Friday
19 Jul 2019

പ്രാണന്‍ നഷ്ടപ്പെടുന്ന പ്രാണവായു

By: Web Desk | Thursday 6 June 2019 10:17 PM IST


തമലം വിജയന്‍

രിസ്ഥിതി സംരക്ഷണത്തിനായി ലണ്ടനില്‍ പരിസ്ഥിതി പ്രവര്‍ത്തകര്‍ 11 ദിവസം നടത്തിയ ശക്തമായ പ്രതിഷേധത്തിനൊടുവില്‍ ലോകത്ത് ആദ്യമായി ബ്രിട്ടനില്‍ കാലാവസ്ഥ അടിയന്തരാവസ്ഥ പ്രഖ്യാപിച്ച സമയത്താണ് പരിസ്ഥിതി ദിനം കടന്നുപോകുന്നത്. പ്രാണന്‍ നഷ്ടപ്പെടുന്ന പ്രാണവായുവിന്റെ രക്ഷയ്ക്കാണ് ‘വായു മലിനീകരണം’ എന്ന വിഷയം ഈ വര്‍ഷം തെരഞ്ഞെടുക്കപ്പെട്ടിട്ടുള്ളത്. ലോകജനതയുടെ 92 ശതമാനം പേര്‍ക്ക് ശ്വസിക്കുവാന്‍ ശുദ്ധവായു ലഭിക്കുന്നില്ല. വായു മലിനീകരണത്താല്‍ 2030 ആകുന്നതോടുകൂടി ഭക്ഷ്യ ധാന്യ ഉല്‍പദാനക്ഷമതയില്‍ 26 ശതമാനം വരെ കുറവ് ഉണ്ടാകുമെന്നു കണക്കാക്കപ്പെട്ടിരിക്കുന്നു. ലോകത്ത് ഏഴ് ദശലക്ഷം മനുഷ്യര്‍ വായുമലിനീകരണത്താല്‍ പ്രതിവര്‍ഷം മരിക്കുന്നു. വേള്‍ഡ് ഹെല്‍ത്ത് ഓര്‍ഗനൈസേഷന്റെ റിപ്പോര്‍ട്ടു പ്രകാരം ലോകത്ത് 10 ല്‍ ഒമ്പത് പേരും മലിനവായുവാണ് ശ്വസിക്കുന്നത്.

വായുമലിനീകരണം കുറയ്ക്കുന്നതിന് വനങ്ങളുടെ പങ്ക് വളരെ വലുതാണ്. നമുക്ക് ശ്വസിക്കാതിരിക്കാന്‍ കഴിയില്ല എന്ന നല്ല ബോധ്യം ഉള്ളപ്പോഴും ശ്വസിക്കുന്ന വായുമലിനപ്പെടാതിരിക്കാനുള്ള കാര്യക്ഷമമായ പ്രവര്‍ത്തനങ്ങളില്‍ നാം ഏര്‍പ്പെടാതിരിക്കുന്നത് ജീവന്റെ നിലനില്‍പ്പിനുതന്നെ ഭീക്ഷണിയായി മാറുകയാണ്. ‘ഗ്ലോബല്‍ ഫോറസ്റ്റ്’ വാച്ച് നടത്തിയ പഠനപ്രകാരം ലോകത്തെ വനം ഇന്ന് ആപല്‍ഘട്ടത്തിലാണെന്നും കഴിഞ്ഞ വര്‍ഷം ലോകത്ത് 12 ദശലക്ഷം ഹെക്ടര്‍ വന വിസ്തൃതി കുറഞ്ഞെന്നാണ് റിപ്പോര്‍ട്ട്. 2001 മുതലുള്ള വാര്‍ഷിക വന നശീകരണ തോതില്‍ കഴിഞ്ഞവര്‍ഷം നടന്നിട്ടുള്ള വന നശീകരണം എന്നത് നാലാമത്തെ ഏറ്റവും ഉയര്‍ന്ന അളവിലുള്ള വനനശീകരണമാണെന്നാണ് ഗ്ലോബല്‍ ഫോറസ്റ്റ് വാച്ച് വെളിപ്പെടുത്തുന്നത്.

