Web Desk

December 09, 2019, 10:45 pm

ഡിസംബർ 10 ലോക മനുഷ്യാവകാശദിനം; മനുഷ്യാവകാശങ്ങളെക്കുറിച്ച് ഓര്‍ക്കുവാനും ലംഘനങ്ങള്‍ക്കെതിരെ പ്രതികരിക്കാനും

Janayugom Online

വി ദത്തൻ

ഓരോ വ്യക്തിക്കും സുരക്ഷയും ആത്മാഭിമാനവും ഉറപ്പാക്കി സമൂഹത്തിൽ ജീവിക്കാനുള്ള അവകാശമാണ് മനുഷ്യാവകാശം. സ്വകാര്യത, മതവിശ്വാസം, അഭിപ്രായ പ്രകടനം എന്നിവയ്ക്കുള്ള സംരക്ഷണം, പാർപ്പിടം, ഭക്ഷണം, വസ്ത്രം എന്നിവ ലഭിക്കാനുള്ള അവകാശം, വാർധക്യം, വൈധവ്യം, ശാരീരിക ബലഹീനതകൾ ഉൾപ്പെടെയുള്ള അവശത എന്നീ അവസ്ഥയിൽ ലഭിക്കേണ്ട സംരക്ഷണം, നിയമത്തിനു മുന്നിലുള്ള സംരക്ഷണം, കുറ്റവാളി എന്ന് തെളിയിക്കപ്പെടും വരെ നിരപരാധിയായി പരിഗണിക്കപ്പെടാനുള്ള അവകാശം, അന്യായമായി തടങ്കലിൽ പാർപ്പിക്കില്ല എന്ന ഉറപ്പ്, ഇവയെല്ലാം അന്താരാഷ്ട്ര തലത്തിൽതന്നെ അംഗീകരിക്കപ്പെട്ട മനുഷ്യാവകാശങ്ങളാണ്. എല്ലാ മനുഷ്യരുടെയും അർഹതയായി കരുതപ്പെടുന്ന അടിസ്ഥാന അവകാശങ്ങളും സ്വാതന്ത്ര്യങ്ങളും മനുഷ്യാവകാശത്തിൽ ഉൾപ്പെടുന്നു.

പൗരാവകാശം, രാഷ്ട്രീയ കാര്യങ്ങളിലുള്ള അവകാശം, സാമ്പത്തികാവകാശം, സാമൂഹികാവകാശം, സാംസ്കാരികാവകാശം ഇവയെല്ലാം മനുഷ്യാവകാശത്തിൽ ഒത്തുചേരുന്നു. രണ്ടാം ലോകമഹായുദ്ധാനന്തരമാണ് മനുഷ്യാവകാശങ്ങളെ കുറിച്ച് അന്താരാഷ്ട്ര സമൂഹം ഗൗരവമായി ചർച്ച ചെയ്തു തുടങ്ങിയത്. ഏകാധിപത്യത്തിന്റെയും ഫാസിസത്തിന്റെയും കാലത്ത് ഭരണകൂടം പൗരന്റെ അവകാശങ്ങൾ കവർന്നെടുക്കുകയും പീഡിപ്പിക്കുകയും ചെയ്ത സാഹചര്യത്തിലായിരുന്നു ഇത്. നിലനില്പും അന്തസും നഷ്ടപ്പെട്ട മനുഷ്യന്റെ ആത്മാഭിമാനം വീണ്ടെടുക്കാൻ 1946 ഐക്യരാഷ്ട്രസഭ ഒരു കമ്മീഷന് രൂപം നൽകി. കമ്മീഷൻ അന്താരാഷ്ട്ര തലത്തിൽ ബാധകമായ ഒരു അവകാശ പത്രികയും തയാറാക്കി. തുടർന്ന് 1948 ഡിസംബർ 10നു യുഎൻ ജനറൽ അസംബ്ലിയിൽ മനുഷ്യാവകാശ പ്രഖ്യാപനം നടത്തി.

