റെജി കുര്യന്‍

ന്യൂഡല്‍ഹി

December 08, 2020, 4:22 am

ഇന്ന് ഭാരത പ്രതിഷേധം

Janayugom Online

കേന്ദ്ര സര്‍ക്കാരിന്റെ കാര്‍ഷിക നിയമങ്ങളില്‍ പ്രതിഷേധിച്ച് കര്‍ഷകര്‍ ആഹ്വാനം ചെയ്ത ഭാരത് ബന്ദ് രാവിലെ 11 മുതല്‍ ഉച്ചകഴിഞ്ഞ് മൂന്ന് മണിവരെ. ഇടതു പാര്‍ട്ടികള്‍ ഉള്‍പ്പെടെ 18ലധികം രാഷ്ട്രീയ പാർട്ടികൾ ബന്ദിനു പിന്തുണ പ്രഖ്യാപിച്ചിട്ടുണ്ട്.

നാളെ നടക്കാനിരിക്കുന്ന ആറാം റൗണ്ട് ചര്‍ച്ചകള്‍ക്കു മുന്നോടിയായാണ് ഭാരത് ബന്ദിന് ആഹ്വാനം ചെയ്തത്. കേന്ദ്ര സര്‍ക്കാര്‍ കൊണ്ടുവന്ന കരിനിയമങ്ങള്‍ക്ക് എതിരെയുള്ള കര്‍ഷകരുടെ പ്രതിഷേധം രാജ്യതലസ്ഥാന മേഖലയില്‍ ശക്തമായി തുടരുകയാണ്. ബാങ്ക് ഉദ്യോഗസ്ഥരുടെ സംഘടനകളും തൊഴിലാളി സംഘടനകളും ബന്ദിന് പിന്തുണ പ്രഖ്യാപിച്ചിട്ടുണ്ട്. സമാധാനപരമായ പ്രതിഷേധം സര്‍ക്കാരിന്റെ ചില നയങ്ങളോടുള്ള എതിര്‍പ്പ് വ്യക്തമാക്കാനാണെന്ന് ഭാരതീയ കിസാന്‍ യൂണിയന്‍ വക്താവ് രാകേഷ് ടിക്കായത് പറഞ്ഞു.

സമാധാനത്തിനു ഭംഗം വരാതിരിക്കാന്‍ സുരക്ഷ ശക്തമാക്കണമെന്നും കോവിഡ് മാനദണ്ഡങ്ങള്‍ പാലിക്കണമെന്നും കേന്ദ്ര സര്‍ക്കാര്‍ സംസ്ഥാനങ്ങള്‍ക്കു നിര്‍ദ്ദേശം നല്‍കി. ഇന്‍സ്റ്റിറ്റ്യൂട്ട് ഓഫ് ചാര്‍ട്ടേര്‍ഡ് അക്കൗണ്ട്‌സ് ഇന്നു നടത്താനിരുന്ന പരീക്ഷ ഡിസംബര്‍ 13ലേക്കു മാറ്റിവച്ചു. മഹാരാഷ്ട്രയിലെ വാസി എപിഎംസി ചന്ത ഇന്ന് അടഞ്ഞു കിടക്കും. വിവിധ ടാക്‌സി യൂണിയനുകളും സമരത്തിന് പിന്തുണ അറിയിച്ചിട്ടുണ്ട്.

കച്ചവടക്കാരുടെ സംഘടനകള്‍ പിന്തുണയ്ക്കുന്ന സാഹചര്യത്തില്‍ ഡല്‍ഹിയിലെ മൊത്ത കച്ചവട കേന്ദ്രങ്ങളായ ഗാസിപൂര്‍, ഓഖ്‌ല, നരേല ചന്തകളെ പ്രതിഷേധം കാര്യമായി ബാധിക്കുമെന്ന് ഏഷ്യയിലെ ഏറ്റവും വലിയ മൊത്തക്കച്ചവട കേന്ദ്രമായ ആസാദ്പൂര്‍ മണ്ഡി ചെയര്‍മാന്‍ ആദില്‍ അഹമ്മദ് ഖാന്‍ വ്യക്തമാക്കി. കര്‍ഷകര്‍ ദേശീയ പാതകളും ടോള്‍ പ്ലാസകളും ഉപരോധിക്കും.

