Tuesday
22 Oct 2019

ഡയറിസം: ഗാന്ധിജിയുടെയും അംബേദ്ക്കറിന്റെയും കശ്മീരിന്റെയും പശ്ചാത്തലത്തില്‍

By: Web Desk | Sunday 15 September 2019 10:54 PM IST


ഡി രാജ
(സിപിഐ ജനറല്‍ സെക്രട്ടറി)

തൊട്ടുകൂടായ്മയുടെ പുതിയൊരു രൂപമായാണ് ‘ഡയറിസ’ത്തെ 1919ല്‍ ഗാന്ധിജി വിവക്ഷിച്ചത്. പശുവിന്റെ പേരില്‍ മുസ്‌ലിങ്ങളെ കൊല്ലുന്നതും ഡയറിസമാണെന്ന് അദ്ദേഹം ചൂണ്ടിക്കാട്ടി. ദളിതുകള്‍ക്കും ന്യൂനപക്ഷങ്ങള്‍ക്കുമെതിരെ കരുതിക്കൂട്ടി ഡയറിസം നടപ്പാക്കാന്‍ ശ്രമിക്കുന്ന കാഴ്ചകള്‍ക്ക് ദുഃഖത്തോടെ ഈ എന്‍ഡിഎ വാഴ്ചക്കാലത്ത് നാം സാക്ഷ്യം വഹിക്കേണ്ടിവരുന്നു. സ്വാതന്ത്ര്യാനന്തര ഇന്ത്യയില്‍ ദളിത്-ന്യൂനപക്ഷ ജനത എക്കാലത്തെയും മോശമായ ദുരിത കാലത്തിലൂടെയാണ് ഇപ്പോള്‍ കടന്ന് പോകുന്നത്. ഹിന്ദുമത മുദ്രാവാക്യങ്ങള്‍ മുഴക്കി പശുവിന്റെ പേരില്‍ ഇവരെ മര്‍ദ്ദിക്കുന്നു, അവര്‍ ഇരകളാക്കപ്പെടുന്നു. 1919ലെ ജാലിയന്‍ വാലാബാഗ് കൂട്ടക്കൊല ഉണ്ടാക്കിയത് പോലുള്ള ഞെട്ടലാണ് അക്ഷരാര്‍ഥത്തില്‍ 21-ാം നൂറ്റാണ്ടിലെ ഇത്തരം ഡയറിസം രാജ്യമെമ്പാടും ഉണ്ടാക്കിയിരിക്കുന്നത്.
നിയമനിര്‍മാണത്തിന്റെ പ്രാഥമിക പ്രക്രിയയായ ചര്‍ച്ചകള്‍ കൂടാതെ തന്നെ പല നിയമങ്ങളും പാര്‍ലമെന്റ് പാസാക്കുന്നു. ഡയറിസം പുത്തന്‍ രൂപത്തില്‍ ഉണര്‍ന്നുവരുന്നു എന്നതിന്റെ ദൃഷ്ടാന്തമാണിത്. ലോക്‌സഭയിലും രാജ്യസഭയിലും പ്രതിപക്ഷത്തിന്റെ യാതൊരു അഭ്യര്‍ഥനയും ചെവിക്കൊള്ളാതെ ബില്ലുകള്‍ മിക്കതും സമിതികളിലേക്ക് അയക്കുന്നു. പാര്‍ലമെന്റില്‍ പ്രതിപക്ഷത്തിന്റെ പങ്കിനെക്കുറിച്ചുള്ള ഡോ.അംബേദ്ക്കറിന്റെ ദര്‍ശനങ്ങള്‍ തമസ്‌ക്കരിക്കപ്പെടുന്നു. ഇതും ഒരു തരം ഡയറിസമാണ്. പ്രതിപക്ഷത്തിന്റെ അഭിപ്രായങ്ങള്‍ പരിഗണിക്കാതെയും സൂക്ഷ്മ പരിശോധന കൂടാതെയും അഭിപ്രായ സമാഹരണമില്ലാതെയും വേറിട്ട കാഴ്ചപ്പാടുകളില്ലാതെയും രാജ്യത്ത് നിയമങ്ങള്‍ നിര്‍മിക്കപ്പെടുന്നു. ഈ അര്‍ഥത്തില്‍ എന്‍ഡിഎ ഭരണകാലം 1917ലെയും 19ലെയും ബ്രിട്ടീഷ് ഭരണകാലത്തെക്കാള്‍ അരാജകമായി തീര്‍ന്നിരിക്കുന്നു.