മത, ഭാഷ, ലിംഗ, വർണ, രാഷ്ട്രീയ ഭേദമന്യേ എല്ലാ മനുഷ്യർക്കും ബാധകമായ അവകാശങ്ങളായിരുന്നു അതി ന്റെ കാതൽ. യു എൻ അംഗരാജ്യങ്ങൾ ഈ മനുഷ്യാവകാശ രേഖ അംഗീകരിച്ചു. 1950 ഡിസംബർ നാലിനു എല്ലാ അംഗരാജ്യങ്ങളെയും മനുഷ്യാവകാശരംഗത്ത് പ്രവർത്തിക്കുന്ന സംഘടനകളെയും വിളിച്ച് കൂട്ടിയ പൊതു സമ്മേളനത്തിൽ വച്ച് ഐക്യരാഷ്ട്രസഭ ഈ ദിനം ആഘോഷിക്കാൻ തീരുമാനമെടുത്തു. അന്നു മുതൽ ഡിസംബർ 10 മനുഷ്യാവകാശ ദിനമായി ലോകമെങ്ങും ആചരിച്ചു വരുന്നു. അന്താരാഷ്ട്ര മനുഷ്യാവകാശ നിയമം 1948 ഡിസംബർ 10ന് പാരീസിൽ ചേർന്ന ഐക്യരാഷ്ട്രസഭയുടെ ജനറൽ അസംബ്ലി അംഗീകരിച്ചതാണ് അന്താരാഷ്ട്ര മനുഷ്യാവകാശ പ്രഖ്യാപനം. മനുഷ്യർക്ക് സ്വാഭാവികമായുള്ള അവകാശങ്ങളെപ്പറ്റിയുള്ള ആദ്യ ആഗോള പ്രഖ്യാപനമാണ് അന്താരാഷ്ട്ര മനുഷ്യാവകാശ പ്രഖ്യാപനം.

പിന്നീട് അന്താരാഷ്ട്ര ഉടമ്പടികളുടെ ഭാഗമായും ദേശീയ ഭരണഘടനകളുടെ ഭാഗമായും പ്രാദേശിക മനുഷ്യാവകാശ പ്രമാണങ്ങളായും വിവിധ നിയമങ്ങളായും മാറിയ 30 അനുച്ഛേദങ്ങളാണ് ഈ പ്രഖ്യാപനത്തിൽ അടങ്ങിയിരിക്കുന്നത്. അന്താരാഷ്ട്ര മനുഷ്യാവകാശ പ്രഖ്യാപനം, സാമൂ ഹിക, സാമ്പത്തിക, സാംസ്കാരിക അവകാശങ്ങൾക്കായുള്ള അന്താരാഷ്ട്ര ഉടമ്പടി, സിവിൽ രാഷ്ട്രീയ അവകാശങ്ങൾക്കായുള്ള അന്താരാഷ്ട്ര ഉടമ്പടി എന്നിവയെ ചേർത്ത് അന്താരാഷ്ട്ര മനുഷ്യാവകാശ നിയമംഎന്ന് വിളിക്കുന്നു. മനുഷ്യാവകാശ കൗൺസിൽ ആഗോളതലത്തിൽ മനുഷ്യാവകാശ സംരക്ഷണത്തിനായി ഐക്യരാഷ്ട്രസഭ രൂപം കൊടുത്ത പരമോന്നത സമിതിയാണ് യു എൻ മനുഷ്യാവകാശ കൗൺസിൽ (യുഎന്‍എച്ച്ആര്‍സി). ഐക്യരാഷ്ട്ര പൊതു സഭയിൽ നിന്ന് തെരഞ്ഞെടുക്കപ്പെടുന്ന 47 പേരാണ് ഈ സമിതിയിലെ അംഗങ്ങൾ. മൂന്നു വർഷമാണ് അംഗങ്ങളുടെ കാലാവധി. സ്വിറ്റ്സർലൻഡിലെ ജനീവയാണ് മനുഷ്യാവകാശ കൗൺസിലിന്റെ ആസ്ഥാനം.

