Friday
19 Jul 2019

ഇരുപത്തിയൊന്നാം നൂറ്റാണ്ട് എങ്ങനെ ഇന്ത്യയുടേതാവും?

By: Web Desk | Monday 4 March 2019 10:32 PM IST


varthakalkupinnilമുമ്പെങ്ങുമില്ലാത്ത വിധം ഇന്ത്യയിലെ മെട്രോനഗരങ്ങളെ അന്തരീക്ഷ മലിനീകരണം ബാധിച്ചിരിക്കുന്നതായി റിപ്പോര്‍ട്ടുകള്‍ വന്നുകൊണ്ടിരിക്കുന്നു. അതുകൊണ്ടാണ് രാജ്യത്ത് അതീവ ഗൗരവത്തോടെ തന്നെ ദേശീയ ശുദ്ധവായു പദ്ധതി (നാഷണല്‍ ക്ലീന്‍ എയര്‍ പ്രോഗ്രാം) അവതരിപ്പിച്ചിട്ടുള്ളത്. നമ്മുടെ അയല്‍ രാജ്യങ്ങളായ പാകിസ്ഥാനിലും ചൈനയിലുമൊക്കെ അന്തരീക്ഷ മലിനീകരണ പ്രശ്‌നം ഉണ്ടെങ്കിലും ഇന്ത്യയിലേതുപോലെ ബാധിച്ചു തുടങ്ങിയിട്ടില്ല. ലോക രാജ്യങ്ങളിലെ മലിനീകരണം സംബന്ധിച്ചും കാലാവസ്ഥ വ്യതിയാനത്തെക്കുറിച്ചും സജീവമായി ചര്‍ച്ചകള്‍ നടക്കുകയും ഈ ചര്‍ച്ചകളുടെ ഭാഗമായി പാരീസ് ഉച്ചകോടിയില്‍ വെച്ച് നിലപാടുകള്‍ എടുക്കുകയും ചെയ്തിട്ടുണ്ട്.
ആ ഉച്ചകോടിയില്‍ വെച്ച് ലോകരാജ്യങ്ങള്‍ എടുത്ത തീരുമാനങ്ങളില്‍ പലതും നടപ്പിലാക്കിയിട്ടില്ലെന്ന് മാത്രമല്ല, അവയ്ക്ക് പുല്ലുവില കല്‍പ്പിക്കാന്‍ പോലും പല രാജ്യങ്ങളും തയ്യാറായിട്ടുമില്ല. അമേരിക്കയെ പോലെയുള്ള കുത്തക മുതലാളിത്ത രാജ്യങ്ങള്‍ പലതും അന്തരീക്ഷ മലിനീകരണ പ്രശ്‌നത്തെ മൂന്നാം ലോകരാജ്യങ്ങളുടെ ചുമലില്‍ കെട്ടിവെക്കാന്‍ ശ്രമിക്കുന്നുമുണ്ട്. വ്യാവസായിക വിപ്ലവകാലത്ത് നിലനിന്നിരുന്ന അന്തരീക്ഷ ചൂടിന്റെ തോത് രണ്ടു ശതമാനമെങ്കിലും കുറയ്ക്കുകയെന്ന ലക്ഷ്യമായിരുന്നു പാരീസ് കരാര്‍ മുന്നോട്ടു വെച്ചത്. ഇത്തരം കരാറുകള്‍ ലോകവ്യാപകമായി നടപ്പാക്കണമെങ്കില്‍ മൂലധനവും സാങ്കേതിക വിദ്യയും ആവശ്യമായി വരാറുണ്ട്. ഇവ രണ്ടും അനുവദിച്ചു കിട്ടിയില്ല എന്ന കാരണത്താലാണ് പാരീസ് കരാര്‍ പരാജയമാകാന്‍ കാരണമായത്.