ഗ്ലോബല്‍ ഇന്‍സ്റ്റിറ്റ്യൂട്ടിന്റെ റിപ്പോര്‍ട്ട് പ്രകാരം 590 ദശലക്ഷം ജനങ്ങള്‍ 2030 ആകുമ്പോഴേക്കും മഹാനഗരങ്ങളിലായിരിക്കും വസിക്കുന്നത്. 2050 ല്‍ ഇന്ത്യന്‍ ജനസംഖ്യയുടെ 50 ശതമാനം നഗരങ്ങളിലായിരിക്കും വസിക്കുക. വന്‍തോതിലുള്ള നഗരവല്‍ക്കരണം നഗരത്തിന്റെ അടിസ്ഥാന പശ്ചാത്തല സൗകര്യങ്ങളായ ഭവനം, വൈദ്യുതി, ജലവിതരണം, റോഡ്, ഗതാഗതം തുടങ്ങിയവയുടെ ആവശ്യകത ഗണ്യമായ തോതില്‍ വര്‍ദ്ധിക്കുന്നു. ഇത് പരിസ്ഥിതിക്ക് കൂടുതല്‍ ആഘാതം സൃഷ്ടിക്കും.

ശ്വസനം കൂടാതെ ജീവിക്കുക അസാധ്യമാണ്. എന്നാല്‍ വായുവിനെ അശുദ്ധമാക്കാതിരിക്കാന്‍ നമുക്ക് സാധ്യവുമാണ്. പൂര്‍ണ വളര്‍ച്ചയെത്തിയ ഒരു വ്യക്തി ഇരുപതിനായിരം ലിറ്റര്‍ വായു ഒരു ദിവസം ശ്വസിക്കും. ശുദ്ധവായു ശ്വസിക്കുന്നതിലൂടെ ശരീരാരോഗ്യം നിലനിര്‍ത്തുന്നതിന് കഴിയുന്നു. നാം ശ്വസിക്കുന്ന വായുവില്‍ നിരവധി മാലിന്യങ്ങള്‍ കലര്‍ന്നിട്ടുണ്ട്. പ്രധാനമായും വാഹനങ്ങളില്‍ നിന്നും, വ്യവസായശാലകളില്‍ നിന്നും ബഹിര്‍ഗമിക്കുന്ന മലിനവായു അന്തരീക്ഷ വായുമണ്ഡലത്തില്‍ കലര്‍ന്ന് നിരവധി ആരോഗ്യ പ്രശ്‌നങ്ങള്‍ സൃഷ്ടിക്കുന്നു. കണ്ണിനും തലച്ചോറിനും നാഡീവ്യൂഹത്തിനും രോഗം വരുത്തുന്നു. കൂടാതെ ശരീരത്തിന്റെ രോഗപ്രതിരോധ ശക്തി കുറച്ച് ആസ്തമയും കാന്‍സറും കരള്‍ രോഗവും ഉള്‍പ്പെടെ മറ്റ് മാരകമായ രോഗങ്ങളും വരുത്തുന്നു. വൃക്ഷങ്ങളുടെയും മൃഗങ്ങളുടെയും നിലനില്‍പ്പിനും തടാകങ്ങള്‍ അശുദ്ധമാകുന്നതിനും ഇടയാകുന്നു. മലിനവായു ഓസോണ്‍ പാളിയെ തകര്‍ത്ത് സുക്ഷിരങ്ങള്‍ ഉണ്ടാക്കുന്നതിനാല്‍ മാരകമായ അള്‍ട്രാവയലറ്റ് രശ്മികള്‍ ഭൂമിയില്‍ പതിക്കുന്നു. ഇക്കാരണത്താല്‍ ക്രമാതീതമായ ചൂട് ഭൂമിയില്‍ ഉണ്ടാകുകയും ആഗോള താപനത്തിനും കാലാവസ്ഥാ വ്യതിയാനത്തിനും ഇടയാകുന്നു.

