Friday
06 Dec 2019

രാജ്യത്തെ ആദ്യത്തെ ഗോള്‍ കീപ്പിങ് അക്കാദമി കൊച്ചിയില്‍ സ്ഥാപിക്കാന്‍ കേരള ബ്ലാസ്റ്റേഴ്‌സ്

By: Web Desk | Monday 8 July 2019 6:30 PM IST


കൊച്ചി: ഗോള്‍ കീപ്പിങ്ങില്‍ മികച്ച താരങ്ങളെ വളര്‍ത്തിയെടുക്കുന്നതിന്റെ ഭാഗമായി കേരള ബ്ലാസ്റ്റേഴ്‌സ് ഫുട്‌ബോള്‍ ക്ലബ് രാജ്യത്തെ ആദ്യത്തെ ഗോള്‍ കീപ്പിങ് അക്കാദമി കൊച്ചിയില്‍ ആരംഭിക്കും . മുന്‍ ഇംഗ്‌ളീഷ് താരം ജോണ്‍ ബുറിഡ്ജ് പ്രതിഭകളെ കണ്ടെത്തുകയും പരിശീലിപ്പിക്കുകയും ചെയ്യും. ഫുട്‌ബോള്‍ താരങ്ങളില്‍ ഗോള്‍ കീപ്പിങ് കഴിവ് വികസിപ്പിക്കുകയാണ് അക്കാദമിയുടെ ലക്ഷ്യമെന്ന് കേരള ബ്ലാസ്റ്റേഴ്‌സ് ഫുട്ബാള്‍ ക്ലബ് അധികൃതര്‍ പറഞ്ഞു. അന്താരാഷ്ട്ര തലത്തില്‍ ഉള്ള മികവ് താരങ്ങളില്‍ രൂപപ്പെടുത്തും. തുടക്കത്തില്‍ സീനിയര്‍ ടീമിലും റിസര്‍വ് ടീമിലും പിന്നീട് യുവ താരങ്ങളിലും ആയിരിക്കും ശ്രദ്ധ കേന്ദ്രീകരിക്കുക.

”ഒരു ഗോള്‍ കീപ്പര്‍ക്ക് കൃത്യമായ നൈപുണ്യവും ഗുണഗണങ്ങളും ആവശ്യമുണ്ട്. ഇതിന് പ്രത്യേകമായ കോച്ചിങ് സമീപനം ആവശ്യമുണ്ട്. ലോകത്തിലെ ഏറ്റവും മികച്ച ഗോള്‍ കീപ്പര്‍മാരായി ഇന്ത്യയിലെ പ്രതിഭകളെ വളര്‍ത്തിയെടുക്കലാണ് ഞങ്ങളുടെ ലക്ഷ്യം. ഇപ്പോള്‍ തന്നെ അനുയോജ്യമായ ശാരീരിക ക്ഷമതയും കഴിവും ഉള്ള ആളുകളെ അക്കാദമിയിലേക്ക് തേടി കൊണ്ടിരിക്കുകയാണ്. ഏറ്റവും മികച്ച അനുഭവപരിചയം ഉള്ള ശ്രീ. ജോണ്‍ ഈ അക്കാദമിക്ക് തീര്‍ത്തും അനുയോജ്യനായ കോച്ചും കണ്‍സള്‍ട്ടന്റും ആണ് ”. കേരള ബ്ലാസ്റ്റേഴ്‌സ് സിഇഒ വിരെന്‍ ഡി സില്‍വ പറഞ്ഞു.

കോച്ച് ആയ ബുറിഡ്ജ് ഇംഗ്‌ളീഷ്, സ്‌കോട്ടിഷ് ലീഗുകളിലായി 771 മത്സരങ്ങളില്‍ കളിച്ചിട്ടുണ്ട്. 29 വര്‍ഷത്തെ കരിയറില്‍ 31 ടീമുകളില്‍ അദ്ദേഹം പ്രവര്‍ത്തിച്ചിട്ടുണ്ട്. ”ഈ കളിയോടുള്ള കേരളത്തിന്റെ ആവേശത്തില്‍ ഞാന്‍ പൂര്‍ണ തൃപ്തന്‍ ആണ്. ഫുട്‌ബോളില്‍ മികച്ച കഴിവുള്ളവരുടെ ഇടം ആണിതെന്നു എനിക്കുറപ്പുണ്ട്. യുവതാരങ്ങളെ ഗോള്‍ കീപ്പിങ്ങില്‍ പരിശീലിപ്പിച്ച് ഗോള്‍കീപ്പര്‍മാരുടെ ഒരു പുതുതലമുറയെ കേരളത്തിനും ഇന്ത്യക്കുമായി വാര്‍ത്തെടുക്കുകയാണ് ഞങ്ങളുടെ ലക്ഷ്യം” ജോണ്‍ ബുറിഡ്ജ് പറഞ്ഞു.

Related News