ചരക്ക് സേവന നികുതി അഥവാ ജിഎസ്ടി ചട്ടക്കൂടിന്റെ പുനഃസംഘടന, ദൈനംദിന ഉപയോഗ വസ്തുക്കളുടെ വില കുറയ്ക്കുമെന്ന് പ്രതീക്ഷ. പുതിയ നികുതി പരിഷ്കരണം കാര്, ഇരുചക്രവാഹനങ്ങള്, മൊബൈല് ഫോണ്, കമ്പ്യൂട്ടര് എന്നിവയുടെ വിലയില് കുറവുണ്ടാക്കും. പുതുക്കിയ ജിഎസ്ടി നിരക്ക് ജിഎസ്ടി കൗൺസിൽ യോഗത്തിനുശേഷം സ്ഥിരീകരിക്കപ്പെടും, ഇത് ഏകദേശം 50,000 കോടി രൂപയുടെ വരുമാന നഷ്ടം നികത്തുമെന്ന് പ്രതീക്ഷിക്കുന്നു.
പാസഞ്ചർ, ഇരുചക്ര വാഹനങ്ങൾക്ക് നികുതി കുറയ്ക്കാനും ഈ പരിഷ്കരണം സഹായിക്കുമെന്ന് പ്രതീക്ഷിക്കുന്നു. മുമ്പ് 12 ശതമാനവും 28 ശതമാനവും നികുതി ചുമത്തിയിരുന്ന സാധനങ്ങൾ ഇനി അഞ്ച് ശതമാനത്തിലേക്കും 18 ശതമാനത്തിലേക്കും മാറുമെന്നാണ് സൂചന. പ്രത്യേകിച്ചും, നിലവിൽ 28% ജിഎസ്ടി ഈടാക്കുന്ന എല്ലാ ഉല്പന്നങ്ങളുടെയും 90 ശതമാനത്തിന്റെയും നികുതി കുറയ്ക്കാനും ഈ ഉല്പന്നങ്ങൾ 18 ശതമാനത്തിലേക്ക് കുറയ്ക്കാനും പദ്ധതിയിടുന്നതായി സർക്കാർ വൃത്തങ്ങൾ പറഞ്ഞു. ഇപ്പോൾ 12% നികുതി ചുമത്തുന്ന സമാനമായ വലിയൊരു വിഭാഗം സാധനങ്ങൾക്ക് ലെവി കുറയ്ക്കേണ്ടിവരും. അത് 5% മാത്രമാക്കും. ഇതില് ‘ദൈനംദിന ഉപയോഗ’ ഇനങ്ങൾ ഉൾപ്പെടുമെന്ന് സർക്കാർ പറഞ്ഞിരുന്നു. പുകയില ഉല്പന്നങ്ങൾ ഉൾപ്പെടെ ചില ഇനങ്ങൾക്ക് 40% പ്രത്യേക ‘പാപ നികുതി’ ഉണ്ടായിരിക്കും. ഈ പട്ടികയിൽ അഞ്ച് മുതൽ ഏഴ് വരെ ഉല്പന്നങ്ങൾ മാത്രമേ ഉണ്ടാകൂ. ഇവ ഇതിനകം തന്നെ ഉയർന്ന ലെവികൾ ആകർഷിക്കുന്നു. ഉദാഹരണത്തിന് ചവയ്ക്കുന്ന പുകയിലയ്ക്ക് 160% സെസ് ഉണ്ട്, കൂടാതെ സിഗരറ്റിന് ജിഎസ്ടി, സെസ്, ദേശീയ ദുരന്ത നിവാരണ ഡ്യൂട്ടി എന്നിവയുടെ മിശ്രിതത്തിലൂടെയാണ് നികുതി ചുമത്തുന്നത്. കൂടാതെ, വജ്രങ്ങൾ, വിലയേറിയ കല്ലുകൾ എന്നിവ പോലുള്ള, തൊഴിൽ പ്രാധാന്യമുള്ളതും കയറ്റുമതി അധിഷ്ഠിതവുമായ വ്യവസായങ്ങൾ ഉല്പാദിപ്പിക്കുന്ന മറ്റ് ചില ഇനങ്ങൾക്കും നിലവിലുള്ള നിരക്കുകൾക്കനുസരിച്ച് നികുതി ബാധകമാകും. പെട്രോളിയം ഉല്പന്നങ്ങൾ ജിഎസ്ടി ചട്ടക്കൂടിന് പുറത്ത് തുടരും.