മനുഷ്യാവകാശ കൌൺസിൽ കൂടാതെ, ഐക്യരാഷ്ട്ര ഉടമ്പടികളുടെ അടിസ്ഥാനത്തിൽ രൂപം കൊടുത്ത താഴെപ്പറയുന്ന മറ്റു സമിതികളും ഉണ്ട്. സാമ്പത്തിക, സാമൂഹിക, സാംസ്കാരിക, അവകാശങ്ങൾക്കായുള്ള സമിതി, വംശീയ വിവേചനത്തിന്റെ നിരാകരണത്തിനുള്ള സമിതി, സ്ത്രീകൾക്കെതിരെയുള്ള വിവേചനത്തിന്റെ നിരാകരണത്തിനായുള്ള സമിതി, പീഡനങ്ങൾക്കെതിരായ സമിതി, കുട്ടിയുടെ അവകാശങ്ങൾക്കായുള്ള സമിതി, കുടിയേറ്റത്തൊഴിലാളികൾക്കായുള്ള സമിതി, ഭിന്നശേഷിയുള്ളവരുടെ അവകാശങ്ങൾക്ക് വേണ്ടിയുള്ള സമിതി, നിർബന്ധിത പലായനം സംബന്ധിച്ച സമിതി. ദേശീയ മനുഷ്യാവകാശ കമ്മീഷൻ മനുഷ്യാവകാശങ്ങൾ സംരക്ഷിക്കുന്നതിനുവേണ്ടി ഇന്ത്യയിൽരൂപം നൽകിയിട്ടുള്ള സമിതിയാണ് ദേശീയ മനുഷ്യാവകാശ കമ്മീഷൻ. 1993ൽ കേന്ദ്ര സർക്കാർ പാസാക്കിയ മനുഷ്യാവകാശ സംരക്ഷണ നിയമം അനുസരിച്ച് പ്രവർത്തിക്കുന്ന ദേശീയ മനുഷ്യാവകാശ കമ്മീഷന്റെ ചെയർമാൻ പദവി ഇന്ത്യൻ ചീഫ് ജസ്റ്റിസ് ആയിരുന്ന വ്യക്തിക്ക് മാത്രമേ വഹിക്കാൻ കഴിയൂ.

ജസ്റ്റിസ് രംഗനാഥ മിശ്രയായിരുന്നു ദേശീയ മനുഷ്യാവകാശ കമ്മീഷന്റെ പ്രഥമ അധ്യക്ഷൻ. ചെയർമാൻ ഉൾപ്പെടെ അഞ്ചംഗങ്ങളാണ് കമ്മീഷനിലുള്ളത്. സ്ഥാനമേറ്റെടുക്കുന്ന തീയതി മുതൽ അഞ്ച് വർഷമോ 70 വയസ് പൂർത്തിയാക്കുന്നതുവരെയോ ഏതാണ് ആദ്യം സംഭവിക്കുന്നത് അതുവരെ കമ്മീഷൻ അംഗങ്ങൾക്ക് സ്ഥാനത്ത് തുടരാം. ദേശീയ മനുഷ്യാവകാശ കമ്മീഷന്റെ ആസ്ഥാനം ഡൽഹിയാണ്. സംസ്ഥാന മനുഷ്യാവകാശ കമ്മീഷൻ 1993ലെ ദേശീയ മനുഷ്യാവകാശ സംരക്ഷണ നിയമത്തിന്റെ അടിസ്ഥാനത്തിലാണ് കേരള സംസ്ഥാന മനുഷ്യാവകാശ കമ്മീഷൻ രൂപീകൃതമായത്. ഹൈക്കോടതി ചീഫ് ജസ്റ്റിസ് ആയി പ്രവർത്തിച്ചയാളാവണം കമ്മീഷൻ ചെയർമാൻ. ഒരു ഹൈക്കോടതി ജഡ്ജി, മനുഷ്യാവകാശ വിഷയങ്ങളിൽ അറിവും പ്രയോഗിക പരിചയവുമുള്ളയാൾ എന്നിങ്ങനെ മൂന്നുപേർ അടങ്ങുന്നതാണ് സംസ്ഥാന മനുഷ്യാവകാശ കമ്മീഷൻ.

കമ്മീഷന്റെ ആസ്ഥാനം തിരുവനന്തപുരത്താണ്. ലോകത്തെമ്പാടും മനുഷ്യാവകാശങ്ങൾക്ക് നേരെ ഭീഷണി ഉയരുന്ന ഒരു കാലഘട്ടമാണിത്. വെറുതെ മനുഷ്യാവകാശ ദിനം ആഘോഷിച്ചതുകൊണ്ടു മാത്രം കാര്യമില്ല. നമ്മുടെ അവകാശങ്ങൾക്കുവേണ്ടി ശബ്ദമുയർത്തുമ്പോൾ തന്നെ അന്യന്റെ അവകാശങ്ങൾ ഹനിക്കപ്പെടാതെ നോക്കേണ്ടതും നമ്മുടെ ഉത്തരവാദിത്തമാണ്. മനുഷ്യാവകാശങ്ങളെക്കുറിച്ച് ഓർക്കുവാനും അവകാശലംഘനങ്ങൾക്കെതിരേ പ്രതികരിക്കാനും മനുഷ്യാവകാശ ദിനം എല്ലാവര്‍ക്കും പ്രചോദനമാകട്ടെ.