Web Desk

ന്യൂഡൽഹി

December 06, 2020, 8:30 pm

തീപിടിച്ച് ഇന്ധനവില

തുടർച്ചയായ അഞ്ചാം ദിവസവും വിലകൂട്ടി
Janayugom Online

തലതിരിഞ്ഞ സാമ്പത്തിക നയങ്ങളിലൂടെ നിത്യോപയോഗ സാധനങ്ങളുടെ വിലക്കയറ്റത്തിന് വഴിവച്ച കേന്ദ്ര സർക്കാർ പാചക വാതക വിലകൂട്ടിയതിന് പിന്നാലെ ദിനം പ്രതിയെന്നോണം ഇന്ധനവിലയും വർധിപ്പിച്ച് ജനജീവിതം ദുസ്സഹമാക്കുന്നു. നരേന്ദ്രമോഡി അധികാരത്തിലെത്തിയതിന് ശേഷം ഇന്ധനവില വർധന ഇരട്ടിയോടടുക്കുകയാണ്. പെട്രോളിന് 28 പൈസയും ഡീസലിന് 31 പൈസയുമാണ് ഇന്നലെ വർധിപ്പിച്ചത്. ഇതോടെ ഇന്ധനവില രണ്ടുവർഷത്തെ ഏറ്റവും ഉയർന്ന നിരക്കിലായി. നവംബർ 20ന് ശേഷം പെട്രോൾ ലിറ്ററിന് 2.40 രൂപയും ഡീസലിന് 3.36 രൂപയുമാണ് കൂട്ടിയിരിക്കുന്നത്. കഴിഞ്ഞ രണ്ടാഴ്ചയ്ക്കുള്ളിലെ 13-ാമത്തെ വില വർധനവാണിത്. ഡൽഹിയിൽ പെട്രോൾ ലിറ്ററിന് 83.41, ഡീസലിന് 73.61 രൂപയാണ് ഇന്നലത്തെ വില. നഗരപരിധിക്ക് പുറത്ത് യഥാക്രമം 85, 79 രൂപയാണ് വില. കേരളത്തിൽ ഇന്നലെ പെട്രോൾ ലിറ്റിന് 83.66 രൂപയും ഡീസലിന് 77.74 രൂപയുമായി.

പൊതുമേഖലാ എണ്ണ വിപണന കമ്പനികളായ ഇന്ത്യൻ ഓയിൽ കോർപ്പറേഷൻ (ഐഒസി), ഭാരത് പെട്രോളിയം കോർപ്പറേഷൻ ലിമിറ്റഡ് (ബിപിസിഎൽ), ഹിന്ദുസ്ഥാൻ പെട്രോളിയം കോർപ്പറേഷൻ ലിമിറ്റഡ് (എച്ച്പിസിഎൽ) എന്നിവ അന്താരാഷ്ട്ര എണ്ണ വിലയും വിദേശനാണ്യ നിരക്കും അടിസ്ഥാനമാക്കിയാണ് പ്രതിദിനം പെട്രോൾ, ഡീസൽ നിരക്കുകൾ പരിഷ്കരിക്കുന്നത്. അന്താരാഷ്ട്ര എണ്ണ വിലയിലെ വർധനവിനെ തുടർന്നാണ് ആഭ്യന്തര വിപണിയിലും വില ഉയർന്നതെന്നാണ് സർക്കാർ ഭാഷ്യം. എന്നാൽ അന്താരാഷ്ട്ര വിപണിയിൽ എണ്ണ വില കുറഞ്ഞാൽ രാജ്യത്തെ എണ്ണ കമ്പനികൾ അത് കണ്ടഭാവം നടിക്കാറില്ല.

ഏപ്രിലിൽ ക്രൂഡ് ഓയിൽ വില ബാരലിന് 20 യുഎസ് ഡോളറിൽ താഴെയായിരുന്നു. ഇപ്പോൾ മാസങ്ങളായി വില ബാരലിന് ഏകദേശം 40 യുഎസ് ഡോളർ ആയി തുടരുകയാണ്. പെട്രോൾ, ഡീസൽ ഉല്പന്നങ്ങളുടെ ലിറ്റർ എക്സൈസ് തീരുവ 3–6 രൂപ വർധിപ്പിക്കാനുള്ള നീക്കവും സർക്കാർ നിലവിൽ നടത്തുന്നുണ്ടെന്നാണ് റിപ്പോർട്ട്. യൂറോപ്പിലെയും യുഎസിലെയും കോവിഡിന്റെ രണ്ടാം തരംഗത്തിനിടയിലും ലിബിയൻ എണ്ണ ഉല്പാദനം പ്രതിദിനം 0.1 ദശലക്ഷം ബാരലിൽ നിന്ന് (ബിപിഡി) 1.25 ദശലക്ഷം ബിപിഡി ആയി ഉയർന്നിട്ടും എണ്ണവില ഇന്ത്യയിൽ കുതിച്ചുയരുകയാണ്. ഉല്പാദന കമ്പനികൾ യാതൊരു ന്യായീകരണവുമില്ലാതെ ഈ മാസം തുടർച്ചയായി പെട്രോൾ, ഡീസൽ വില ഉയർത്തിക്കൊണ്ടിരിക്കുകയാണ്. കഴിഞ്ഞ ആറ് മാസത്തിനിടെ ബ്രെന്റ് ക്രൂഡ് ഓയിൽ വിലയിൽ ഇടിവുണ്ടായിട്ടും ഇന്ധന വില 30 തവണയിൽ കൂടുതലാണ് ഉയർന്നിട്ടുള്ളത്.

2014 ൽ പെട്രോളിന് 47.12 , ഇന്നലെ 83.41 രൂപ

2014 മെയ് മാസം നരേന്ദ്രമോഡി അധികാരമേറുമ്പോൾ ഡൽഹിയിൽ പെട്രോളിന്റെയും ഡീസലിന്റെയും വില ലിറ്ററിന് യഥാക്രമം 47.12, 44.98 രൂപയായിരുന്നു. എന്നാൽ ഇന്നലത്തെ വിലവർധനയ്ക്കുശേഷം ഡൽഹിയിൽ പെട്രോൾ വില ലിറ്ററിന് 83.41 രൂപയും ഡീസലിന് 73.61 രൂപയുമായിരിക്കുകയാണ്.
അതേസമയം 2014ൽ അസംസ്കൃത എണ്ണയുടെ വില ബാരലിന് ശരാശരി 106.85 യുഎസ് ഡോളറായിരുന്നുവെങ്കിൽ ഇപ്പോൾ 47 ഡോളർ മാത്രമാണ്. നവംബറിൽ ഇത് ശരാശരി 44 യുഎസ് ഡോളറായിരുന്നു. ഇന്ധന വില വർധനവിലൂടെ കമ്പനികൾ ജനങ്ങളെ കൊള്ളയടിക്കുമ്പോൾ മൗനത്തിലാണ്ടിരിക്കുകയാണ് ബിജെപി സർക്കാർ.

Eng­lish Sum­mery; Fuel price hikes in India

You may like this video also