Saturday
07 Dec 2019

ഏകകാമുകന്‍

By: Web Desk | Sunday 25 August 2019 10:31 AM IST


അനീഷ് ദേവരാജന്‍

ഞാന്‍ ആത്മഹത്യ
ചെയ്യുന്ന ദിവസം വീണ്ടും
ഒരു പ്രളയമുണ്ടാകും
എന്റെ മുഖത്തെ നരകള്‍
അരുവികളാകും
ചെറിയ കുടിലുകള്‍
കെട്ടുവള്ളങ്ങളാകും
എന്റെ മൂക്കില്‍ നിന്ന്
അണ പൊട്ടി രക്തമൊഴുകും
കൊട്ടാരങ്ങളില്‍
കപ്പല്‍ഛേദത്തിന്റെ
വാര്‍ത്തകള്‍ നിറയും
അന്തപ്പുരങ്ങള്‍
രത്‌നകുംഭങ്ങളെ സ്വപ്‌നം കാണും
എന്റെ കരളില്‍ കടലിന്റെ പ്രണയം
ഉപ്പു നിറയ്ക്കും
എന്റെ വൃക്കകളില്‍
ചിപ്പികള്‍ മുട്ടയിട്ടു പെരുകും
എന്റെ കുടലുകള്‍ നിറയെ
നീരാളികള്‍ നിറയും
എന്റെ ശ്വാസകോശത്തില്‍
ജീവജാലങ്ങള്‍ കെട്ടിമറിയും
എന്റെ തുടകളില്‍ മത്സ്യകന്യകള്‍
വെയില്‍ കായും
എന്റെ കാല്‍വിരലുകള്‍
തിമിംഗലങ്ങലങ്ങളുടെ
മുലക്കുപ്പിയാകും
എന്റെ കൈവിരലുകള്‍
മാത്രം ഭൂമിയുടെ മുലകളില്‍
അള്ളിപ്പിടിച്ചിരിക്കും
എത്ര വെട്ടിയിട്ടാലും
എന്റെ ലിംഗം ഏതു പ്രളയത്തിലും
ഏതു കടലില്‍ നിന്നും
ഒരനന്തനാഗം ഉയര്‍ത്തി
യുയര്‍ത്തി നിര്‍ത്തും
ഞാന്‍ പിന്നെയും ഭൂമിയെ
പ്രണയിക്കും, ജനിപ്പിക്കും
അനന്തമായി എന്റെയും
അവളുടെയും മക്കളെ
ഏതു മഴയും, ഏതു കൊടുങ്കാറ്റും
എതു പ്രളയവും ഞങ്ങളെ
അകറ്റില്ല;ഞാനും അവളും
കെട്ടിപ്പിടിച്ചു കിടക്കുന്ന
ഭൂമികള്‍, അല്ല ഒരേ ഭൂമി
ഞാന്‍ എന്നും അവളുടെ
ഏക കാമുകന്‍