1970 ലെ ക്ലീന്‍ എയര്‍ ആക്ട് പ്രകാരം നാഷണല്‍ ആംബിയന്റ് എയര്‍ക്വാളിറ്റി സ്റ്റാന്‍ഡേര്‍ഡ്‌സ് നിലവില്‍ വന്നു. കാര്‍ബണ്‍ മോണോക്‌സൈഡ്, നൈട്രജന്‍ ഡയോക്‌സൈഡ്, സള്‍ഫര്‍ ഡയോക്‌സൈഡ്, ഓസോണ്‍, ലെഡ്, പര്‍ട്ടിക്കുലേറ്റ് മാറ്റര്‍ തുടങ്ങിയ വായു മലിനീകരണത്തിനടയാക്കുന്ന വാതകങ്ങളെയും പദാര്‍ത്ഥാംശങ്ങളെയും നിയന്ത്രിക്കുക എന്ന ഉദ്ദേശ്യത്തോടുകൂടിയാണ് എയര്‍ക്വാളിറ്റി സ്റ്റാന്‍ഡേര്‍ഡ്‌സ് പ്രാബല്യത്തില്‍ വന്നത്. എങ്കില്‍ ഇപ്പോള്‍ ഇന്ത്യയിലെ ചില നഗരങ്ങളില്‍ വായു മലിനീകരണ തോത് സുരക്ഷിത അളവില്‍ നിന്നും അഞ്ച് മടങ്ങ് കൂടുതലാണ്. ‘യാല്‍ ആന്റ് കൊളംബിയ’ തയ്യാറാക്കിയ 132 രാജ്യങ്ങളിലെ വായു മലിനീകരണ പട്ടികയില്‍ ഇന്ത്യയുടെ സ്ഥാനം ഏറ്റവും അവസാനത്തേതാണ്. ഇത് സൂചിപ്പിക്കുന്നത് ലോകത്ത് ഏറ്റവും കൂടുതല്‍ വായു മലിനപ്പെട്ടിരിക്കുന്നത് ഇന്ത്യയിലാണ് എന്നാണ്.

ഭൂമിക്ക് ചുറ്റുമുള്ള വായുമണ്ഡലത്തിലെ ഒമ്പത് ശതമാനം നൈട്രജനും 20 ശതമാനം ഓക്‌സിജനും ഒരു ശതമാനം കാര്‍ബണ്‍ ഡൈ ഓക്‌സൈഡും മറ്റ് വാതകങ്ങളും കൂടി കലര്‍ന്നിരിക്കുന്നു. ഇന്ത്യയില്‍ വായുമലിനീകരണം വളരെ കൂടുതലാണെന്നാണ് ലോക സാമ്പത്തിക ഫോറത്തിന്റെയും കണക്ക്. ഇപ്പോള്‍ അന്തരീക്ഷത്തില്‍ കാര്‍ബണ്‍ഡൈഓക്‌സൈഡിന്റെ അളവ് 410 പിപിഎം (പാര്‍ട്ട്‌സ് പെര്‍ മില്യണ്‍) ആകുന്നു. വ്യാവസായിക യുഗത്തിന് മുമ്പ് ഇത് 280 പിപിഎം ആയിരുന്നു. 2100 ആകുമ്പോള്‍ 500 പിപിഎം ആകുമെന്ന് പഠനങ്ങള്‍ സൂചിപ്പിക്കുന്നു.
വായുശുദ്ധതയുടെ സൂചകമായി പാര്‍ട്ട്‌സ് പെര്‍ മില്യണ്‍ പൂജ്യം മുതല്‍ 500 വരെയുള്ള പരിധിയില്‍ കണക്കാക്കുന്നു. വായു ശുദ്ധതയുടെ സൂചകം പൂജ്യം മുതല്‍ 50 വരെയാണെങ്കില്‍ വായുമലിനീകരണം വളരെക്കുറവും – തൃപ്തികരവുമാണ്. ഈ അവസ്ഥയ്ക്ക് പച്ച നിറമാണ് അടയാളമായി നല്‍കിയിട്ടുള്ളത്. 51 മുതല്‍ 100 വരെ പരിധിയിലുള്ള വായു കുറച്ച് മലിനമായിട്ടുണ്ട്. ഇത് ശ്വസിക്കുന്നത് ആരോഗ്യപ്രശ്‌നം ചെറിയ തോതില്‍ ഉണ്ടാക്കുന്നു. ഇതിന് മഞ്ഞനിറമാണ് അടയാളം. 101 മുതല്‍ 150 വരെ പരിധിയിലെ വായുവില്‍ കലര്‍ന്നിട്ടുള്ള മാലിന്യം ശ്വാസകോശ രോഗങ്ങള്‍ക്ക് കാരണമാകുന്നു. ഇത് ഓറഞ്ച് നിറത്തില്‍ അടയാളപ്പെടുത്തുന്നു. 151-200 പരിധിയില്‍ ഉള്ള വായു ശ്വസിക്കുമ്പോള്‍ കഠിനമായ രോഗങ്ങള്‍ ഉണ്ടാകുന്നു. ഇത് പര്‍പ്പിള്‍ കളറില്‍ അടയാളപ്പെടുത്തുന്നു. 201-300 പരിധിയില്‍ വളരെ ഗുരുതര ആരോഗ്യപ്രശ്‌നം വരുത്തുന്നു. ഇത് ചുവന്ന നിറത്തില്‍ അടയാളപ്പെടുത്തുന്നു. 301നും 500നും പരിധിയില്‍ വരുന്ന വായു ശ്വസിക്കുന്നത് വളരെയധികം ഹാനികരമാണ്. ഇത് മറൂണ്‍ അടയാളത്തിലാണ് സൂചിപ്പിക്കുന്നത്.

