Tuesday
17 Sep 2019

മഹാശിലായുഗത്തിലെ ശവസംസ്‌കരണ രീതികള്‍

By: Web Desk | Saturday 21 July 2018 5:00 PM IST


muniyyara
chenthapooor

ചെന്താപ്പൂര്

മഹാശിലായുഗകാലഘട്ടം മുതല്‍ക്കാണ് ബന്ധുക്കളോ, മിത്രങ്ങളോ മരണപ്പെട്ടാല്‍ അവരുടെ മൃതശരീരം മരണാനന്തര കര്‍മങ്ങള്‍ നടത്തി മറവു ചെയ്യാന്‍ തുടങ്ങിയത്. ചരിത്രത്തില്‍ ഇത് മഹാശിലായുഗ സംസ്‌കാരമായി രേഖപ്പെടുത്തിയിട്ടുണ്ട്. ചരിത്രാതീതകാലത്തില്‍ നിന്നും പുരാതന ശിലായുഗവും (ശിലകളുടെ ഉപയോഗരീതി മനസിലാക്കി ശിലായുഗത്തെ പുരാതന ശിലായുഗമെന്നും നവീന ശിലായുഗമെന്നും വേര്‍തിരിച്ചിട്ടുണ്ട്.) നവീന ശിലായുഗവും കടന്ന് മഹാശിലായുഗ സംസ്‌കാരത്തിലേക്കുള്ള മനുഷ്യ പരമ്പരയുടെ വളര്‍ച്ച അത്ഭുതകരമാണ്. ഈ കാലഘട്ടത്തിലെ ഏഴു ശവസംസ്‌കരണ രീതികള്‍ പരിചയപ്പെടാം.
(1) നന്നങ്ങാടികള്‍- മൃതശരീരങ്ങളും അവര്‍ ജീവിച്ചിരുന്ന കാലത്ത് ഉപയോഗിച്ചിരുന്ന വസ്തുക്കളും അടക്കം ചെയ്തിട്ടുള്ള മണ്‍ഭരണികളാണ് നന്നങ്ങാടികള്‍. മുതുമക്കത്താഴികള്‍ എന്നും പറയും. കേരളത്തില്‍ നന്നങ്ങാടികള്‍ കാണപ്പെട്ട സ്ഥലങ്ങള്‍ ചുവടെ ചേര്‍ക്കുന്നു. കല്ലാര്‍ (കോട്ടയം) പാമ്പാടുംപാറ, ആനപ്പാറ, ശാന്തന്‍പാറ (ഇടുക്കി) ആളൂര്‍, കണിമംഗലം, ഏറാനല്ലൂര്‍ (എറണാകുളം) ശ്രീകാര്യം, വെഞ്ഞാറമൂട്, വെള്ളൈക്കടവ് (തിരുവനന്തപുരം).
(2) നാട്ടുക്കല്ലുകള്‍- മൃതശരീരം കുഴിച്ചിട്ട സ്ഥലത്ത് അടയാളമായി നാട്ടുന്ന ശിലാസ്തംഭമാണ് ഇവ. പുലിച്ചിക്കല്ലുകള്‍ എന്നും പറയാറുണ്ട്. കൊല്ലം ജില്ലയിലെ പനയം, ചിറ്റയം, പവിത്രേശ്വരം, പെരുനാട്, കടവൂര്‍ തുടങ്ങിയ സ്ഥലത്തുനിന്നും അതിരമ്പുഴ, തിരുനക്കര (കോട്ടയം), ചിന്നക്കനാല്‍, പൊട്ടാര്‍കൊല്ല, വെള്ളപ്പാറ (ഇടുക്കി), തൃപ്പൂണിത്തുറ (എറണാകുളം) എന്നിവിടങ്ങളില്‍ നിന്നും നാട്ടുക്കല്ലുകള്‍ കണ്ടെടുക്കപ്പെട്ടിട്ടുണ്ട്.
(3) കല്ലറകള്‍- കല്ലുള്ള സ്ഥലങ്ങളില്‍ നല്ല ആകൃതിയില്‍ വെട്ടി രൂപപ്പെടുത്തുന്ന അറകളാണ് കല്ലറകള്‍. മൃതശരീരവും മറ്റുംവച്ച ശേഷം മുകള്‍ഭാഗം ശിലാഫലകം കൊണ്ട് മൂടിയിരിക്കും. കല്ലറ കണ്ടെത്തിയ സ്ഥലങ്ങള്‍ പിരപ്പന്‍കോട് (തിരുവനന്തപുരം), പുലിയൂര്‍ (ആലപ്പുഴ), കൊടുമണ്‍ (പത്തനംതിട്ട), അതിരമ്പുഴ (കോട്ടയം).
