതപരമായ ചടങ്ങുകളിൽ ആൾക്കൂട്ടം ഒഴിവാക്കണ
  •  കൂടുതൽ മുൻകരുതലുകൾക്ക് സർവീസിൽ നിന്ന് വിരമിച്ച ഡോക്ടർമാരുടെ സഹകരണം ഉറപ്പാക്കും.
  • കല്യാണാവശ്യത്തിന് മണ്ഡപം ബുക്ക് ചെയ്ത തുക തിരികെ നൽകാതിരിക്കുന്നതിനെതിരെ നടപടി
  • എല്ലാ ജില്ലകളിലും കോവിഡ് കെയർ സെന്ററുകൾ തയ്യാറാകും.
  • മാസ്ക്, സാനിറ്റൈസർ ക്ഷാമം രണ്ട് ദിവസത്തിനുള്ളിൽ പരിഹരിക്കും
  • കടകളിലും വ്യാപാര സ്ഥാപനങ്ങളിലും ഓൺലൈന്‍, ഹോം ഡെലിവറി സംവിധാനം വ്യാപിപ്പിക്കണം. ഡെലിവറി ചെയ്യുന്നയാൾ സുരക്ഷാ ക്രമീകരണങ്ങൾ പാലിക്കണം
  • കാർഡ് സ്വൈപ്പിംഗ് മെഷീനുകളുടെ സമീപം സാനിറ്റൈസറുകൾ നിർബന്ധമാക്കി
  • എടിഎം കൗണ്ടറുകളിലും സാനിറ്റൈസറുകൾ സ്ഥാപിക്കണം
  • ടാക്സി ഡ്രൈവർമാർക്ക് മുൻകരുതലുകളെക്കുറിച്ച് പ്രത്യേക ബോധവത്കരണം നൽകും
  • ആംബുലൻസ് ഡ്രൈവർമാർക്ക് കൃത്യമായ പരിശീലനം ഏർപ്പെടുത്തും
  • ആദിവാസി മേഖലയിലേക്ക് രോഗം പകരാതിരിക്കാൻ മുന്നൊരുക്കങ്ങൾ തുടങ്ങും
  • മറ്റ് സംസ്ഥാനങ്ങളിൽ കുടുങ്ങിയ വിദ്യാർത്ഥികളെ നാട്ടിലെത്തിക്കാൻ നടപടികൾ സ്വീകരിക്കും
  • ആശുപത്രികളിൽ ഐസൊലേഷനുകളിൽ ഉള്ളവർക്ക് വിശ്രമ സമയം ചിലവഴിക്കാൻ പുസ്തകങ്ങൾ വിതരണം ചെയ്യും.
  • കോളജ്, എസ്എസ്എൽസി മൂല്യനിർണയ ക്യാമ്പുകൾക്ക് പ്രത്യേക സുരക്ഷാ മുൻകരുതലുകൾ
  • മദ്യശാലകളിലെ നിയന്ത്രണങ്ങൾ എക്സൈസ് പരിശോധിക്കും