കാര്‍ബണ്‍ മോണോക്‌സൈഡ് ഒരു വിഷവാതകമാണ്. തടി, പ്രകൃതിവാതകം, പെട്രോളിയം ഉല്‍പന്നങ്ങള്‍ എന്നിവയുടെ ജ്വലനം പൂര്‍ണമായി നടക്കാതിരിക്കുമ്പോള്‍ പുറപ്പെടുവിക്കുന്നതാണ് കാര്‍ബണ്‍ മോണോക്‌സൈഡ് വാതകം. അപകടകരമായ ഈ വാതകം ഹൃദയത്തെയും രക്തധമനികളെയും കേടുവരുത്തുന്നു.
യുഎന്നിന്റെ ഏഷ്യാ-പസഫിക്കിലെ വായുമലിനീകരണം സംബന്ധിച്ച പുതിയ റിപ്പോര്‍ട്ടുപ്രകാരം 25 പുത്തന്‍ സാങ്കേതിക നയങ്ങള്‍ നടപ്പാക്കുന്നതിലൂടെ ലോകത്ത് കാര്‍ബണ്‍ഡൈ ഓക്‌സൈഡിന്റെ ബഹിര്‍ഗമനം 20 ശതമാനം കുറയ്ക്കുവാനും മീഥൈന്‍ ബഹിര്‍ഗമനം 45 ശതമാനം കുറയ്ക്കുവാനും അതുവഴി ആഗോള താപനത്തിന്റെ കാഠിന്യം ഗണ്യമായി കുറയ്ക്കുന്നതിനും ലക്ഷ്യമിടുന്നുണ്ട്. ക്ലീന്‍, ഗ്രീന്‍, സ്മാര്‍ട്ട് സിറ്റികള്‍ രൂപീകരിക്കുവാനും പദ്ധതികള്‍ തയ്യാറാക്കിയിട്ടുണ്ട്.