(4) തൊപ്പിക്കല്ലുകളും കുടക്കല്ലുകളും:- മൃതശരീരം കുഴിയില്‍ മൂടിയ ശേഷം തൊപ്പിയുടെയും കുടയുടെയും മാതൃകയില്‍ ശിലകള്‍ സ്ഥാപിക്കുന്ന രീതിയാണത്. കണ്ടെത്തിയ സ്ഥലങ്ങള്‍: അഞ്ചിരണ്ടി (കൊല്ലം), ചാത്തമ്പറമ്പ് (കോഴിക്കോട്), ഇങ്ങല്ലൂര്‍ (പാലക്കാട്).
(5) കല്‍ക്കൂടാരം: ഭൂമിക്കിടയിലുള്ള കല്ലറയാണിത്. കല്‍ക്കൂടാരത്തിന്റെ ഒരു വശം എടുത്തുമാറ്റാവുന്ന ശിലാഫലകം കൊണ്ട് അടച്ചിരിക്കും. കല്ലറയ്ക്ക് മുകളിലാണ് കല്‍ക്കൂടാരം. കോഴിക്കോട് ജില്ലയിലെ വേളൂര്‍, വയനാട് ജില്ലയിലെ വൈത്തിരി, കണിയാമ്പാറ്റ, കണ്ണൂര്‍ ജില്ലയിലെ പുത്തൂര്‍, പട്ടിയനല്ലൂര്‍, പത്തനംതിട്ടയിലെ ഏലാമല, കോട്ടയത്തെ കൈനകരി, കുറവിലങ്ങാട്, ഇടുക്കിയിലെ ചക്കിമേട്, മറവൂര്‍, മേപ്പാറ, എറണാകുളം ജില്ലയിലെ മുളന്തുരുത്തി തുടങ്ങിയ സ്ഥലങ്ങളില്‍ കല്‍ക്കൂടാരം കണ്ടെത്തിയിട്ടുണ്ട്.
(6) മുനിയറകള്‍: പാറയിലും കല്ലിലും വെട്ടിയുണ്ടാക്കുന്ന കല്ലറകളാണ് മുനിയറകള്‍. ഇടുക്കി ജില്ലയിലെ ഒരു സ്ഥലം കൂടിയാണ് മുനിയറ. എന്നാല്‍ അവിടെ മുനിയറകള്‍ കണ്ടെത്തിയതായി രേഖപ്പെടുത്തിയിട്ടില്ല. തൊന്നന്നൂര്‍ (എറണാകുളം) മങ്ങാട്, എയ്യല്‍, ചുണ്ടൂര്‍ (തൃശൂര്‍), പീലിക്കോട്, പെരുങ്ങളം (കണ്ണൂര്‍), ഫെറുക്ക്, കോടശ്ശേരി, മേപ്പയൂര്‍, തൃപ്രങ്ങോട് (കോഴിക്കോട്), എളമ്പുഴശ്ശേരി, വാണിയാമ്പാറ (കോഴിക്കോട്) തുടങ്ങിയ പ്രദേശങ്ങളില്‍ മുനിയറകള്‍ ഉണ്ടായിരുന്നതായി പറയപ്പെടുന്നു.
(7) കല്‍വൃത്തങ്ങള്‍: ശവശരീരം അടക്കം ചെയ്‌തോ, അടക്കം ചെയ്യാതെ പക്ഷികള്‍ക്കും മൃഗങ്ങള്‍ക്കും ഭക്ഷിക്കുവാന്‍ വേണ്ടി തുറന്നുവച്ചശേഷമോ ചുറ്റിനും കല്ലുകള്‍കൊണ്ട് വളഞ്ഞുവയ്ക്കുന്നതിനെയാണ് കല്‍വൃത്തങ്ങള്‍ എന്നു പറയുന്നത്. പൂത്തങ്കര, കൊടുമണ്‍ (പത്തനംതിട്ട), അതിരമ്പുഴ (കോട്ടയം), വൈത്തിരി, കണിയാമ്പറ്റ (വയനാട്), പുന്നാള്‍, വട്ടിയനല്ലൂര്‍ (കണ്ണൂര്‍), ദേശങ്ങളില്‍ കല്‍വൃത്തങ്ങളുടെ ശേഷിപ്പുകള്‍ കണ്ടെത്തിയിട്ടുണ്ട്.