August 18, 2022 Thursday

ജനറൽ ബോഗി

രാധാകൃഷ്ണൻ പെരുമ്പള
കവിത
August 1, 2022 11:14 pm

നറൽ ബോഗി;
ഉടലുകളുടെ നിബിഢ വനസ്ഥലി,
ആകസ്മിക യാത്രികരുടെ
അഭയ സങ്കേതം.
തിങ്ങുന്ന തിരക്കിൽ
ഇരിപ്പിടം കിട്ടാതെ
നിന്നു കുഴയുന്നവർ
ഒളിച്ചോടുന്ന പ്രണയികൾ,
മരണവീട്ടിലേക്കു പുറപ്പെട്ട
ബന്ധുക്കൾ, സുഹൃത്തുക്കൾ,
ആസ്പത്രിയിലേക്കുള്ള
രോഗികളും കൂട്ടിരിപ്പുകാരും,
അതിർത്തിയിലേക്ക്
യുദ്ധത്തിനു വിളിക്കപ്പെട്ട സൈനികർ.…
ഭിക്ഷാടകർ, സന്യാസിമാർ,
കള്ളന്മാർ, പോക്കറ്റടിക്കാർ,
പെട്ടിപ്പാട്ടുകാർ, തെണ്ടിക്കച്ചവടക്കാർ…
നിലവിളിക്കുന്ന കുഞ്ഞുങ്ങൾ
ഉറക്കം പിടിച്ചു
ചവിട്ടടിയിൽ വീണവർ
ടിക്കറ്റെടുത്തും എടുക്കാതെയും
സമരത്തിനു പോകുന്നവർ
അവരുടെ അലറി വിളിക്കുന്ന
കണ്ഠങ്ങൾ,
ചുളുങ്ങിയ കൊടികൾ. .
തിരസ്കൃതരുടെ റിപ്പബ്ലിക്കിൽ
ഇരിപ്പിടമുറപ്പിച്ചവർക്കു മാത്രമുള്ള
പത്രങ്ങൾ, പുസ്തകങ്ങൾ..
അവർക്കു മാത്രം എഴുതാവുന്ന
കണക്കുകൾ സാഹിത്യങ്ങൾ..
പുറപ്പെട്ടു പോകുന്നവരോടൊപ്പം
മരിച്ചവരും പോകുന്നു
നില തെറ്റി വീണവർ
തള്ളിയിറക്കപ്പെട്ടവർ
അവരുടെ അനാഥമായ ഭാണ്ഡങ്ങൾ
മുഷിഞ്ഞ തൂവാലകൾ
മുറിഞ്ഞ വാക്കുകൾ. 

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.