വായുവിന്റെ ഗുണനിലവാരം മെച്ചപ്പെടുത്തുന്നതിന് ലോകത്താകെ പരിസ്ഥിതി സൗഹൃദമായ ഗ്രീന്‍ ടെക്‌നോളജിയുടെ വ്യാപനം അനിവാര്യമാണ്. 2004 ലെ ഇന്‍ഡസ്ട്രിയല്‍ ടെക്‌നോളജി പ്രോഗ്രാം റിപ്പോര്‍ട്ട് പ്രകാരം കൂടുതല്‍ കാര്യക്ഷമതയുള്ള സാങ്കേതിക വിദ്യകള്‍ വികസിപ്പിച്ചെടുത്ത് അവ പ്രയോഗത്തില്‍ കൊണ്ടുവന്ന് യുണൈറ്റഡ് സ്റ്റേറ്റിലെ വ്യവസായങ്ങളിലെ ഉല്‍പാദനക്ഷമത വര്‍ദ്ധിപ്പിച്ച് ഊര്‍ജ്ജ ലഭ്യത ഉറപ്പുവരുത്തുകയും കാലാവസ്ഥാ വ്യതിയാനത്തിനും വായുമലിനീകരണത്തിനും കാരണമാകുന്ന ഹരിതഗൃഹവാതകങ്ങളുടെ ബഹിര്‍ഗമനം കുറച്ച് പാരിസ്ഥിതികാഘാതം കുറയ്ക്കുന്നതിനുള്ള ശ്രമങ്ങള്‍ നടക്കുന്നു. ഓരോ വ്യവസായ സ്ഥാപനത്തിലും ഒരു മുഴുവന്‍ സമയ എനര്‍ജി മാനേജര്‍ ഉണ്ടായിരിക്കണമെന്ന കര്‍ശന നിയമം ജപ്പാനില്‍ നടപ്പിലാക്കിയിട്ടുണ്ട്.
ശുദ്ധവായുവിന്റെ തല്‍സമയ നിരീക്ഷണത്തിന് വേണ്ട ഉപകരണങ്ങളുടെ കുറവ് ഉള്ളതിനാല്‍ ഇന്ത്യയിലെ നഗരങ്ങളിലെ മലിനവായുവിന്റെ അളവ് മനസിലാക്കുവാന്‍ കഴിയുന്നില്ല. 6166 നഗരങ്ങളില്‍ വെറും 303 നഗരങ്ങളില്‍ മാത്രമേ രാജ്യത്ത് വായുവിന്റെ ഗുണ നിലവാരം നിരീക്ഷിക്കപ്പെടുന്നുള്ളൂ. 57 നഗരങ്ങളില്‍ മാത്രമേ ഇപ്പോള്‍ തല്‍സമയ നിരീക്ഷണ സ്റ്റേഷനുകളുള്ളൂ. മറ്റിടങ്ങളില്‍ മനുഷ്യര്‍ നേരിട്ട് നടത്തുന്ന പരിശോധനകളാണുള്ളത്. രാജ്യത്ത് ഏറ്റവും കൂടുതലായി 30 നിരീക്ഷണ സ്റ്റേഷനുകള്‍ ഉള്ളത് ഡല്‍ഹിയിലാണ്. കോടതി നിര്‍ദ്ദേശ പ്രകാരം ഡല്‍ഹി പൊലൂഷന്‍ കണ്‍ട്രോള്‍ കമ്മിറ്റി 21 വായു ഗുണനിലവാര സ്റ്റേഷനുകള്‍ കൂടി ഇപ്പോള്‍ സ്ഥാപിച്ചിട്ടുണ്ട്.

മനുഷ്യര്‍ക്ക് ജീവന്‍ നിലനിര്‍ത്തുന്നതിനായി ശ്വസിക്കുവാന്‍ വേണ്ട ശുദ്ധവായുവിന്റെ പ്രാണന്‍ തന്നെ നഷ്ടപ്പെടുന്ന സാഹചര്യത്തില്‍ പ്രാണവായുവിന്റെ ശുദ്ധീകരണത്തിന് വേണ്ടിയുള്ള ഓരോ ചെറിയ പ്രവര്‍ത്തനങ്ങളും ഗുണകരമായ വന്‍മാറ്റങ്ങള്‍ തന്നെയുണ്ടാക്കും. വനവിസ്തൃതികൂട്ടിയും ഊര്‍ജ്ജസംരക്ഷണം നടത്തിയും പരിസ്ഥിതിക്കിണങ്ങിയ വാഹന ഉപയോഗത്തിലൂടെയും പാഴ്‌വസ്തുക്കള്‍ കത്തി ക്കാതെ പുനരുപയോഗം ചെയ്യുന്നതിലൂടെയും വായുവിനെ മലിനപ്പെടുത്താതിരിക്കാന്‍ ശ്രമിക്കാവുന്നതാണ്. 2019 ലെ പരിസ്ഥിതി സംരക്ഷണദിനത്തില്‍ വായുമലിനീകരണ തോത് കുറയ്ക്കുന്നതിനുള്ള ധാരാളം പ്രവര്‍ത്തനങ്ങള്‍ ഉണ്ടാകട്ടെ എന്നാഗ്രഹിക്കുന്നു.