ഇന്ത്യയില്‍ ഇന്ന് നിലനില്‍ക്കുന്ന നാഷണല്‍ എയര്‍ പ്രോഗ്രാമിന്റെയും വിധി മറ്റൊന്നല്ല. ഒരു രാജ്യത്തിന്റെ അന്തരീക്ഷ വായു നിലവാരം കാത്തു സൂക്ഷിക്കാന്‍ ലോകാരോഗ്യ സംഘടന ചില മാനദണ്ഡങ്ങള്‍ പുറത്തുവിട്ടിട്ടുണ്ട്. അവ പാലിച്ചുകൊണ്ടു വേണം ഒരു രാജ്യം മുന്നോട്ടു പോകാന്‍. ഇന്ത്യക്ക് മാത്രമല്ല, ലോകത്തിലെ ഓരോ രാജ്യത്തിനും ബാധകമാണിത്. ഈ മാനദണ്ഡങ്ങള്‍ പാലിക്കുക എന്നതുതന്നെയാണ് നാഷണല്‍ ക്ലീന്‍ എയര്‍ പ്രോഗ്രാം നിലവില്‍ കൊണ്ടുവരുമ്പോള്‍ രാജ്യം ആഗ്രഹിച്ചത്. ലോകത്തിലെ ഏറ്റവും ജനസംഖ്യയുള്ള രാജ്യങ്ങളായ ഇന്ത്യയും ചൈനയും നേരിടുന്ന മുഖ്യവിഷയങ്ങളില്‍ പ്രധാനപ്പെട്ടതാണ് അന്തരീക്ഷ മലിനീകരണം. എങ്കിലും നമ്മെക്കാള്‍ ഈ രംഗത്ത് മുന്നിലെത്താന്‍ ചൈനയ്ക്ക് കഴിഞ്ഞിട്ടുണ്ട്. ഭരണകൂടത്തിന്റെ നിരന്തരമായ ശ്രമങ്ങളും നവ സാങ്കേതികതയുടെ വളര്‍ച്ചയുമാണ് ഇതിനു കാരണം. എന്നാല്‍, തന്നെ അഞ്ച് വര്‍ഷക്കാലത്തോളം സഞ്ചരിക്കേണ്ടിവരും. രാഷ്ട്രീയ അതിപ്രസരത്തിനിടയില്‍ വേണ്ടത്ര അവബോധം ഭരണതലത്തിലും സാമൂഹിക തലത്തിലും വളര്‍ത്തിയെടുക്കാന്‍ നമുക്കിനിയും കഴിഞ്ഞിട്ടില്ല.
കേന്ദ്ര മലിനീകരണ നിയന്ത്രണ ബോര്‍ഡ് എന്നൊരു സ്ഥാപനം നമുക്കുണ്ട്. അന്തരീക്ഷ മലിനീകരണവുമായി ബന്ധപ്പെട്ടാണ് മുഖ്യമായും ഈ സ്ഥാപനം ഇന്ത്യയില്‍ പ്രവര്‍ത്തിച്ചു വരുന്നത്. ഈ ബോര്‍ഡ് 42 മാനദണ്ഡങ്ങള്‍ മലിനീകരണ പ്രശ്‌നവുമായി ബന്ധപ്പെട്ട് പുറത്തിറക്കിയിട്ടുണ്ട്. കാലാവസ്ഥാ വ്യതിയാനം കാലാനുസൃതമായ അന്തരീക്ഷ മലിനീകരണം എന്നിവയാണ് കേന്ദ്ര മലിനീകരണ ബോര്‍ഡിന്റെ പ്രധാനപ്പെട്ട കര്‍മ്മ മേഖല. മലിനീകരണങ്ങളെ തരംതിരിച്ചു കര്‍മ്മപദ്ധതികള്‍ ആവിഷ്‌കരിക്കുക എന്നതും ഇതിന്റെ ദൗത്യങ്ങളില്‍ പെട്ടതാണ്.
കാലങ്ങളായി ഇവര്‍ നടത്തിവരുന്ന പദ്ധതികള്‍കൊണ്ട് ഇന്ത്യയിലെ മലിനീകരണ പ്രശ്‌നത്തെ തരണം ചെയ്യാന്‍ കഴിഞ്ഞിട്ടില്ല. ചില വാഹനങ്ങളിലും വീടുകളിലും എല്‍പിജി യുടെ ഉപയോഗം കൊണ്ടുവന്നതൊഴികെ മറ്റൊന്നും ഗുണപ്രദമായി നടപ്പില്‍ വരുത്തുവാന്‍ കഴിഞ്ഞിട്ടില്ല. ഈ രംഗത്ത് ചെയ്യാന്‍ കഴിയുന്ന ഒരു വലിയ പ്രവര്‍ത്തനം ഫോസില്‍ ഇന്ധനങ്ങളുടെ വ്യാപകമായ ഉപയോഗത്തിന് തടയിടുക എന്നതാണ്. അന്തരീക്ഷ മലിനീകരണത്തിന് പ്രധാന വില്ലനായി നില്‍ക്കുന്ന ഫോസില്‍ ഇന്ധനങ്ങളുടെ ഉപയോഗം കുറച്ചാല്‍ തന്നെ ഇന്ത്യയിലെ ഭീമമായ അന്തരീക്ഷ മലിനീകരണത്തിന് ചെറിയ തോതിലെങ്കിലും മാറ്റം വരുത്താന്‍ കഴിയും. പലപ്പോഴും സുപ്രീംകോടതിയും ദേശീയ ഹരിത ട്രിബൂണലും ഇടപെട്ടില്ലായിരുന്നുവെങ്കില്‍ ഇന്ത്യയുടെ ഗതിതന്നെ മാറിമറിഞ്ഞേനെ.