ഹരിയാന‑യുപി-ഡല്‍ഹി അതിർത്തികളിലെ വിവിധ റോഡുകള്‍ അടയ്ക്കുമെന്ന് ഡല്‍ഹി പൊലീസ് വ്യക്തമാക്കിയിട്ടുണ്ട്. ഈ പാതകളിലൂടെയുള്ള യാത്ര ഒഴിവാക്കണമെന്നും ഡല്‍ഹി ട്രാഫിക് പൊലീസ് ട്വീറ്റ് ചെയ്തു.

എൻഎഫ്ഐഡബ്ല്യു, എൻഎപിഎം നേതാക്കൾ സിംഘുവിലെ സമരഭൂമിയിലെത്തി കർഷക പ്രക്ഷോഭത്തിന് ഐക്യദാർഢ്യം പ്രഖ്യാപിച്ചു. നേതാക്കളായ ആനിരാജ, മേധാ പട്കർ, അയിഷ എന്നിവർ നേതൃത്വം നല്കി. ഡല്‍ഹി മുഖ്യമന്ത്രി അരവിന്ദ് കെജ്‌രിവാളും സമരവേദിയില്‍ എത്തി പിന്തുണ പ്രഖ്യാപിച്ചു. ഡല്‍ഹിയിലെ ഒമ്പത് സ്റ്റേഡിയങ്ങള്‍ ജയിലാക്കി മാറ്റാന്‍ സര്‍ക്കാരിനു മേല്‍ വന്‍തോതില്‍ സമ്മര്‍ദ്ദം ഉണ്ടായിരുന്നതായി അദ്ദേഹം കര്‍ഷകരോടു പറഞ്ഞു.

കായികതാരങ്ങളെ പൊലീസ് തടഞ്ഞു

കർഷക പ്രക്ഷോഭത്തിന് പിന്തുണ പ്രഖ്യാപിച്ചുകൊണ്ട് തങ്ങൾക്ക് ലഭിച്ച വിവിധ ഉപഹാരങ്ങൾ തിരിച്ചേല്പിക്കുന്നതിന് രാഷ്ട്രപതി ഭവനിലേക്ക് പുറപ്പെട്ട കായികതാരങ്ങളെ പൊലീസ് തടഞ്ഞു.

ഗുസ്തി താരവും അർജുന, പത്മശ്രീ ജേതാവുമായ കർത്താർസിങ്, അർജുന അവാർഡ് ജേതാക്കളായ സജ്ജൻസിങ് ചീര (ബാസ്ക്കറ്റ് ബാൾ), രജ്ബീർ കൗർ (ഹോക്കി) തുടങ്ങിയവരുടെ നേതൃത്വത്തിൽ 35 കായികതാരങ്ങൾ പ്രസ് ക്ലബ്ബ് ഓഫ് ഇന്ത്യയ്ക്ക് മുന്നിൽനിന്നാണ് രാഷ്ട്രപതിഭവനിലേക്ക് നീങ്ങിയത്. സ്വർണ മെഡലുകൾ ഉൾപ്പെടെ തങ്ങൾക്ക് ലഭിച്ച ഉപഹാരങ്ങളുമായിട്ടായിരുന്നു മാർച്ച്. കൃഷിഭവന് സമീപം പൊലീസ് ഇവരെ തടയുകയായിരുന്നു.

കരിനിയമങ്ങൾ പിൻവലിച്ചില്ലെങ്കിൽ തനിക്ക് ലഭിച്ച ഖേൽ രത്ന പുരസ്കാരം തിരിച്ചു നല്കുമെന്ന് ഒളിമ്പിക് താരം വിജേന്ദർസിങ് പ്രഖ്യാപിച്ചിട്ടുണ്ട്. കഴിഞ്ഞ ദിവസം അദ്ദേഹം സിംഘുവിലെ സമരവേദിയിലെത്തി കർഷകരെ അഭിവാദ്യംചെയ്തിരുന്നു.

Eng­lish Sum­ma­ry: India protests today

You may like this video also