ബ്രിട്ടീഷ് ഭരണാധികാരികള്‍ ആദ്യസത്യഗ്രഹത്തെ തുടര്‍ന്ന് ഗാന്ധിജിയുമായി കലഹിക്കുന്നതും അറസ്റ്റ് ചെയ്യുന്നതും 1917ലാണ്. നീലം കര്‍ഷകസമരവുമായി ബന്ധപ്പെട്ട് സ്ഥലം സന്ദര്‍ശിക്കാനും ജനങ്ങളില്‍ നിന്ന് കൂടുതല്‍ വിവരങ്ങള്‍ അറിയാനുമായി ചമ്പാരനിലെത്തിയതായിരുന്നു ഗാന്ധിജി. പിന്നീട് അദ്ദേഹത്തെ നിരുപാധികം വിട്ടയച്ചു. കര്‍ഷകരുമായും ബ്രിട്ടീഷ് തോട്ടമുടമകളുമായും വിശദമായി ചര്‍ച്ച നടത്താനും അനുമതി നല്‍കി. ഗാന്ധിജിയുടെ ആദ്യ സത്യഗ്രഹത്തിന്റെ ഫലമായി ബ്രിട്ടീഷ് സര്‍ക്കാര്‍ ഒരു നിയമനിര്‍മാണ നിര്‍ദേശം മുന്നോട്ടുവച്ചു; ചമ്പാരന്‍ കാര്‍ഷിക ബില്‍ 1917. നിര്‍ബന്ധിത നീലം കൃഷി നിരോധിക്കുകയായിരുന്നു ബില്‍ ലക്ഷ്യംവച്ചത്. ബിഹാര്‍, ഒഡിഷ ലെജിസ്‌ലേറ്റീവ് സമിതികളില്‍ ബില്‍ അവതരിപ്പിച്ചപ്പോള്‍ സെലക്ട് കമ്മിറ്റിക്ക് വിടണമെന്ന നിര്‍ദേശമുയര്‍ന്നു. കൊളോണിയല്‍ ഭരണാധികാരികള്‍ ആവശ്യം അംഗീകരിക്കുകയും ബില്‍ സെലക്ട് കമ്മിറ്റിയുടെ പരിഗണനയ്ക്ക് വിടുകയും ചെയ്തു. ഗാന്ധിജിയടക്കമുള്ളവരുടെ പരിശോധനയ്ക്കും കോളനി ഭരണാധികാരികള്‍ സമ്മതിച്ചു എന്നതും എടുത്ത് പറയേണ്ടതാണ്. അവര്‍ നിര്‍ദേശിച്ച ചില തിരുത്തലുകള്‍ക്കും തയാറായി.
ഗാന്ധിജി ചൂണ്ടിക്കാട്ടിയ പോരായ്മകള്‍ അംഗീകരിക്കാന്‍ ബ്രിട്ടീഷ് ഭരണാധികാരികള്‍ തയാറായെന്നതും ശ്രദ്ധേയമാണ്. ഗാന്ധിജി നിര്‍ദേശിച്ച മാറ്റങ്ങളോടെയാണ് ബില്‍ നിയമമായത്. ഗാന്ധിജിയുടെ ഈ പാരമ്പര്യമാണ് മോഡി സര്‍ക്കാര്‍ നിര്‍ദയം നശിപ്പിച്ചിരിക്കുന്നത്. രാജ്യത്തെ പാര്‍ലമെന്റിന്റെയും മറ്റ് ഭരണ സംവിധാനങ്ങളുടെയും പ്രവര്‍ത്തനങ്ങളുടെ ഹൃദയമായ സൂക്ഷ്മ പരിശോധനയുടെയും വിശ്വാസ്യതയുടെയും സംസ്‌കാരമാണ് മോഡി സര്‍ക്കാര്‍ കരുതിക്കൂട്ടി ഇല്ലാതാക്കിയത്.