ലോകത്തില്‍ ഏറ്റവും മോശമായി അന്തരീക്ഷ മലിനീകരണം ബാധിക്കപ്പെട്ട ആദ്യമുപ്പത് നഗരങ്ങളുടെ കണക്കെടുത്താല്‍ അതില്‍ ഇന്ത്യന്‍ നഗരങ്ങളാവും മുന്നില്‍. ഏതാണ്ട് പകുതിയോളം വരും അത്. മുമ്പ് ഒരു അന്താരാഷ്ട്ര മാധ്യമം ഡല്‍ഹിയെക്കുറിച്ച് എഴുതിയത് ഈ നഗരം ഇന്ത്യയുടെ തലസ്ഥാന നഗരിയല്ല, മറിച്ച് വായുമലിനീകരണ തലസ്ഥാനമെന്നാണ്. അന്തരീക്ഷ മലിനീകരണത്താല്‍ മരിക്കുന്ന ആളുകളില്‍ നല്ലൊരു ശതമാനം ഇന്ത്യയിലാണ്. ലോകാരോഗ്യ സംഘടന തന്നെ ഇതുമായി ബന്ധപ്പെട്ട ചില കണക്കുകള്‍ പുറത്തു വിട്ടിട്ടുണ്ട്. തെരുവില്‍ സഞ്ചരിക്കുമ്പോള്‍ മാത്രമല്ല, വീടിനകങ്ങളിലും മലിനീകരണമുണ്ടെന്നതാണ് ഇന്ത്യന്‍ നഗരങ്ങളുടെ അവസ്ഥ.
ഇങ്ങനെ മരിക്കുന്നവരില്‍ അധികവും വ്യദ്ധരാണ്. അവരുടെ രോഗപ്രതിരോധ ശേഷിയില്ലായ്മയാണ് ഇതിനു കാരണം. പലപ്പോഴും മരണങ്ങള്‍ സംഭവിക്കുന്നത് വീടിനകത്തുവെച്ചുതന്നെയാണെന്നത് കൗതുകകരമാണ്. 2024-ലോടെ അന്തരീക്ഷത്തിലെ പൊടിപടലങ്ങളുടെ സാന്നിദ്ധ്യം 20-30 ശതമാനം കുറയ്ക്കാനാണ് ഇന്ത്യന്‍ മലിനീകരണ നിയന്ത്രണ ബോര്‍ഡ് ലക്ഷ്യമിടുന്നതെന്ന് അവരുടെ ഒരു റിപ്പോര്‍ട്ടില്‍ കാണാനിടയായി.
നമ്മുടെ പ്രധാനമന്ത്രി ഇരുപത്തിയൊന്നാം നൂറ്റാണ്ട് ഇന്ത്യയുടേതാണെന്ന് പലപ്പോഴും പ്രഖ്യാപിച്ചു കാണാറുണ്ട്. ആ ഇരുപത്തിയൊന്നാം നൂറ്റാണ്ടിലെ ഇന്ത്യ എന്ന സ്വപ്‌നം മാലിന്യമുക്ത ഇന്ത്യയാവുമോ എന്നു കൂടി പറയേണ്ടതുണ്ട്. ആഗോളതലത്തിലെ ജിഡിപി വളര്‍ച്ച എന്നത് ആരോഗ്യപരമായ ഒരു ജനതയുടെ അധിവാസ കേന്ദ്രം കൂടിയാവണം. അന്തരീക്ഷമലിനീകരണത്തിന്റെ 65 ശതമാനം ഇരകളും യുവജനങ്ങള്‍ ആയിട്ടുള്ള ഒരു രാജ്യത്തെ എങ്ങനെയാണ് ഇരുപത്തിയൊന്നാം നൂറ്റാണ്ട് ഇന്ത്യയുടേതാക്കി മാറ്റുക? അതിനുള്ള മാജിക്കൊന്നും മോഡിയുടെ കൈവശമില്ല. ദേശീയ സുരക്ഷയുടെ പ്രശ്‌നമായി അന്തരീക്ഷ മലിനീകരണത്തെ കണ്ടുകൊണ്ടു വേണം ഇനിയുള്ള നീക്കങ്ങള്‍. ആരോഗ്യകരമായ ഒരു ജീവിതം ഈ സമൂഹത്തിന് നല്‍കേണ്ടത് ഇന്ത്യന്‍ ഭരണഘടനയുടെ മൗലിക തത്വങ്ങളില്‍ പെട്ടതാണെന്ന ചിന്തയാണ് അതിന് ആവശ്യം.