Janayugom Online
facebook-janayugom

ജീവന്റെ ജീവനാണ്‌ കലാമണി; ഓർക്കുന്നു കേരളത്തിന്റെ കരുതലും

Web Desk

കൊച്ചി

Posted on June 03, 2020, 4:37 pm

തന്റെ ജീവന്റെ  ജീവനായ അനന്തരാവകാശിയുടെ  ജീവന്റെ തുടിപ്പുകൾ ഇല്ലായെന്ന തോന്നൽ വരുന്നു. ഇത്തരൊടെങ്കിലും പറയാൻ ഭാഷയും വലിയ ‌പിടിയില്ല. അപ്പോൾ സഹായവുമായി വരുന്നയൊരാളെ എങ്ങനെ മറക്കും. ഇത്തരം ഒരു കഥ പറയുമ്പോൾ നാട്കേരളമാണ്.പേരുകൾ മാറിവരുമെങ്കിലും സ്നേഹത്തിന്റെ സാക്ഷ്യങ്ങൾക്ക് കേരളമാണ് അടിസ്ഥാനഭൂമി . ഭാഷയുടെയും നാടിന്‍റെയും സംസ്കാരത്തിന്‍റെയും അതിരുകളലിയുന്ന കനിവിന്‍റെ ലോക് ഡൗണ്‍ അനുഭവങ്ങളിലേക്ക് മറ്റൊരു കുറിപ്പ് കൂടി.ഇരിങ്ങോള്‍ ജി.വി.എച്ച്.എസ്.എസിലെ സൈക്കോസോഷ്യല്‍ കൗണ്‍സിലര്‍ ആയ എ.ആര്‍ കലാമണിയാണ് ഉത്തരാഖണ്ഡ് സ്വദേശിയായ യുവാവിനെയും ഭാര്യയെയും സഹായിക്കാൻ സാധിച്ചതിന്റെ സന്തോഷം ഫേസ് ബുക്കിലൂടെ പങ്കുവച്ചത്.

യുവാവും ആറ് മാസം ഭര്‍ഭിണിയായ ഭാര്യയും കലാമണിക്ക് ഇപ്പോള്‍ സ്വന്തം സഹോദരങ്ങളാണ്. വനിത ശിശു ക്ഷേമ വകുപ്പിൻറെ സൈക്കോ സോഷ്യല്‍ ടെലി കൗണ്‍സിലിങ്ങിന്‍റെ ഭാഗമായാണ് കലാമണി ആ യുവാവിനെ ആദ്യമായി ഫോണില്‍ വിളിക്കുന്നത്. എന്താവശ്യത്തിനും ഒരു വിളിപ്പാടകലെ കരുതലോടെ ഒരാള്‍ ഉണ്ടെന്ന വാഗ്ദാനമായിരുന്നു ആ വിളിയില്‍ പങ്കു വെച്ചത്. ദിവസങ്ങള്‍ക്ക് ശേഷം പരിഭ്രാന്തിയോടെ ആ നമ്പറില്‍ നിന്ന് വിളിയെത്തുമ്പോള്‍ ഒരാളുടെ ജീവിതത്തിലെ അവസാന പ്രതീക്ഷ താനാണെന്ന് കലാമണി സ്വപ്നത്തില്‍ പോലും ചിന്തിച്ചിരുന്നില്ല.

യുവാവും അദ്ദേഹത്തിന്‍റെ ഗര്‍ഭിണിയായ ഭാര്യയും മാത്രമാണ് കേരളത്തിലുണ്ടായിരുന്നത്. ഒരു ദിവസം മുഴുവന്‍ കുഞ്ഞ് അനക്കമില്ലാതിരുന്നപ്പോള്‍ ഭയന്നാണ് യുവാവ് കലാമണിയെ വിളിച്ചത്. സഹായിക്കാന്‍ ആരുമില്ലെന്നും ആരെ വിളിക്കണമെന്ന് അറിയില്ലെന്നുമുള്ള കരച്ചിലിൻറെ വക്കിലെത്തിയ ആശങ്ക . ഒപ്പമുണ്ട് എന്ന വാക്കു മാത്രമായിരുന്നു കലാമണിക്ക് തിരിച്ചു നല്‍കാനുണ്ടായിരുന്നത്. ഹിന്ദി മാത്രമറിയാവുന്ന ഭാര്യയോട് നന്നായി ഹിന്ദി കൈകാര്യം ചെയ്യുന്ന സൈക്കോ സോഷ്യല്‍ കൗണ്‍സിലറായ ഹണിയുടെ സഹായത്തോടെ ബന്ധപ്പെട്ടു. പ്രോഗ്രാം ഓഫീസര്‍ മായാലക്ഷ്മിയുടെ സഹായത്തോടെ നിമിഷ നേരങ്ങള്‍ക്കകം ആരോഗ്യ വകുപ്പിന്‍റെ ആംബുലന്‍സ് യുവാവിൻറെ താമസസ്ഥലത്തെത്തി.

കുഞ്ഞ് സുരക്ഷിതമായിരിക്കണേ എന്ന പ്രാര്‍ത്ഥനയില്‍ പകലാക്കിയ രാത്രിയായിരുന്നു അത്. രാത്രി ഒരു മണിയോടെ ആശ്വസത്തിൻറെ സന്ദേശമെത്തി. കുഞ്ഞ് സുരക്ഷിതമായിരിക്കുന്നു, ഡോക്ടര്‍ നിര്‍ദേശിച്ച മരുന്നുകളുടെ വിവരങ്ങള്‍ സുഹ‍ൃത്തുക്കളുടെ സഹായത്തോടെ  യുവാവിനെ  പറഞ്ഞു മനസിലാക്കി.  ഭാഷയറിയാത്ത ഒരിക്കലെങ്കിലും നേരില്‍ കാണുമോയെന്നറിയാത്ത യാതൊരു വിവരങ്ങളുമറിയാത്ത ഒരു കുടുംബവുമായി വിളക്കിയെടുത്ത ബന്ധം വാക്കുകള്‍ക്ക് പറഞ്ഞു തീര്‍ക്കാന്‍ സാധിക്കില്ല.

കഴിഞ്ഞ ദിവസം കലാമണിക്ക് ഉത്തരാഖണ്ഡില്‍ നിന്നൊരു ഫോണ്‍ വിളിയെത്തി. സഹോദരി എന്ന വിളിയോടെ… നന്ദിയോടെ …കാതങ്ങള്‍ക്കപ്പുറം തനിക്കൊരു സഹോദരിയുണ്ടെന്ന് കുടുംബാംഗങ്ങളെ അറിയിച്ചു എന്ന സന്തോഷത്തോടെ…ജിവന്‍റെ സൃഷ്ടിയില്‍ കാവലാളാവുക എന്ന മഹത്തായ കര്‍മമാണ് താന്‍ ചെയ്തതെന്ന പൂര്‍ണവിശ്വാസമുണ്ട് കലാമണിക്ക്. രോഗങ്ങളും ദൂരങ്ങളും മനുഷ്യനെ അകറ്റിയാലും മനുഷ്യത്വമെന്ന വികാരം എന്നും ഒരുമിച്ചു നിര്‍ത്തുമെന്ന ഉറച്ച വിശ്വാസവും.

ഫേസ്ബുക്ക് പോസ്റ്റിന്റെ പൂർണ രൂപം


Eng­lish sum­ma­ry: Kala­mani’s face­book post