Web Desk

ന്യൂഡൽഹി

February 20, 2020, 10:08 pm

ഡൽഹി തെരഞ്ഞെടുപ്പ്; വാട്സാപ്പിലൂടെ ഡീപ്‌ഫെയ്ക്ക് വീഡിയോകൾ പങ്കുവെച്ച് ബിജെപി, എന്താണ് ഡീപ്‌ഫെയ്ക്ക് വീഡിയോകൾ എന്നറിയാം

Janayugom Online

ഈ മാസം ആദ്യം നടന്ന ഡൽഹി നിയമസഭ തെരഞ്ഞെടുപ്പ് പ്രചാരണത്തിൻ ബിജെപി വാട്സാപ്പിലൂടെ ഡീപ്‌ഫെയ്ക്ക് വീഡിയോകൾ പങ്കുവച്ചിരുന്നതായി കണ്ടെത്തൽ. പാർട്ടി നേതാവ് മനോജ് തിവാരി രണ്ട് ഭാഷകളിൽ വ്യത്യസ്ത വോട്ടർമാരോട് സംസാരിക്കുന്ന വീഡിയോ ആണ് ഈ ടെക്നോളജി ഉപയോഗിച്ച് നിർമ്മിച്ച് ബിജെപി പ്രചരിപ്പിച്ചത്. ആർട്ടിഫിഷ്യൽ ഇന്റലിജൻസ് ഉപയോഗിച്ച് മോർഫ് ചെയ്ത് വീഡിയോകളും മറ്റും നിർമ്മിക്കുന്നതിനെയാണ് ഡീപ്‌ഫെയ്ക്ക് വീഡിയോകൾ എന്നു പറയുന്നത്. യാഥാർത്ഥ വീഡിയോകളെ വെല്ലുന്ന ഇവ തിരിച്ചറിയാൻ വലിയ പ്രയാസമാണ്. ഒരാൾ പറയുന്നത് മറ്റൊരാൾ പറയുന്നതു പോലെ ആക്കാനും ഇതിലൂടെ കഴിയും. ചുണ്ടുകളുടെ സമന്വയവും ഭാവങ്ങളും മാറ്റുവാനും ഈ പുതിയ ടെക്നോളജിക്കാവും.

വൈസ് ന്യൂസ് വെബ്സൈറ്റാണ് ബിജെപിയുടെ വ്യാജ വീഡിയോകൾ കണ്ടെത്തിയത്. തിവാരിയുടെ 44 സെക്കന്റുകളുള്ള ഒരു വീഡിയോയിൽ അദ്ദേഹം ഹരിയാൻവി ഭാഷയിൽ ഡൽഹി മുഖ്യമന്ത്രി അരവിന്ദ് കെജ്രിവാളിന്റെ വാഗ്ദാനങ്ങളെക്കുറിച്ച് പറയുന്നുണ്ട്. എന്നാൽ യഥാർത്ഥത്തിൽ അദ്ദേഹം ഇക്കാര്യങ്ങൾ സംസാരിക്കുന്നത് ഹിന്ദിയിലാണ്. പൗരത്വ ഭേദഗതി നിയമം രാജ്യസഭയിൽ പാസ്സാക്കിയതിൽ അഭിനന്ദനം എന്ന് തിവാരി ഹിന്ദിയിൽ പറയുന്ന വീഡിയോയും ഹരിയാൻവി ഭാഷയിൽ പറയുന്നതുപോലെ പ്രചരിച്ചിരുന്നു.

you may also like this video;


ഇത് ചില വാട്സ് ആപ്പ് ഗ്രൂപ്പുകളിൽ 5,800 തവണ പങ്കുവച്ചതായി ബിജെപി അവകാശപ്പെട്ടിരുന്നു. അണികൾക്ക് ഈ വീഡിയോകൾ ഇഷ്ടപ്പെട്ടു. ഇത്തരത്തിൽ ഇംഗ്ലീഷിലും വീ‍ഡിയോ ചെയ്തുകൂടേ എന്ന് ചിലർ ചോദിച്ചതായും വിവരങ്ങളുണ്ട്. ഇതിന്റെ ഇംഗ്ലീഷ് പതിപ്പ് ആവിഷ്കരിക്കണമെന്ന് ബിജെപി മാധ്യമ വിഭാഗം തലവൻ നീൽകാന്ത് ബക്ഷി ആവശ്യപ്പെട്ടതായി എൻഡിടിവി റിപ്പോർട്ട് ചെയ്തു.

എന്നാൽ ഇത് ഏത് കമ്പനിയാണെന്ന് അറിയില്ലെന്നും ഇതുവരെ അവരെ കണ്ടിട്ടില്ലെന്നും ബക്ഷി അവകാശപ്പെട്ടു. ചണ്ഡിഗഡ് ആസ്ഥാനമായി പ്രവർത്തിക്കുന്ന ‘ഐഡിയസ് ഫാക്ടറി’ എന്ന കമ്പനിയാണ് ഡീപ്‌ഫെയ്ക്ക് വീഡിയോകൾ ചെയ്തു നൽകിയിരിക്കുന്നത്. ഇതിനെക്കുറിച്ച് കൂടുതൽ വിവരങ്ങൾ പുറത്തു പറയാനാവില്ല എന്നാണ് ഐഡിയസ് ഫാക്ടറി ഒരു ദേശീയ മാധ്യമത്തോട് പ്രതികരിച്ചത്. ലോകത്തിൽ തന്നെ ആദ്യമായാണ് ഡീപ്‌ഫെയ്ക്ക് ടെക്നോളജി ഉപയോഗിച്ച് തെരഞ്ഞെടുപ്പ് പ്രചാരണം നടത്തുന്നതെന്ന് ആർട്ടിഫിഷ്യൽ ഇന്റലിജൻസ് വിദഗ്ധർ ചൂണ്ടിക്കാണിക്കുന്നു. രാഷ്ട്രീയ പരമായി തെറ്റായ വിവരങ്ങൾ നൽകാൻ ഉപയോഗിക്കാനുള്ള സാധ്യതയിലേക്കാണ് ഇത് വിരൽചൂണ്ടുന്നതെന്നും ഇവർ പറയുന്നു.