എന്‍ഐഎ, യുഎപിഎ, ആര്‍ടിഐ തുടങ്ങി ജമ്മു കശ്മീര്‍ പുനഃസംഘടന ബില്‍ ഉള്‍പ്പെടെ നിരവധി നിര്‍ണായക ബില്ലുകളും ഇത്തരത്തില്‍ വിശദമായ യാതൊരു ചര്‍ച്ചകളും കൂടാതെയാണ് മോഡി സര്‍ക്കാര്‍ പാസാക്കിയത്. ബന്ധപ്പെട്ട പാര്‍ലമെന്ററി സ്റ്റാന്‍ഡിംഗ് കമ്മിറ്റികളിലേക്കും വകുപ്പുകളിലേക്കും അയക്കണമെന്ന കീഴ്‌വഴക്കവും ലംഘിക്കപ്പെട്ടുവെന്നതും ദുഃഖകരമാണ്. സംഖ്യകളുടെ അടിസ്ഥാനത്തിലുള്ള പാര്‍ലമെന്റിലെ ഭൂരിപക്ഷം അതിനെ നയിക്കുന്നതിനും രാജ്യത്തെ ഭരിക്കുന്നതിനും നിദാനമല്ല. ഈ ഭൂരിപക്ഷമാണ് ജമ്മു കശ്മീരിന്റെ പ്രത്യേക പദവി റദ്ദാക്കല്‍ അടക്കമുള്ള പല ബില്ലുകളും പാസാക്കുന്നതിനും കാരണമായത്.
കഴിഞ്ഞ കൊല്ലത്തെ തന്റെ സ്വാതന്ത്ര്യ ദിന സന്ദേശത്തില്‍ പ്രധാനമന്ത്രി മോഡി പറഞ്ഞത് ഗാലിയും ഗോലിയുമല്ല കശ്മീര്‍ പ്രശ്‌നത്തിന് പരിഹാരമെന്നായിരുന്നു. ജനങ്ങള്‍ വന്‍ കരഘോഷത്തോടെയാണ് മോഡിയുടെ വാക്കുകള്‍ സ്വീകരിച്ചത്. ഇതിന് തൊട്ടുപിന്നാലെയാണ് ജമ്മു കശ്മീരിനെ കേന്ദ്രഭരണ പ്രദേശമായി തരംതാഴ്ത്തിയിരിക്കുന്നത്. ഇതും ഡയറിസത്തിന്റെ മറ്റൊരു രൂപമല്ലാതെ മറ്റൊന്നല്ല. ഇതിലൂടെ ഭരണഘടനയെ തിരുത്തുകയും ഫെഡറല്‍ സംവിധാനത്തെ അപകടത്തിലാക്കുകയും ചെയ്തിരിക്കുന്നു മോഡി. നിയമനിര്‍മാണ പ്രവര്‍ത്തനങ്ങളില്‍ ചര്‍ച്ചകളും സൂക്ഷ്മ പരിശോധനയും ഇല്ലാത്തതിന്റെ തെളിവാണിത്.
കശ്മീരിന്റെ പ്രത്യേക പദവിക്ക് മാറ്റം വരുത്താനായിരുന്നു നരേന്ദ്ര മോഡിയുടെയും അമിത്ഷായുടെയും നേതൃത്വത്തിലുള്ള ബിജെപി സംഘത്തിന് ഇത്രയേറെ ഭൂരിപക്ഷം നല്‍കിയതെന്നാണ് അവരുടെ വാദം. ഇത് നിയമപരമായി ഏറെ ശരിയാണെന്നാണ് സര്‍ക്കാരിന്റെ പക്ഷം. എന്നാല്‍ പല വിദഗ്ധരും ഇതിനെ അപലപിക്കുന്നു. ഇതിനെക്കുറിച്ച് ഒരു ഭരണഘടനാതല ചര്‍ച്ച തന്നെ ആവശ്യമുണ്ട്.