വിലകുറയുന്ന നിത്യോപയോഗ സാധനങ്ങൾ എന്താണെന്ന് വ്യക്തമല്ല. എങ്കിലും ടൂത്ത് പേസ്റ്റ് മുതൽ കുട വരെയുള്ള ഇനങ്ങൾ, തയ്യൽ മെഷീനുകൾ, പ്രഷർ കുക്കറുകൾ, ചെറിയ വാഷിങ് മെഷീനുകൾ പോലുള്ള ചെറിയ വീട്ടുപകരണങ്ങൾ എന്നിവ ഇതിൽ ഉൾപ്പെടാം. സൈക്കിളുകൾ, റെഡിമെയ്ഡ് വസ്ത്രങ്ങൾ (1,000 രൂപയിൽ കൂടുതൽ വില), പാദരക്ഷകൾ (500 മുതൽ 1,000 രൂപ വരെ) എന്നിവയും ഇതിൽ ഉൾപ്പെട്ടേക്കാം, വാക്സിനുകൾ, സെറാമിക് ടൈലുകൾ, കാർഷിക ഉപകരണങ്ങൾ എന്നിവയും ഇതിൽ ഉൾപ്പെട്ടേക്കാം. മൊബൈൽ ഫോണുകളും കമ്പ്യൂട്ടറുകളും, ഹെയർ ഓയിൽ, സംസ്കരിച്ച ഭക്ഷണങ്ങൾ, ജ്യാമിതി ബോക്സുകൾ, നോട്ട്ബുക്കുകൾ പോലുള്ള സ്കൂൾ കുട്ടികൾക്കുള്ള സ്റ്റേഷനറി ഇനങ്ങൾ എന്നിവയും ഇതിൽ ഉൾപ്പെടും. ടെലിവിഷനുകൾ, എയർ കണ്ടീഷണറുകൾ, റഫ്രിജറേറ്ററുകൾ, വാഷിങ് മെഷീനുകൾ, എയറേറ്റഡ് വാട്ടർ, അതുപോലെ റെഡി-മിക്സ് കോൺക്രീറ്റ്, സിമന്റ് പോലുള്ള നിർമ്മാണ വ്യവസായത്തിൽ ഉപയോഗിക്കുന്ന ചില സാധനങ്ങൾ എന്നിവയും പുതിയ 18% ജിഎസ്ടിയിൽ ഉൾപ്പെടാൻ സാധ്യതയുണ്ട്. നിലവിൽ പാസഞ്ചർ വാഹനങ്ങൾക്ക് 28% ജിഎസ്ടിയും എഞ്ചിൻ ശേഷി, നീളം, ബോഡി തരം എന്നിവയെ അടിസ്ഥാനമാക്കി 22% വരെ നീളുന്ന നഷ്ടപരിഹാര സെസും ബാധകമാണ്. ഇലക്ട്രിക് കാറുകൾക്ക് 5% നികുതി ചുമത്തുന്നു, നഷ്ടപരിഹാര സെസ് ഇല്ല. ഇരുചക്ര വാഹനങ്ങൾക്ക് നിരക്ക് 28 ശതമാനമാണ്. 350 സിസി വരെ എന്ജിൻ ശേഷിയുള്ള മോഡലുകൾക്ക് നഷ്ടപരിഹാര സെസ് ഇല്ല, അതേസമയം ആ പരിധിക്ക് മുകളിലുള്ളവ 3% സെസ് അടയ്ക്കുന്നു. ഇടത്തരം, ആഡംബര പാസഞ്ചർ വാഹനങ്ങൾക്ക് ഇപ്പോൾ 40 ശതമാനത്തിൽ കൂടുതലും 50 ശതമാനത്തോളവും നികുതി ഈടാക്കുന്നു. പുതുക്കിയ ജിഎസ്ടി ഘടന 28 ശതമാനം വിഭാഗത്തെ ഇല്ലാതാക്കും. അതായത് കാറുകളും ബൈക്കുകളും പുതിയ 18 ശതമാനത്തിലേക്ക് താഴാൻ സാധ്യതയുണ്ട്, ഇത് കുറഞ്ഞത് 10% വരെ വില കുറയ്ക്കും. ജിഎസ്ടി പരിഷ്കരണവും അതിന്റെ ഫലമായുണ്ടാകുന്ന ചെലവുകളും സാമ്പത്തിക വളർച്ചയെ കൂടുതൽ ഉത്തേജിപ്പിക്കുമെന്ന് സർക്കാർ പ്രതീക്ഷിക്കുന്നു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.