Web Desk

കൊച്ചി

November 24, 2021, 5:49 pm

ആന്റിബയോട്ടിക്കിന് എതിരായി പ്രതിരോധശേഷി വര്‍ദ്ധിക്കുന്നത് വലിയ വിപത്ത് 

Janayugom Online

ആന്റിബയോട്ടിക്കുകൾക്ക് എതിരെ ബാക്ടീരിയകൾ നേരിടുന്ന പ്രതിരോധശേഷിയാണ് ആരോഗ്യസംരക്ഷണരംഗത്തെ വലിയ പ്രതിസന്ധികളിലൊന്ന് എന്ന് കേരള ഫിഷറീസ് സമുദ്രപഠന സർവ്വകലാശാല (കുഫോസ്) വൈസ് ചാൻസലർ ഡോ.കെ റിജി ജോൺ പറഞ്ഞു. ആന്റിബോയോട്ടിക് പ്രതിരോധം കുറയ്ക്കാൻ വേണ്ട നടപടികളെ കുറിച്ചുള്ള ബോധവത്കരണ സെമിനാർ കുഫോസിൽ ഉദ്ഘാടനം ചെയ്യുകയായിരുന്നു ഡോ.കെ.റിജി ജോൺ. ലോകത്ത് ഇപ്പോൾ ലഭ്യമായിട്ടുള്ള ആൻറിബയോട്ടിക്കുകൾക്ക് എതിരെയെല്ലാം രോഗാണുക്കളായ ബാക്ടീരിയകൾ പ്രതിരോധശേഷി ഭാഗികമായെങ്കിലും കൈവരിച്ചിരിക്കുന്ന അവസ്ഥായാണ് ഇപ്പോൾ. നിർഭാഗ്യവശാൽ പുതിയ ആൻറിബയോട്ടിക്കുകൾ വികസിപ്പിക്കാൻ ശാസ്ത്രജ്ഞർക്ക് കഴിയുന്നുമില്ല. പലപ്പോഴും ഗുരുതരമായ രോഗങ്ങൾക്ക് ചികിത്സ ഫലപ്രദമാകാതെ വരുമ്പോഴാണ് നമ്മളുടെ ശരീരവും ആൻറിബയോട്ടിക്കുകൾക്ക് എതിരെ പ്രതിരോധശേഷി തീർത്തിരിക്കുന്നുവെന്ന് തിരിച്ചറിയുകയെന്ന് ഡോ.റിജി ജോൺ പറഞ്ഞു.

കേന്ദ്ര ഫിഷറീസ് ടെക്നോളജി ഇൻസ്റ്റിറ്റ്യട്ട് ശാസ്ത്രജ്ഞൻ ഡോ.വി.മുരുകദാസ് മുഖ്യപ്രഭാഷണം നടത്തി. ബാക്ടീരീയകൾ ആൻറിബയോട്ടിക്കുകൾക്ക് എതിരെ പ്രതിരോധശേഷി നേടുന്നത് മൂലം ഏറ്റവും വലിയ ദുരിതഫലം അനുഭവിക്കുന്നത് ഏഷ്യൻ രാജ്യങ്ങളാണെന്ന് ഡോ.മുരുകദാസ് പറഞ്ഞു. കന്നുകാലികളിലെയും മത്സ്യങ്ങളിലെയും രോഗപ്രതിരോധവും ചികിത്സയും ഏഷ്യൻ രാജ്യങ്ങളിൽ ഇപ്പോഴേ വലിയ പ്രതിസന്ധി ഇതുമൂലം നേരിടുകയാണ്. കുറേ വർഷങ്ങളായി തുടരുന്ന  ആൻറിബയോട്ടിക്കുകളുടെ അമിതമായ ഉപയോഗവും അസ്ഥാനത്തുമുള്ള ഉപയോഗവുമാണ് ഈ അവസ്ഥ സംജാതമാക്കിയത്.  രജിസ്ട്രാർ ഡോ.ബി.മനോജ്കുമാർ സെമിനാറിൽ അധ്യക്ഷനായിരുന്നു. ഗവേഷണവിഭാഗം മേധാവി ഡോ.ദേവികപിള്ള, ഫിഷറീസ് ഡീൻ ഡോ.റോസിലിഡ് ജോർജ്, ഡോ.ലിംനാമോൾ എന്നിവർ പ്രസംഗിച്ചു. ഇരുന്നൂറോളം ഗവേഷകരും പി.ജി.വിദ്യാർത്ഥികളും സെമിനാറിൽ പങ്കെടുത്തു.

കുഫോസിൽ ആൻറിബോയോട്ടിക് പ്രതിരോധം കുറയ്ക്കാൻ വേണ്ട നടപടികളെ കുറിച്ചുള്ള ബോധവത്കരണ സെമിനാർ വൈസ് ചാൻസലർ ഡോ.കെ.റിജി ജോൺ ഉദ്ഘാടനം ചെയ്യുന്നു. ഗവേഷണവിഭാഗം മേധാവി ഡോ.ദേവികപിള്ള, രജിസ്ട്രാർ ഡോ.ബി.മനോജ്കുമാർ, ഫിഷറീസ് ഡീൻ ഡോ.റോസിലിഡ് ജോർജ് എന്നിവർ സമീപം

Eng­lish Sum­ma­ry: Increased immu­ni­ty to antibi­otics is a big risk
You may like this video also