Friday 6, August 2021
Follow Us
EDITORIAL Janayugom E-Paper
സ്വന്തം ലേഖകൻ

ന്യൂഡൽഹി

July 18, 2020, 10:01 pm

കോവിഡ് പ്രതിസന്ധി രൂക്ഷം: സംസ്ഥാനങ്ങൾ വൻ കടക്കെണിയിൽ

Janayugom Online

കൊറോണ ലോക്ഡ‍ൗൺ കാരണമുണ്ടായ വരുമാന നഷ്ടത്തിന് പിന്നാലെ സംസ്ഥാനങ്ങൾ വൻ കടക്കെണിയിലേക്ക് നീങ്ങുന്നു. സംസ്ഥാനങ്ങളുടെ വിപണി വായ്പ 1.93 ലക്ഷം കോടിയായി ഉയർന്നിരിക്കുകയാണ്. കഴിഞ്ഞ സാമ്പത്തികവർഷത്തെ അപേക്ഷിച്ച് 76 ശതമാനത്തിന്റെ വർധനയാണ് ഇത്. കോവിഡ് പ്രതിസന്ധി നേരിടുന്നതിന് കേന്ദ്രം മതിയായ സഹായം നല്കാൻ സന്നദ്ധമാകാത്തതും കേന്ദ്രസർക്കാർ ജിഎസ്‌ടി വിഹിതം നൽകാൻ വൈകുന്നതുമാണ് സംസ്ഥാനങ്ങൾക്ക് ആഘാതം വർധിപ്പിക്കാൻ ഇടയാക്കിയത്.

കോവിഡ് ആഘാതത്തിൽ എല്ലാ സംസ്ഥാനങ്ങളും പ്രയാസങ്ങൾ നേരിടുന്നുണ്ട്. വരുമാനം ഏകദേശം പൂർണ്ണമായി നിലയ്ക്കുകയും പൊതുജനാരോഗ്യത്തിനും ക്ഷേമപദ്ധതികൾക്കുമുള്ള ചെലവ് ക്രമാതീതമായി ഉയരുകയും ചെയ്തു. ഈ ഘട്ടത്തിൽ പൊതുവിപണി വായ്പ എടുത്ത് മാത്രമേ ഇനി സംസ്ഥാനങ്ങൾക്ക് മുന്നോട്ട് പോകാനാവൂ എന്ന സ്ഥിതിയിലേക്കെത്തി.
സംസ്ഥാനങ്ങളുടെ വായ്പാ പരിധി ജിഡിപിയുടെ അഞ്ച് ശതമാനമായി ഉയർത്തുകയെന്ന സംസ്ഥാനങ്ങളുടെ ആവശ്യം സമീപകാലത്ത് കേന്ദ്രസർക്കാർ അംഗീകരിച്ചിരുന്നു. നിലവില്‍ മൂന്ന് ശതമാനമായിരുന്നു വായ്പ പരിധി. ഹ്രസ്വകാല വായ്പകള്‍ കൂടുതല്‍ എടുക്കാന്‍ സൗകര്യമൊരുക്കുന്ന രീതിയില്‍ വേയ്‌സ് ആന്റ് മീന്‍സ് അഡ്വാന്‍സിന്റെ (ഡബ്ല്യുഎംഎ) പരിധിയും ഇതോടൊപ്പം ഉയര്‍ത്തിയിരുന്നു. ഇത് സംസ്ഥാനങ്ങളെ കൂടുതൽ വായ്പകൾ ലഭിക്കാൻ പര്യാപ്തമാക്കി.

ഏപ്രിൽ ഒന്നുമുതൽ ജൂലൈ 14 വരെയുള്ള കാലയളവിലാണ് 1.93 ലക്ഷം കോടി വായ്പയെടുത്തിരിക്കുന്നത്. സംസ്ഥാനങ്ങളുടെ ആകെ കടം കണക്കുകൂട്ടിയതിന്റെ ഇരട്ടിയിലും വർധിച്ച് 52.6 ലക്ഷം കോടിയായി. 2015 മുതൽ 2020 വരെ വാർഷികാടിസ്ഥാനത്തിൽ 14.3 ശതമാനം കടം വർധനയുണ്ടായിരുന്ന സാഹചര്യത്തിലാണിത്.
സംസ്ഥാനങ്ങളുടെയും കേന്ദ്രസർക്കാരിന്റെയും കടബാധ്യതകൾ ഉൾപ്പെടുന്ന മൊത്തം ആഭ്യന്തര കടത്തിലെ വര്‍ധന 30.9 ശതമാനത്തിൽ നിന്നും 35.1 ശതമാനമായും കുതിച്ചുയർന്നിട്ടുണ്ട്.

ഉത്തർപ്രദേശാണ് രാജ്യത്ത് ഏറ്റവും കടബാധ്യതയുള്ള സംസ്ഥാനം. ഈ വർഷം കടമെടുപ്പിൽ 72 ശതമാനം വർധന യുപിയിൽ രേഖപ്പെടുത്തി. സംസ്ഥാനങ്ങളുടെ ആകെ കടത്തിന്റെ 11 ശതമാനവും യുപിയുടേതാണ്. ആറുലക്ഷം കോടിയാണ് ഇതുവരെ സംസ്ഥാനത്തിന്റെ ആകെ കടം. അഞ്ചുലക്ഷം കോടിയുമായി മഹാരാഷ്ട്രയാണ് രണ്ടാംസ്ഥാനത്തുള്ളത്. ബംഗാൾ, തമിഴ്‌നാട്, രാജസ്ഥാൻ, ആന്ധ്ര, ഗുജറാത്ത്, കർണാടക, കേരളം, മധ്യപ്രദേശ് എന്നിവയാണ് യഥാക്രമം മൂന്നുമുതൽ പത്തുവരെ സ്ഥാനങ്ങളിലുള്ളത്.

ENGLISH SUMMARY:covid crisis
You may also like this video