1946 ഡിസംബര്‍ 13ന് കോണ്‍സ്റ്റിറ്റിയുവന്റ് അസംബ്ലി ലക്ഷ്യ പ്രമേയ ചര്‍ച്ച സംഘടിപ്പിച്ചു. രണ്ട് ഗ്രൂപ്പുകള്‍ അസംബ്ലിയില്‍ ഇല്ലായിരുന്നു. ഇതേ തുടര്‍ന്ന് ഭേദഗതിയുമായി മുന്നോട്ട് പോകണമോ നിര്‍ത്തി വയ്ക്കണമോ എന്ന കാര്യത്തിലായി ചര്‍ച്ച. ബി ആര്‍ അംബേദ്ക്കര്‍ സമിതിക്ക് അന്ന് നല്‍കിയ മുന്നറിയിപ്പ് ജമ്മു കശ്മീര്‍ വിഷയത്തിലും പ്രാധാന്യമുള്ളതാണ്.
‘നിങ്ങള്‍ക്ക് അങ്ങനെ ചെയ്യാനുള്ള സ്വാതന്ത്ര്യമുണ്ട്. എന്നാല്‍ എന്റെ ചോദ്യമിതാണ്. അങ്ങനെ ചെയ്യുന്നത് നിങ്ങള്‍ക്ക് അഭിമാനകരമാണോ? അധികാരവും പാണ്ഡിത്യവും തികച്ചും വ്യത്യസ്തമാണ്. മറ്റൊരു കാഴ്ചപ്പാടില്‍ നിന്ന് ഈ പ്രശ്‌നം പരിഹരിക്കണമെന്നാണ് തനിക്ക് പറയാനുള്ളത്. ഈ ഘട്ടത്തില്‍ ഇത് ബുദ്ധിപരമോ നയതന്ത്രപരമോ അഭിമാനകരമോ എന്നതാണ് വിഷയം’. മതിയായ പരിശോധനയില്ലാതെ, കശ്മീര്‍ ജനതയുടെ അഭിപ്രായം തേടാതെ കശ്മീരിന്റെ പദവി റദ്ദാക്കിയതും അനുച്ഛേദം 35എ എടുത്തു കളഞ്ഞതും ബുദ്ധിപരമോ, നയതന്ത്രപരമോ അഭിമാനകരമോ എന്നതാണ് വിഷയം.
പല സുപ്രധാന ബില്ലുകളും മൃഗീയ ഭൂരിപക്ഷത്തോടെ പാസാക്കി സര്‍ക്കാര്‍ മുന്നേറുകയാണ്. ‘മിതമായ സര്‍ക്കാര്‍, പരമാവധി ഭരണം’ എന്നതാണ് ഇവരുടെ മുദ്രാവാക്യം. ബഹുമുഖമായ പാര്‍ലമെന്റിനെ കേവലം പാര്‍ലമെന്റാക്കി പരിമിതപ്പെടുത്തിയിരിക്കുന്നു. പാര്‍ലമെന്റ് അധികമായാല്‍ ജനാധിപത്യം ഇല്ലാതാകും. പ്രസിഡന്‍ഷ്യല്‍ ഭരണത്തിനുള്ള സാഹചര്യമാണ് ഒരുങ്ങുക. അത്തരം കരുത്തനായ ഒരു ഭരണാധികാരിയുടെ ഭരണം ഫാസിസത്തിലേക്കാകും നയിക്കപ്പെടുക. ഇത്തരം ഒരു ദുരന്തത്തിലേക്ക് രാജ്യം എത്തും മുമ്പ്, എല്ലാ പൗരന്‍മാരുടെയും ജനാധിപത്യത്തിലും നീതിയിലും വിശ്വസിക്കുന്ന രാഷ്ട്രീയ പാര്‍ട്ടികള്‍ ശക്തമായ പ്രതിരോധം സൃഷ്ടിക്കേണ്ടതുണ്ട്.